بھارتی گیند باز جسپریت بمراہ نے عمران خان کی مثال کیوں دی؟

(ویب ڈیسک) بھارتی کرکٹ ٹیم کے تیز گیند باز جسپریت بمراہ نے پاکستان کرکٹ ٹیم کے سابق کپتان عمران خان کی مثال دیتے ہوئے وضاحت پیش کی کہ فاسٹ بولر کیوں بہترین کپتان ثابت ہوتے ہیں۔

بھارتی کرکٹ ٹیم کے اٹیک بولر جسپریت بمراہ نے حال ہی میں بھارت کو ٹی ٹوئنٹی ورلڈ کپ 2024 جتوانے میں اہم کردار ادا کیا اور بہترین گیند بازی کے سبب وہ ٹورنامنٹ کے بہترین کھلاڑی قرار  پائے، بھارتی میڈیا کو دیے گئے ایک انٹرویو میں 30 سالہ بمراہ کا کہنا تھا مجھے لگتا ہے بولرز ہوشیار ہوتے ہیں کیونکہ انہیں بیٹر کو آؤٹ کرنا ہوتا ہے، بولرز کا کام مشکل ہوتا ہے اور وہ بلے کے پیچھے نہیں چھپتے۔

ان کا مزید کہنا تھا کہ بولرز فلیٹ وکٹ کے پیچھے نہیں چھپتے، ہم پر کافی زیادہ چیزیں انحصار کرتی ہیں اور جب کوئی میچ ہارا جاتا ہے تو مورد الزام بولرز کو ہی ٹھہرایا جاتا ہے، ہم نے پیٹ کمنز کی کپتانی دیکھی ہے، بچپن میں، میں نے وسیم اکرم اور وقار یونس کو بطور کپتان دیکھا تھا، کپل دیو نے ہمیں ورلڈ کپ جتوایا، اس کے علاوہ عمران خان نے پاکستان کو ورلڈ کپ جتوایا لہذا، گیند باز ہوشیار ہوتے ہیں۔

یہ بھی پڑھیں: پاکستانی فائٹر نے بھارتی حریف کو چاروں شانے چت کر دیا

بھارتی فاسٹ بولر نے مزید کہا کہ روہت شرما ان چند کپتانوں میں سے ایک ہیں جو بلے باز ہونے کے باوجود گیند بازوں کے لیے ہمدردی رکھتے ہیں، وہ کھلاڑیوں کے جذبات سمجھتے ہیں اور جانتے ہیں کہ کھلاڑی کس حال سے گزر رہا ہے، روہت سخت نہیں ہے، وہ رائے کُھل کر دیتا ہے، ایم ایس دھونی نے مجھے بہت تحفظ فراہم کیا، وہ منصوبہ بندی پر کم اور اپنی چھٹی حِس پر زیادہ بھروسہ کرتے ہیں۔