سیف علی خان پر حملہ کرنے والا کون، سی سی ٹی وی فوٹیج سامنے آگئی
Stay tuned with 24 News HD Android App
(ویب ڈیسک) بالی وڈ اداکار سیف علی خان پر حملہ کرنے والے ملزم کی شناخت کرلی گئی ہے پولیس کا کہنا ہے کہ ملزم نے عمارت میں داخل ہونے کے لیے سیڑھی کا استعمال کیا،سی سی ٹی وی فوٹیج سامنے آگئی۔
بھارتی پولیس کے مطابق ممبئی پولیس نے ایک پریس کانفرنس میں تصدیق کی ہے کہ وہ ایک ملزم کی شناخت کرنے میں کامیاب ہو گئے ہیں۔
پولیس کا کہنا ہے کہ ملزم نے خان کے گھر میں داخل ہونے کے لیے عمارت میں لگی آگ کے ایمرجنسی راستے کی سیڑھیاں استعمال کیں اور اس کا مقصد گھر میں چوری کرنا تھا۔
ڈپٹی کمشنر آف پولیس ڈکشٹ گیڈم نے بتایا کہ تحقیقات سے پتہ چلا کہ ایک شخص سیف علی خان کے گھر میں داخل ہوا جہاں اس کا سامنا پہلے خان کے گھریلو ملازمین سے ہوا۔ تاہم جب سیف علی خان نے مداخلت کی کوشش کی تو اس شخص نے ان پر حملہ کر دیا۔
پولیس اس بات کی بھی تحقیقات کر رہی ہے کہ حملہ آور نے عمارت کی سیکیورٹی کو کس طرح نظرانداز کیا اور اس سلسلے میں سی سی ٹی وی فوٹیج کا معائنہ کیا جا رہا ہے۔
پولیس کا کہنا ہے کہ وہ ملزم کی گرفتاری کے لیے کوششیں کر رہے ہیں اور اس کیس پر 10 تفتیشی ٹیمیں کام کر رہی ہیں۔
رپورٹس کے مطابق سیف علی خان پر چاقو کے چھ وار کیے گئے ڈاکٹروں کا کہنا ہے کہ اداکار کو گہرے زخم آئے ہیں، جن میں سے ایک زخم ریڑھ کی ہڈی کے قریب اور دوسرا بائیں ہاتھ کی کلائی پر تھا، جس کی وجہ سے اداکار کی سرجری کی گئی۔ تاہم اب اداکار کی حالت خطرے سے باہر بتائی جا رہی ہے۔
میڈیا رپورٹس کے مطابق یہ واقعہ جمعرات کی رات تقریباً 2 بجے پیش آیا جب سیف علی خان کی ایک چور کے ساتھ ہاتھا پائی ہوئی اور وہ زخمی ہو گئے، جبکہ حملہ آور فرار ہو گیا۔ بعد ازاں انہیں لیلاوتی اسپتال میں داخل کرایا گیا۔
اس معاملے میں باندرہ پولیس نے ایک نامعلوم شخص کے خلاف ایف آئی آر درج کر کے تحقیقات شروع کر دی ہیں۔
اس حوالے سے بالی ووڈ کی مشہور اداکارہ کرینہ کپور کا بیان بھی سامنے آیا ہے جس میں ان کی ٹیم نے کہا کہ سیف علی خان اور کرینہ کپور کے گھر میں گزشتہ رات ڈکیتی کی واردات کی کوشش کی گئی جس دوران سیف علی خان کو شدید چوٹیں آئیں اور وہ اسپتال میں زیر علاج ہیں۔
کرینہ کپور کی ٹیم کی جانب سے مداحوں سے درخواست کی گئی ہے کہ وہ صبر سے کام لیں اور اس معاملے پر مزید قیاس آرائیاں نہ کریں کیونکہ پولیس اپنی تحقیقات کر رہی ہے۔
یہ بھی پڑھیں:تمام فنکاروں کیساتھ اچھی ہم آہنگی لیکن ماہرہ سے خاص رشتہ ہے،مومل شیخ