پیپلز پارٹی نے قومی اسمبلی اجلاس کا بائیکاٹ کیوں کیا؟ وجوہات کا پتہ چل گیا

(روزینہ علی) قومی اسمبلی کے اجلاس سے  پیپلزپارٹی کے بائیکاٹ کی وجوہات سامنے آ گئیں، پیپلز پارٹی کی نہروں کے حوالے سے قرارداد کو ایجنڈے میں شامل نہیں کیا گیا۔

تفصیلات کے مطابق پاکستان پیپلز پارٹی کی رہنما شازیہ مری نے کہا ہے کہ ہماری جماعت نے 7 اپریل کو دریائے سندھ پر نہروں کی تعمیر کے خلاف قرارداد جمع کروائی تھی، مسلم لیگ (ن) اور ایم کیو ایم نے اس قرارداد کی حمایت نہیں کی،  تحریک انصاف نے ایوان میں ہنگامہ کھڑا کیا، ایوان میں مسلم لیگ (ن) کے جواب کے باوجود، پیپلز پارٹی مسلسل دریائے سندھ پر نہروں کی تعمیر کے خلاف قرارداد کی منظوری کا مطالبہ کر رہی ہے،پیپلز پارٹی کے اراکین نے مسلم لیگ (ن) کے صوبائی وزراء کو اس مسئلے پر اشتعال انگیز اور تفرقہ انگیز بیانات کا ذمہ دار ٹھہرایا، پیپلز پارٹی نے 7 تاریخ کو نہروں کی نقصان دہ تجویز کے خلاف ایوان میں مؤقف اختیار کیا جبکہ تحریک انصاف کے اراکین مسلسل خلل ڈالتے رہے۔

شازیہ مر ی نے کہا ہے کہ دریائے سندھ پر نہروں کی تعمیر کے خلاف بحث کے دوران تحریک انصاف کا غیر ذمہ دارانہ رویہ دیکھنا انتہائی افسوسناک تھا، حقیقت یہ ہے کہ تحریک انصاف کی حکومت کے دوران عمران نیازی نے دریائے سندھ پر دو نہروں کی منظوری دی تھی جس کی سندھ میں پیپلز پارٹی کی حکومت نے شدید مخالفت کی، اگر آج تحریک انصاف قرارداد لا کر اپنی پچھلی غلطی کا ازالہ بھرنا چاہتی ہے، تو آئے ہماری قرارداد کی حمایت کرے۔

انہوں نے مزید کہا کہ ہمیں دریائے سندھ پر نہروں کی تعمیر کے خلاف اکٹھے کھڑا ہونا ہوگا کیونکہ یہ زندگی اور موت کا مسئلہ ہے،پاکستان پیپلز پارٹی نے ہمیشہ ملک میں پانی کی منصفانہ اور جائز تقسیم کے لیے جدوجہد کی ہے، ملک میں پانی کی تقسیم 1991 کے Accord کے تحت ہونی چاہیئے، پیپلز پارٹی نے کالا باغ ڈیم جیسے متنازع اور ملک دشمن منصوبے کی ہمیشہ مخالفت کی اور اسے دفن کیا،چیئرمین پیپلز پارٹی مسلسل دریائے سندھ پر نئی نہروں کی تعمیر کی مخالفت کرتے آ رہے ہیں، صدر آصف علی زرداری نے پارلیمنٹ کے مشترکہ اجلاس سے اپنے خطاب میں واضح طور پر کہا کہ وہ دریائے سندھ پر نہروں کی تجویز کی حمایت نہیں کریں گے، 

صدر زرداری نے اس فیصلے کو یکطرفہ اور وفاقی اکائیوں کے خلاف قرار دیا، چیئرمین بلاول بھٹو زرداری نے بھی کہا ہے کہ ایسے یکطرفہ فیصلے وفاق کے خلاف ہیں، پاکستان پیپلز پارٹی دریائے سندھ پر نہروں کی تعمیر کی اجازت نہیں دے گی اور عوام کے حقوق کے لیے جدوجہد جاری رکھے گی۔

یہ بھی پڑھیں:غیر قانونی افغانیوں کی واپسی،کسی قسم کی کوئی ڈیڈ لائن میں توسیع نہیں ہوئی،طلال چوہدری