ایک دن بھارت جاکرضرور کام کروں گا:علی رضا
اگرکبھی موقع ملا تو عالیہ بھٹ کے ساتھ کام کروں گا، انکی اداکاری بہت پسند ہے
Stay tuned with 24 News HD Android App
(ویب ڈیسک)باصلاحیت اداکار علی رضا نے بھارت جاکر شوبز میں کام کرنے کی خواہش کا اظہار کرتے ہوئے کہا ہے کہ انشاء اللّٰہ ایک دن وہ بھارت جاکر کام کریں گے۔
علی رضا نے حال ہی میں "فلم فیئر" کو انٹرویو دیا، جس میں مختلف معاملات سمیت اپنی اداکاری اور بھارتی شوبز انڈسٹری میں کام کرنے کے معاملے پر بھی کھل کر بات کی۔
انٹرویو کے دوران علی رضا نے بتایا کہ ماضی میں وہ بھارتی ٹی وی ڈرامے بھی دیکھتے رہے ہیں، ان کی طرح دیگر پاکستانی بھی شوق سے بھارتی ٹیلی وژن دیکھتے رہےہیں۔
ان کا کہنا تھا کہ ماضی میں بھارتی ٹی وی چینلز پاکستان میں آسانی سے چلتے تھے لیکن اب وہاں کے چینلز کیبل پر نہیں آتے،اس لیے اب بھارتی چینلز دیکھنا ہر کسی کے لیے آسان نہیں۔
علی رضا نے کہاکہ وہ ماضی میں سشانت سنگھ راجپوت کے ڈرامے دیکھنے سمیت کرائم پروگرام"سی آئی ڈی" اور دوسرے ٹی وی پروگرام دیکھتے رہے ہیں۔
ایک سوال کے جواب میں ابھرتے ہوئے اداکار کا کہنا تھا کہ وہ پاکستانی ڈراموں میں کام ضرور کرتے ہیں لیکن وہ زیادہ پاکستانی ڈرامے دیکھنے کے شوقین نہیں۔
انہوں نے بھارتی شائقین کو ہمسفر، زندگی گلزار ہے، الف، من مائل، دنیاپور،اقتدار اور نور جہاں‘ جیسے ڈرامے دیکھنے کی تجویز بھی دی۔
پسندیدہ بھارتی اداکارہ کے ساتھ کام کرنے کی خواہش کے سوال پرعلی رضا نے کہا کہ وہ کسی کا نام نہیں لے سکتے،یہ ان کا اختیار نہیں ہوگا کہ اگر انہیں کوئی بھارت میں کام کے لیے بلاتا ہے تو وہ اپنی پسند کی اداکارہ کے ساتھ کام کریں،ان کی خواہش ہے کہ اگر انہیں کبھی موقع ملے تو وہ عالیہ بھٹ کے ساتھ کام کریں، انہیں ان کی اداکاری بہت اچھی لگتی ہے۔
یہ بھی پڑھیں:ایمن اور منال خان نے وزن کم کرنے کا راز بتا دیا
علی رضا نے عالیہ بھٹ کی تعریفیں کرتے ہوئے کہا کہ انہیں ان کی اداکاری جاندار لگتی ہے اس لیے ان کی خواہش ہوگی کہ وہ ان کے ساتھ کام کریں۔
اس سے قبل علی رضا نے انکشاف کیا تھا کہ ایک بھارتی پروڈکشن ٹیم نے ان سے کام کے لیے رابطہ کیا لیکن ٹیم کو معلوم ہی نہیں تھا کہ وہ پاکستانی اداکار ہیں اور معلوم پڑنے پر پروڈکشن ٹیم پیچھے ہٹ گئی۔