دبئی میں رومانوی فراڈ سے خاتون 12 ملین درہم سے ہاتھ دھو بیٹھی

(24 نیوز)یو اے ای میں سوشل میڈیا پر اپنی طرز کا انوکھا فراڈ ہوا جس میں خاتون 12 ملین درہم سے ہاتھ دھو بیٹھی، دبئی پولیس کے سائبرکرائم کے ڈائریکٹر کرنل سعید الھاجری نے سوشل میڈیا صارفین کو ’رومنٹک فراڈ ‘ کا شکار ہونے سے بچنے کی ہدایت کی۔

امارات الیوم کے مطابق کرنل الھاجری نے ’عرب کاسٹ‘ سے گفتگو کرتے ہوئے بتایا کہ سوشل میڈیا پر مختلف نوعیت کے فراڈ ہو رہے ہیں۔ حال ہی میں ایک یورپی معمر خاتون سے افریقی شخص نے رومنٹک فراڈ کر کے 12 ملین درہم ہتھیا لیے۔

خاتون اپنی تنہا زندگی سے اکتائی ہوئی تھی اس کی دوستی ایک افریقی شخص سے ہوئی جس نے خاتون کے جذبات سے فائدہ اٹھاتے ہوئے اسے اپنے بارے میں غلط معلومات مہیا کیں۔

کرنل الھاجری نے مزید بتایا کہ معمر خاتون کی جس دھوکے باز سے سوشل میڈیا پر دوستی ہوئی تھی اس نے خود کو دبئی میں مقیم مہذب اور پرکشش نوجوان ظاہر کیا۔ خاتون اس کی باتوں میں آ گئی اور زندگی بھر کی جمع پونجی جوکہ 12 ملین درھم تھی اسے منتقل کر دی۔

یورپی خاتون جب اس سے ملاقات کے لیے دبئی پہنچی تو معلوم ہوا کہ جو ایڈریس اس نے دیا تھا وہاں اس نام اور شکل کا کوئی شخص رہتا ہی نہیں تھا۔

دھوکے کا علم ہونے پر خاتون نے پولیس سے رابطہ کیا کیس سائبرکرائم کو منتقل کیا گیا جہاں سے تحقیقات کی تو معلوم ہوا کہ جس اکاؤنٹ کے ذریعے ان کا رابطہ تھا وہ دبئی سے نہیں بلکہ افریقہ سے آپریٹ ہوتا تھا۔

یہ بھی پڑھیں: نواب زاده جمال رئیسانی کی اپوزیشن لیڈر عمر ایوب پر تنقید