بھارت، تین سو کرروڑ روپے کی جائیداد کے تنازعے پر بہو نے سسر کو قتل کروا دیا

(ویب ڈیسک)بھارتی ریاست مہاراشٹر کے شہر ناگپور میں ایک خاتون کے 300 کروڑ روپے سے زائد کی جائیدادکے تنازعے پر سسر کو قتل کر وانے کا انکشاف ہو ا ہے۔

بھارتی ٹی وی کی رپورٹ کے مطابق 82 سالہ تاجر پروشاٹم پٹی وار 22 مئی کو ناگپور کے علاقے بالاجی نگری میں ایک تیز رفتار کار کی ٹکر کے نتیجے میں ہلاک ہو گئے تھے۔اس واقعے کا مقدمہ ایک حادثے کے طور پر درج کیا گیا اور ڈرائیور اور کار کو ابتدائی تحقیقات کے بعد رہا کر دیا گیا تاہم ایک پولیس افسر نے حادثے کو مشکوک قرار دیتے ہوئے اس کی تفصیل سے تحقیقات کا فیصلہ کیا جس پر انکشاف ہوا کہ پروشاٹم پٹی وار کی بہو ارچنا پٹی وار نے اپنے سسر کو گاڑی سے ٹکر مارنے والے شخص کو ایک کروڑ روپے ادا کرنے کا وعدہ کیا تھا۔اس انکشاف کے بعد پولیس نے مقامی ٹاؤن پلاننگ ڈیپارٹمنٹ میں اسسٹنٹ ڈائریکٹر کے عہدے پر تعینات ارچنا پٹی وار کواس کے چارشریک ملزمان کے ہمرا ہ گرفتار کر لیا، ان میں تیس سالہ نیرج ایشور نمجے، 29 سالہ سچن موہن دھارمک، 29 سالہ فیملی ڈرائیور سرٹھک باگڑے اور ارچنا کی 28 سالہ پرسنل اسسٹنٹ پائل ناگیشور شامل ہیں۔

 پولیس کے مطابق قتل کا منصوبہ بنیادی طور پر ارچنا ،اس کی پرسنل اسسٹنٹ اور فیملی ڈرائیور نے مل کر بنایاتھا اور بعد میں انہو ں نے سچن موہن دھارمک کو شراب کی بار کا لائسنس دلوانے کے وعدے پر اپنے ساتھ ملا لیا ۔پولیس کے مطابق انہوں نے ملزمان کے قبضے سے دو کاریں، ایک ایس یو وی،140 گرام سونا، تین لاکھ روپے ، سات موبائل فون اور دیگر اشیا برآمد کر لی ہیں۔ ملزمان کا ریمانڈ حاصل کرکے ان سے تفتیش جاری ہے۔

یہ بھی پڑھیں: تیز ہواؤں اور گرج چمک کیساتھ بارش کی پیشگوئی