چینی کا مصنوعی بحران پیدا کرنے والوں کو قانون کے شکنجے میں لایا جائے،وزیرِاعظم

 (اویس کیانی)وزیراعظم شہباز شریف نے کہا ہے کہ ملک میں ملک میں چینی کی وافر مقدار موجود ہے،انہوں نے ہدایت کی ہے کہ  مصنوعی طور پر بحران کی فضاء پیدا کرنے والوں کو قانون کے شکنجے میں لایا جائے۔

 وزیرِ اعظم محمد شہباز شریف کی زیرِ صدارت چینی کی کھپت و رسد اور مقررہ قیمتوں پر عام آدمی کو فراہمی پر جائزہ اجلاس آج اسلام آباد میں منعقد ہوا. 

اجلاس میں وفاقی وزراء اعظم نذیر تارڑ، رانا تنویر حسین، احد خان چیمہ، علی پرویز ملک، معاون خصوصی ہارون اختر اور متعلقہ اعلی حکام کے ساتھ ساتھ چاروں صوبوں کے چیف سیکریٹریز نے ویڈیو لنک کے ذریعے شرکت کی،اجلاس میں وزیرِ اعظم کو چینی کی کھپت و رسد اور موجودہ قیمتوں کے حوالے سے تفصیلی طور پر آگاہ کیا گیا.

اجلاس میں وزیرِ اعظم نے چینی کے ذخیرہ اندوزوں اور مصنوعی طور پر چینی  قلت پیدا کر کے قیمت میں اضافے کے ذمہ دار عناصر کے خلاف سخت ترین کاروائی کی ہدایت کرتے ہوئے کہاکہ چینی ذخیرہ کرنے، قیمتوں پر سٹہ کھیل کر اس میں مصنوعی اضافے کی کسی کو ہر گز اجازت نہیں دیں گے. 

وزیرِ اعظم کا کہنا تھا کہ ناجائز منافع خوروں، ذخیرہ اندوزوں کے خلاف کریک ڈاؤن کرکے رپورٹ پیش کی جائے،چینی کی کھپت اور رسد پر کڑی نظر رکھی جائے  جبکہ  متعلقہ حکام کو شوگر ملوں کے ساتھ چینی کی کھپت و رسد کی نگرانی کیلئے روابط مربوط کرنے کی بھی ہدایت کی، وزیرِ اعظم نے چاروں صوبوں کے چیف سیکریٹریز کو چینی کی مقررہ قیمت پر عوام کو فراہمی یقینی بنانے کی ہدایت کی. 

 وزیرِ اعظم نے مزید کہا کہ  ملک میں چینی کی وافر مقدار موجود ہے،مصنوعی طور پر بحران کی فضاء پیدا کرنے والوں کو قانون کے شکنجے میں لایا جائے،رمضان المبارک کے بابرکت مہینے میں عام آدمی کا مافیا کے ہاتھوں قطعاً استحصال نہیں ہونے دیں گے.  

یہ بھی پڑھیں :  بانی پی ٹی آئی کے خلاف سپریم کورٹ میں توہین عدالت کی درخواست سماعت کیلئے مقرر