کوئٹہ، کوئلے کی کان میں گیس دھماکا، 12کانکن پھنس گئے

(عیسیٰ ترین)کوئٹہ سے چالیس کلو میٹر دور سنجدگی کے کوئلے کی کان میں گیس دھماکے کے نتیجے میں 12 کانکن پھنس گئے۔

چیف مائنز آفیسرعبدالغنی بلوچ کاکہنا ہے کہ کانکنوں کی نکالنے کیلئے آپریشن شروع کردیاگیا،ان کاکہناتھا کہ دھماکے کے باعث کوئلہ کان اندر سے منہدم ہوچکی ہے،واقعہ ایک گھنٹہ قبل پیش آیا،اطلاع ابھی ملی،کوشش ہے کہ تمام کانکنوں کو زندہ نکالا جائے۔

دوسری جانب ترجمان حکومت بلوچستان شاہد رند کاکہناتھا کہ کوئٹہ سے چالیس کلو میٹر دور سنجدگی کے علاقے میں کوئلے کی کان گیس بھر جانے سے بیٹھ گئی،ریسکیو ٹیمیں جائے حادثہ پر پہنچ گئی ہیں،ان کاکہناتھا کہ مائن میں12مزدوروں کے دب جانے کی اطلاعات ہیں۔

یہ بھی پڑھیں:فاسٹ بولر حارث رؤف سے متعلق اہم خبر آ گئی

وزیر معدنیات و خزانہ میر شعیب نوشیروانی نے چیف انسپکٹر مائنز غنی بلوچ کو متاثرہ مقام پر مزید 2ٹیمیں بھیجنے کی ہدایت کردی،وزیر معدنیات نے کہاکہ مائننگ کے مروجہ طریقہ کار کی خلاف ورزی ثابت ہونے پر مائن اونر کے خلاف قانونی کارروائی کی جائے، کوئی مائن اونر قانون اور انسانی زندگیوں سے بڑا نہیں۔

میر شعیب نوشیروانی نے کہاکہ متاثرہ کان سے مزدوروں کو نکالنے کیلئے ریسکیو آپریشن کو تیز کیا جائے، مزدوروں کے تحفظ کیلئے مائنز میں حفاظتی اقدامات پر سختی سے عمل درآمد یقینی بنایا جائے،ان کاکہناتھا کہ حکومت مزدوروں کے حقوق اور حفاظت کیلئے ہر ممکن اقدامات کرے گی،انہوں نے مائنز ڈیپارٹمنٹ کو حادثات کی روک تھام کیلئے جدید سہولیات فراہم کرنے کی ہدایت کی۔ 

یہ بھی پڑھیں:جمعہ مبارک!محکمہ موسمیات کی گرج چمک کیساتھ بارش کی پیشگوئی