معروف بھارتی فلمساز پرتیش نندی  کاانتقال ،بالی ووڈانڈسٹری سوگوار

(ویب ڈیسک)معروف بھارتی فلمساز اور میڈیا پرسنیلٹی پرتیش نندی 73 برس کی عمر میں انتقال کر گئے۔

بھارتی میڈیا کے مطابق پرتیش نندی جنوبی ممبئی میں واقع اپنے گھر میں دل کا دورہ پڑنے سے چل بسے،وہ ہندوستانی فلم انڈسٹری کے معروف پروڈیوسرز میں سے تھے اور اپنے کیریئر میں کئی کامیاب فلمیں بنائیں، جن میں جھنکار بیٹس، چمبیلی، ہزاروں خواہشیں ایسی، ایک کھلاڑی ایک حسینہ، اَن کہی ، پیار کے سائیڈ ایفیکٹس، بو بارک فارایور اور دیگر فلمیں شامل ہیں۔

پرتیش نندی اینی میٹڈ فلموں میں کتوں اور جانوروں کے کرداروں کو پیش کرنے اور فلمی کرداروں کو کارٹون کی شکل میں ڈھالنے کے لیے  بھی شہرت رکھتے تھے، ان کے انتقال سے بھارتی فلم انڈسٹری میں صدمے کی لہر دوڑ گئی۔

فلمساز کے انتقال کی خبر سینئر بالی ووڈ اداکار انوپم کھیر نے اپنے سوشل میڈیا اکاؤنٹ پر ایک جذباتی پوسٹ میں دی، پرتیش نندی کے انتقال پر گہرے دکھ کا اظہار کرتے ہوئے انوپم کھیر نے لکھا"میں اپنے قریبی دوست پرتیش نندی کے انتقال کی خبر سن کر صدمے سے دنگ رہ گیا ہوں۔

انوپم کھیر نے پرتیش نندی کو بہادر اور عظیم شخصیت قرار دیتے ہوئے کہا کہ وہ  میرے ابتدائی دنوں میں ایک اہم سہارا تھے،وہ ایک شاندار شاعر، مصنف، فلم ساز اور ایک منفرد ایڈیٹر/ صحافی تھے، وہ میری زندگی کے ابتدائی دنوں میں ایک عظیم طاقت کا ذریعہ تھے، ہم نے ایک ساتھ بہت سے یادگار لمحات شیئر کیے۔

انوپم کھیر نے اپنی پوسٹ میں  مزیدکہاکہ پرتیش نندی ان لوگوں میں سے ایک تھے جنہیں میں نے سب سے زیادہ نڈر پایا، وہ ہمیشہ ایک بڑے دل اور عظیم شخصیت کے مالک تھے، میں نے ان سے بہت کچھ سیکھا ہے، حالیہ دنوں میں ہماری ملاقاتیں کم ہو گئیں، لیکن وہ ایک بہت بڑی شخصیت تھے، وہ وقت جب ہم ایک دوسرے کے بغیر نہیں رہ سکتے تھے جب اس نے مجھے فلم فیئر اور خاص طور پر ”دی الیسٹریٹڈ ویکلی“ پر دکھایا تھا، وہ واقعی یاروں کا یارکی حقیقی تعریف تھے۔

یہ بھی پڑھیں:فن کاسلطان:سلطان راہی کوبچھڑے 29برس بیت گئے

 پرتیش نندی 15 جنوری 1951 ء کو بھاگلپور بہار میں پیدا ہوئے، وہ ایک معروف صحافی، میڈیا شخصیت اور فلم ساز تھے،1990 کی دہائی میں انہوں نے ایک مشہور ٹاک شو کی میزبانی کی جس کا نام ”دی پرتیش نندی شو“ تھا جو دور درشن پر نشر ہوتا تھا۔

پرتیش نندی نے شیوسینا پارٹی کی نمائندگی کرتے ہوئے 1998 سے 2004 تک راجیہ سبھا کے رکن کے طور پر بھی خدمات انجام دیں ۔