(ویب ڈیسک)جعل سازی پر مبنی ای میل حملوں کے ذریعے سرکاری اداروں، وزارتوں، ڈویژنز کو نشانہ بنانے کا انکشاف ہوا ہے۔
تفصیلات کے مطابق نیشنل کمپیوٹر ایمرجنسی رسپانس ٹیم نے سرکاری اداروں، وزارتوں کو جعل سازی پر مبنی ای میل حملوں سے محتاط رہنے کے لیے ایڈوائزری جاری کردی۔
ایڈوائزری میں کہا گیا ہے کہ منظم جعل ساز ای میل مہم کے ذریعے متعدد سرکاری اداروں کے ای میل سسٹم کو نشانہ بنایا جارہا ہے، فشنگ ای میلز کے ذریعے دھوکا دہی پر مبنی لنکس پر کلک کرنے سے سرکاری دستاویز کمپرومائز ہوسکتے ہیں، سرکاری ملازمین کو نشانہ بنانے کے لیے آئی پی ایڈریس اور کلاؤڈ انفراسٹرکچر سے فائدہ اٹھایا جارہا ہے۔
اس میں بتایا گیا ہے کہ حملہ آور سرکاری ملازمین کو نشانہ بنانے کے لیے دھوکا دہی والے ای میل ایڈریس استعمال کررہے ہیں، ای میل میں منسلک پی ڈی ایف اور لنکس دستاویز جمع کرنے کے لیے ڈیزائن کیے گئے ہیں، فشنگ لنکس کے ذریعے سرکاری ملازمین کے یوزر نام اور پاس ورڈ چرائے جارہے ہیں۔
یہ بھی پڑھیں: لاہور بورڈ امتحانات سکیشن کی بڑی غفلت سامنے آگئی
ایڈوائزری کے مطابق اسی کی روشنی میں نیشنل سرٹ نے سرکاری اداروں، وزارتوں، ڈویژنز اور ذیلی اداروں کو حملوں سے بچنے کے لیے سائبر سیکیورٹی بڑھانے کی سفارش کی ہے، سرکاری ادارے، وزارتیں اور ان کے ذیلی ادارے اپنے ای میل سیکیورٹی میں اضافہ کریں۔
نیشنل سرٹ نے مزید سفارش کی ہے کہ سرکاری ادارے سرکاری دستاویز کی محفوظ ہینڈلنگ کریں، سرکاری ادارے تھریٹ انٹیلیجنس شئیر کریں تاکہ سائبر حملوں کی روک تھام کی جا سکے۔