مولانا فضل الرحمان کو مینیج نہ کر پائے تو حکومت نہیں چل پائے گی ؛ فواد چو ہدری

( 24 نیوز ) سابق وفاقی وزیر فواد چوہدری نے دعویٰ کیا ہے کہ شہباز شریف اگر مولانا فضل الرحمان کو مینیج نہ کر پائے تو حکومت نہیں چل پائے گی۔
احتساب عدالت کے باہر میڈیا سے گفتگو کرتے ہوئے فواد چوہدری کا کہنا تھا ہم بھی فارم 47 کے ایم این اے ہو سکتے تھے لیکن ہمارا اپنا راستہ ہے، اسی کی تو سزا مل رہی ہے۔
فواد چوہدری کا کہنا تھا سب کیسز ختم ہوں گے تو 9 مئی واقعات پر کیسز شروع ہو جائیں گے ، حکومت چلنے سے متعلق سوال پر فواد چوہدری کا کہنا تھا شہباز شریف اگر فضل الرحمان کو مینیج نہ کر پائے تو حکومت نہیں چل پائےگی ، سابق وفاقی وزیر کا کہنا تھا فضل الرحمان نے اگر لانگ مارچ کا اعلان کر دیا تو حکومت آگے نہیں جاسکے گی۔
خیال رہے کہ چند روز قبل مولانا فضل الرحمان بھی اس بات کا عندیہ دے چکے ہیں کہ وہ پارلیمنٹ کے اندر بھی احتجاج کریں گے اور پارلیمنٹ کے باہر بھی انتخابات میں ہونے والی ناانصافیوں کے خلاف آواز بلند کریں گے۔

 واضح رہے کہ  قائد جمعیت علما ئے اسلام  مولانا فضل الرحمان نے پارلیمنٹ میں اپوزیشن بینچوں پر بیٹھنے کا اعلان کر رکھا ہے اور انہوں نے اسپیکر، ڈپٹی، اسپیکر، وزیراعظم اور صدر کے لیے ہونے والے الیکشن میں بھی حصہ نہیں لیا تھا۔

یہ بھی پڑھیں ؛جعلی حکومت نا آئین کو مانتی ہے نا کوئی احکامات کو مانتے ہیں، سردار لطیف کھوسہ