وزیر داخلہ محسن نقوی کی امریکی وفد کے ہمراہ کرتار پور راہداری آمد، گوردوارہ صاحب کا دورہ

(24 نیوز) وفاقی وزیرداخلہ محسن نقوی، امریکی کانگریس مینز کے وفد کے ہمراہ سکھ برادری کی خوشیوں میں شرکت کیلئے کرتار پور راہداری پہنچ گئے۔ وفد میں امریکی کانگریس مین تھامس رچرڈ سوازی، امریکی کانگریس مین جوناتھن جیکسن، قائم مقام امریکی سفیر نیٹلی بیکر اور امریکی قونصل جنرل کرسٹن کے ہاکنز شامل تھیں۔

 تفصیلات کے مطابق محسن نقوی اور امریکی وفد کا درشنی ڈیوڑی کے باہر سکھ برادری کی سرکردہ شخصیات نے پرتپاک استقبال کیا اور پھول پیش کئے۔ وزیر داخلہ  اور امریکی کانگریس مینز نے بیساکھی میلے کی سکھ برادری کو مبارکباد دی ۔ محسن نقوی اور  امریکی کانگریس مینز کے وفد نے گوردوارہ صاحب کا دورہ کیا، اس موقع پر بابا گرونانک دیو جی سے وابستہ مختلف اشیاء دیکھیں، انہوں نے گوردوارہ صاحب میں دعائیہ تقریب میں شرکت کی اور تاریخی کنواں بھی دیکھا۔ محسن نقوی اور امریکی کانگریس مینز کے وفد کو گوردوارہ صاحب کرتا رپور کے بارے میں بریفنگ دی گئی ۔ محسن نقوی اور امریکی کانگریس مینز کے وفد  کو سروپا پہنایا گیا اور کرپان پیش کی گئی۔ 

وزیر داخلہ اور امریکی وفد  سے بھارت سے آئے سکھ یاتریوں نے ملاقات کی، اس موقع پر سکھ برادری نے ا ن کے ساتھ تصویریں بھی بنوائیں ۔ جس کے بعد  محسن نقوی اور امریکی کانگریس مینز  خصوصی طور پر لنگر ہال گئے اور سکھ برادری کے ساتھ بیٹھ کر کھانا کھایا ۔ امریکی کانگریس مینز کے وفد نے کرتار پور راہداری اور گوردوارہ صاحب میں سہولتوں کو سراہا، کہا کہ سکھ برادری کے میلے میں شرکت کرکے دلی خوشی ہوئی۔ کرتار پور راہداری اور گوردوارہ صاحب میں پاکستان نے سکھ یاتریوں کے بہترین انتظامات کئے ہیں۔ امریکی وفد نے پاکستان کی جانب سے کئے گئے انتظامات کو سراہا ۔ محسن نقوی اور امریکی وفد نے زیرو پوائنٹ کا بھی دورہ کیا۔ 

 محسن نقوی نے اس موقع پر کہا کہ سکھ یاتریوں کے لئے بہترین سہولیات مہیا کرنا ہماری حکومت کی اولین ترجیح ہے، سکھ یاتریوں کے لئے ویزا کے حصول کو آسان بنایا ہے۔ انہوں نے کہا کہ چاہتے ہیں کہ زیادہ سے زیادہ سکھ یاتری پاکستان آئیں اور اپنے مقدس مقامات پر جائیں، پاکستانی محبت کرنے والے اورپرامن لوگ ہیں، پاکستان میں تمام مذاہب کے ماننے والوں کو عزت و احترام کی نگاہ سے دیکھا جاتا ہے۔ 

یہ بھی پڑھیں: اداکارہ مہرالنساء اقبال برطانیہ میں شادی کے بندھن میں بندھ گئیں