سعودی سفارت کارکے خلاف پروپیگنڈہ: بنگلہ دیشی ملکہ حُسن گرفتار

(ویب ڈیسک)بنگلہ دیش کی معروف ماڈل، اداکارہ اور مس ارتھ بنگلہ دیش 2020 کی فاتح میگھنا عالم کو سعودی عرب کے ساتھ سفارتی تعلقات خراب کرنے کے الزام میں گرفتار کرلیا گیا۔

 میگھنا عالم کے والد بدر العالم نے الزام لگایاہے  کہ ان کی بیٹی کی گرفتاری ڈھاکہ میں سعودی سفیر کے ساتھ تعلقات کا نتیجہ ہے کیونکہ سعودی سفیر اور میگھنا ریلیشن شپ میں تھے اور میری بیٹی نے شادی کی پیشکش سے انکار کر دیا تھا کیونکہ سعودی سفیر پہلے سے شادی شدہ ہے اور انکے بچے بھی ہیں۔

میگھنا کے والد کا مزید کہنا تھا کہ جب میری بیٹی کو علم ہوا کہ وہ سفیر پہلے سے شادی شدہ ہے تو اُس نے سعودی سفیر کے گھر کال ملادی تھی اور اس کی بیوی سے بات بھی کی تھی۔

دوسری جانب میگھنا عالم کو گرفتاری کے بعد ڈھاکہ میں عدالت کے سامنے پیش کیا گیا، بعدازاں عدالتی حکم پر اُنہیں 30 دن کے لیے جیل بھیج دیا گیا،بتایا جارہا ہے کہ انہیں کشم پور جیل منتقل کیا گیا ہے۔

یہ اقدام ڈھاکہ میٹروپولیٹن پولیس کی درخواست پر اسپیشل پاورز ایکٹ 1974 کے تحت کیا گیا، جس کے تحت عوامی سلامتی اور قانون و نظم و ضبط کو یقینی بنانے کے لیے عدالتی احکامات کے بغیر گرفتار کرنے کی اجازت دی جاتی ہے۔

 میگھنا عالم 2019 میں مس یونیورس بنگلہ دیش مقابلے میں 18ویں نمبر پر آئی تھیں اور 2020 میں مس ارتھ بنگلہ دیش کا اعزاز حاصل کیاتھا، انہیں 10 اپریل 2025 کی رات گھر پر چھاپے کے دوران اُس وقت حراست میں لیا گیا جب وہ فیس بک لائیو کر رہی تھیں۔

بین الاقوامی خبر رساں ادارے اے ایف پی کے مطابق، گرفتاری سے قبل میگھنا عالم نے فیس بک پر متعدد بار دعویٰ کیا تھا کہ ایک غیر ملکی سفارت کار انہیں خاموش کرانے کی کوشش کر رہا ہے اور اس میں قانون نافذ کرنے والے ادارے بھی شامل ہیں۔

میڈیا رپورٹس کے مطابق میگھنا اپنی فیس بک لائیو اسٹریم کے دوران بھی سفیر سے اپنے تعلقات کی وضاحت پیش کررہی تھیں، تاہم اب یہ ویڈیو اور اس حوالے سے تمام سوشل میڈیا پوسٹس ان کے اکاؤنٹ سے ڈیلیٹ ہوچکی ہیں۔

یہ بھی پڑھیں:قتل کی دھمکی،سلمان خان نے جِم سے تصاویر شیئر کردیں

میگھنا کی گرفتاری کے بعد اُن کے اغواء کی افواہیں گردش کرنے لگی تھیں، تاہم حکام نے وضاحت جاری کردی کہ انہیں مبینہ طور پر ایسی معلومات پھیلانے کے الزام میں حراست میں لیا گیا ہے جو بنگلہ دیش کے سفارتی تعلقات کو نقصان پہنچا سکتی ہیں اور ممکنہ اقتصادی نقصان کا سبب بن سکتی ہیں۔

پولیس کا کہنا ہے کہ انہوں نے ایک اہم غیر ملکی شخصیت بالخصوص سعودی عرب کے ایک سفارت کار کے خلاف جھوٹی معلومات پھیلائیں، جن کا مقصد دونوں ممالک کے درمیان سفارتی تعلقات کو نقصان پہنچانا تھا۔

حکام کا دعویٰ ہے کہ میگھنا عالم کی سرگرمیاں ملک کے سفارتی تعلقات کے لیے خطرہ بن سکتی تھیں اس لیے ان کے خلاف کارروائی کی گئی۔

یہ بھی پڑھیں:نواز الدین صدیقی کی نئی فلم کا ٹیزر جاری،فلم کب ریلیز ہوگی؟

یہ واقعہ ایسے وقت میں پیش آیا جب بنگلہ دیش میں سفارتی تعلقات اور اندرونی سیاسی معاملات پر بین الاقوامی توجہ مرکوز ہے،میگھنا عالم کی گرفتاری پر انسانی حقوق کیلئے سرگرم سماجی کارکنوں اور سوشل میڈیا صارفین نے تشویش کا اظہار کیا ہے جبکہ حکام کا کہنا ہے کہ میگھنا کی گرفتاری کا مقصد عوامی سلامتی کو یقینی بنانا ہے، تاہم اس معاملے پر مزید تحقیقات جاری ہیں۔