جواں سال بھارتی اداکار نیتن چوہان کی مبینہ خودکشی

(ویب ڈیسک)بھارتی ٹیلی ویژن اداکار نیتن چوہان نے مبینہ طورپرخودکشی کرلی،ان کی لاش  گھر سے برآمد ہوئی ہے۔

بھارتی میڈیا رپورٹ کے مطابق 35 سالہ اداکار نیتن چوہان رئیلٹی شو "داداگیری" کے دوسرے سیزن کے فاتح تھے،اس کے علاوہ وہ"ایم ٹی وی اسپلٹز ولا" اور"کرائم پیٹرول" میں اداکاری کے لیے بھی مشہور تھے۔

رپورٹ میں بتایا گیا ہے کہ اداکارممبئی میں واقع اپنے فلیٹ میں مردہ حالت میں پائے گئے ،تاہم ان کی موت کی وجہ جاننے کیلئے تفتیش جاری ہے۔

ابتدائی معلومات کے مطابق ممبئی پولیس نے اس واقعے کو خودکشی قرار دیا ہے، بتایا گیا ہے کہ اداکار ڈپریشن کا علاج کروا رہے تھے،نیتن کی بیوی نے پولیس کو اپنے بیان میں بتایاہے کہ انہیں گزشتہ تین چار سال سے کوئی کام نہیں مل رہا تھا جس کی وجہ سے وہ شدید ذہنی دباؤ کا شکار تھے۔

نیتن چوہان کی موت کی خبر سن کر ان کے دوستوں اور ساتھیوں نے سوشل میڈیا پر افسوس اور تعزیت کا اظہار کیا ہے۔

ویبھوٹی ٹھاکر نے انسٹاگرام پر ایک بلیک اینڈ وائٹ تصویر کے ساتھ لکھا"میرے عزیز، سکون میں رہو (RIP)،میں واقعی حیرت زدہ اور غمگین ہوں، کاش تم میں تمام مشکلات کا سامنا کرنے کی طاقت ہوتی، کاش تم اپنے جسم کی طرح ذہنی طور پربھی مضبوط ہوتے۔"

ٹی وی اداکار سدھیپ سہیر نے بھی انسٹاگرام اسٹوری پر نیتن کی تصویر شیئر کرتے ہوئے لکھا"سکون میں رہو (RIP)، دوست۔"

یہ بھی پڑھیں:"پشپا 2" کاخطرناک پوسٹر،الو ارجن اور فہد فاضل کی دھماکے دار تصویر جاری

ویبھوٹی اور سدھیپ نے نیتن کے ساتھ "تیرا یار ہوں میں"کام کیا تھا، نتن کو آخری مرتبہ اس ڈرامے میں 2022 ءمیں دیکھا گیا تھا جس کے بعد وہ اسکرین سے اوجھل ہوگئے تھے۔

یاد رہے کہ نیتن کا تعلق اتر پردیش کے شہر علی گڑھ سے تھا،انہیں ٹی وی انڈسٹری میں پہلی کامیابی 2009 میں رئیلٹی شو "داداگیری 2" سے ملی تھی، انسٹاگرام اکاؤنٹ سے پتہ چلتا ہے کہ وہ فٹنس کے شوقین تھے۔