کراچی: ٹینکر زکی ٹکر سے مزید 4 موٹر سائیکل سوار جاں بحق

(24 نیوز) شہید ملت روڈ بلوچ کالونی جانے والے ٹریک پر ٹینکر کی زد میں آکر 2 افراد جاں بحق ہوگئے اور ایک شخص زخمی ہوگیا، حادثے کے بعد ڈرائیور موقع سے فرار ہوگیا جبکہ مشتعل شہریوں نے واٹر ٹینکر کو آگ لگادی، شہر قائد میں 24 گھنٹوں کے دوران ہونے والے ٹریفک حادثات میں 6 افراد کی ہلاکت ہوگئی ہے۔

پولیس  کے مطابق بلوچ کالونی کے قریب گاڑی میں سوارشخص کی موٹر سائیکل پر سوار افراد سے ٹکر ہوئی جس کے بعد پیچھے سے آنے والے واٹر ٹینکرنے دوموٹرسائیکلوں کوٹکرماردی جس سےایک موٹر سائیکل پرسوار 2 افراد جاں بحق ہوا جبکہ دوسری پر سوار ایک شخص زخمی ہوا، بلدیہ ٹاؤن کے قریب حب ریور روڈ پر بھی واٹر ٹینکر کی ٹکر سے موٹرسائیکل سوار دو افراد جاں بحق ہوگئے جبکہ اس واقعے میں بھی ٹینکر ڈرائیورفرار ہونے میں کامیاب ہو گیا۔

 کاٹھور کے پاس کار سوار کی ٹکر سے زخمی ہونے والا کوسٹ گارڈ اہلکار بھی چل بسا، کار سوار کچھ دور جانے کے بعد اپنی کار چھوڑ کر فرار ہوگیا جبکہ واقعے کا مقدمہ درج کر کے کار سوار کی تلاش جاری ہے،کورنگی میں ہونے والے ایک حادثے میں چمڑا چورنگی کے قریب کار نے موٹرسائیکل سوار کو ٹکر ماردی جس سے موٹر سائیکل نالے میں جا گری اور ایک شخص جاں بحق ہوگیا جبکہ کار سوار موقع سے فرار ہوگیا۔ 

مزید پڑھیں:گاڑی کی نمبرپلیٹ نے ڈرائیور کی زندگی بدل دی

پولیس حکام کے مطابق رواں سال کے 10 دن میں مختلف ٹریفک حادثات میں 22 افراد جاں بحق اور 261 زخمی ہوئے۔