غیر قانونی افغان باشندوں کے انخلا کا سلسلہ جاری

(24 نیوز)پاکستان میں مقیم غیر قانونی افغان شہریوں اور افغان سٹیزن کارڈ ہولڈرز کے انخلا کا سلسلہ حکومت کی مقرر کردہ ڈیڈلائن ختم ہونے کے بعد بھی جاری ہے۔

گزشتہ روز 20 اپریل کو مجموعی طور پر 3,387 مزید غیر قانونی افغان باشندوں کو باحفاظت طور پر ان کے وطن واپس بھیجا گیا۔

حکام کے مطابق اب تک مجموعی طور پر 9 لاکھ 79 ہزار 486 غیر قانونی افغان باشندے پاکستان چھوڑ چکے ہیں۔ انخلا کے اس عمل کو منظم اور پرامن رکھنے کے لیے حکومت پاکستان نے مکمل اقدامات کیے ہیں، جن میں باعزت واپسی کو یقینی بنانا اور انسانی وقار کا خیال رکھنا شامل ہے۔

حکومتی ترجمان کا کہنا ہے کہ اس عمل کے دوران کسی افغان شہری سے بدسلوکی نہیں کی جا رہی اور ان کی بنیادی ضروریات اور سہولیات کا بھی خاص خیال رکھا جا رہا ہے۔

مزید پڑھیں:شمالی وزیرستان: سکیورٹی خطرات کے باعث دوسرے روز بھی کرفیو نافذ 

واضح رہے کہ غیر قانونی طور پر مقیم افراد کے انخلا کی یہ مہم گزشتہ برس حکومت پاکستان کی جانب سے جاری کردہ احکامات کے بعد شروع کی گئی تھی، جس میں تمام غیر رجسٹرڈ غیر ملکیوں اور غیر قانونی افغان باشندوں کو رضا کارانہ طور پر وطن واپسی کی مہلت دی گئی تھی۔

انخلا کے اس عمل میں مقامی ضلعی انتظامیہ، قانون نافذ کرنے والے ادارے اور افغان حکام باہمی رابطے سے کام کر رہے ہیں تاکہ کسی قسم کا ناخوشگوار واقعہ پیش نہ آئے۔