چیمپیئنز ٹرافی لوگو پر پاکستان کا نام غائب،شائقین حیران

 (24 نیوز)آئی سی سی کے بڑے ایونٹس میں شمار ہونے والی چیمپئنز ٹرافی کی میزبانی پر تمام ٹیموں کے لوگو پر پاکستان کا نام پرنٹ تھا جس کی سوشل میڈٰیا پر کافی چرچا تھی۔

لیکن بھارت اور بنگلہ دیش کے درمیان میچ کے دوران میزبان ملک کا نام غائب تھا، آئی سی سی نے براڈ کاسٹ میں ایونٹ لوگو پر پاکستان کا نام نہ ہونے پر اپنی غلطی تسلیم کرلی۔

جمعرات کو دبئی میں ہونے والے بھارت اور بنگلادیش کے چیمپیئنز ٹرافی میچ کے براڈ کاسٹ میں ایونٹ لوگو پر پاکستان کا نام نہیں لکھا گیا تھا جس پر شائقین سوال اٹھا رہے تھے۔

نیوزی لینڈ اور پاکستان کے مابین گزشتہ روز ہونے والے افتتاحی میچ کے براڈ کاسٹ میں لوگو پر پاکستان درج تھا تاہم اب آئی سی سی نے اس معاملے میں تکنیکی خرابی کا اعتراف کرلیا ہے۔

ترجمان آئی سی سی کا کہنا ہےکہ گرافکس کی غلطی تکنیکی وجہ سے ہوئی جو کل سے درست ہو جائے گی ، میچ کے دوران اس لوگو کو تبدیل کرنا ممکن نہیں تھا۔

ترجمان کے مطابق آئی سی سی کے سوشل میڈیا اکاؤنٹس پر میچ کے کلپس پر لوگو میں پاکستان کا نام موجود ہے، پاکستان کا نام صرف براڈ کاسٹ کے لوگو سے غائب رہا۔

یہ بھی پڑھیں : سینیٹ اجلاس جمعہ کو ہوگا، 25 نکاتی ایجنڈا جاری