تحریک انصاف آج لاہور میں عوامی طاقت کا مظاہرہ کرے گی

موجودہ حالات میں کاہنہ کا جلسہ تحریک انصاف کے لئے کئی حوالوں سے باعث اطمینان ہے۔ جہاں یہ پارٹی ایک کارنر میٹنگ تک نہیں تھی کر سکتی۔ پارٹی پرچم اور عمران خان کی تصویر کی نمائش عذاب کو دعوت دینے کے مترادف تھا۔ ایسے میں ایک ہی مہینے میں 2 جلسوں سے ان کے کارکنوں کا حوصلہ یقینا بڑھا ہو گا اور جہاں تک تعداد کی بات رہی تو میرے اندازے کے مطابق جلسے میں 30 ہزار کے لگ بھگ لوگ تھے جو انتہائی شارٹ نوٹس پر جمع ہوئے، البتہ اس بار فیملیز جو کہ تحریک انصاف کے جلسوں کا خاصا ہوتی ہیں، ہمیں اس طرح سے نظر نہیں آئیں اور اس کی بڑی وجہ خوف کا ماحول اور مقررہ وقت کے بعد جلسے پر کریک ڈاون کا خدشہ تھا، لیکن اس وقت یہ سب معنیٰ نہیں رکھتا، اگر کچھ واقعی معنیٰ رکھتا ہے تو یہ ہے کہ جلسہ کم از کم ہو تو گیا۔ خان کے نعرے لگے، تقاریر ہوئیں، کارکنان کا لہو گرمایا گیا، اسٹیبلشمنٹ اور عدلیہ کو للکارا گیا، یہ سب کافی ہے اورگھٹن کے اس ماحول میں تحریک انصاف اسے غنیمت سمجھے۔۔۔ اس سے تحریک کو مومنٹم ملے گا اور کارکنان وارم اپ ہوں گے۔

ضرورپڑھیں:پاکستان اسرائیل تعلقات؟یروشلم پوسٹ نے بھی عمران خان کو "مسیحا" قرار دیدیا
رہی بات 6 بجے جلسہ ختم اور وزیراعلیٰ علی امین گنڈاپور کے نہ پہنچنے کی تو میرے خیال سے یہ سب طے شدہ منصوبے کے مطابق تھا کیونکہ سٹیج پر موجود تمام رہنما عجلت میں نظر آئے اور 2،4 منٹ سے زیادہ کسی نے تقریر نہ کی۔ جنرل سیکرٹری سمیت تمام رہنما مقررہ وقت سے پہلے تقاریرمکمل کرچکے تھے، آخری تقریر چئیرمین بیرسٹر گوہر نے کی جو 5:58 پر ختم ہوئی، اس کے ساتھ ہی ساونڈ سسٹم والے نے اعلان کیا کہ اب چونکہ جلسے کا وقت مکمل ہو گیا ہے لہذا میں اپنا سسٹم بند کررہا ہوں ورنہ مجھے کون بچائے گا، یہ بھی منصوبے کا حصہ ہی لگ رہا تھا، کیونکہ تحریک کے رہنماؤں کو خدشہ تھا کہ اگروہ ازخود 6 بجے جلسہ ختم کرنے کا اعلان کریں تو شائد عوام اور کارکنان کو بزدلی کا تاثر جائے اور وہ انہیں کے خلاف ہو جائیں۔
اس کے بعد علی امین جلسہ ختم ہونے کے تقریباً 2 گھنٹے بعد رنگ روڈ پر پہنچے اور گاڑی کے سن روف سے نکل کر چند نعرے لگائے اور وہیں سے واپس روانہ ہو گئے،ان کے تاخیر سے پہنچنے کی وجہ بھی یہ نظر آرہی ہے کہ اگر وہ جلسہ میں شرکت کرتے تو انتظامیہ کی شرط کے مطابق انہیں اسلام آباد جلسہ میں کی گئی تقریر پر معافی مانگنا پڑتی، (لاہور کا جلسہ پابندیوں کے ساتھ مشروط تھا،، 43 شرائط میں دوسری ہی شرط علی امین کی معافی تھی) لیکن دوسری جانب انہوں نے اٹک پل عبور کرکے لیگی رہنماوں کی دھمکیوں اور چیلنج کو بھی پورا کردکھایا۔۔۔  لہذا انہوں نے سانپ بھی مار دیا اور لاٹھی بھی بچا لی۔
کل ملا کر یہ بات عیاں ہے کہ مقررہ وقت پر جلسے کا اختتام اور علی امین کا بروقت نہ پہنچنا سوچے سمجھے اور طے شدہ منصوبے کا حصہ تھا،ہاں البتہ یہ بات ابھی واضح ہونا باقی ہے کہ آیا یہ تحریک انصاف کی اپنی حکمت عملی تھی یا حکومت اور شہر کی انتظامیہ کے ساتھ بیک ڈور چینل کے ذریعے انہوں نے اس منصوبے پر اتفاق کیا تھا۔

نوٹ:بلاگر کے ذاتی خیالات سے ادارے کا متفق ہونا ضروری نہیں۔ایڈیٹر 

(24نیوز)سیاسی ماحول گرم،لاہور میں آج ہونے والے پاکستان تحریک انصاف کے جلسے کیلئے کارکنوں کی آمد کا سلسلہ جاری ہے۔

حکومت پنجاب کی جانب سے پاکستان تحریک انصاف کو مویشی منڈی کاہنہ میں جلسے کی اجازت دی گئی ہے، انتظامیہ کی جانب سے پی ٹی آئی کو سہ پہر 3 بجے سے شام 6 بجے تک کا وقت گیا ہے،جلسہ گاہ کی جانب جانے والے تمام راستے کھلے ہیں، جلسے کیلئے اسٹیج تیار کر لیا گیا ہے اور کرسیاں لگا دی گئی ہیں، جلسہ گاہ اور اطراف میں سکیورٹی کے سخت انتظامات کیے گئے ہیں۔

جلسے کیلئے مختلف شہروں سے پاکستان تحریک انصاف کے قافلے لاہور کی جانب رواں دواں ہیں، خیبر پختونخوا سے پی ٹی آئی کا مرکزی قافلہ وزیر اعلیٰ علی امین گنڈا پور کی قیادت میں لاہور پہنچے گا۔

لاہور کی ضلعی انتظامیہ اور پی ٹی آئی کے درمیان طے پانے والے معاہدے میں شامل ہے کہ وزیراعلیٰ خیبر پختونخواعلی امین گنڈا پور 8 ستمبر کو اسلام آباد میں کی گئی تقریر پر معافی مانگنا ہو گی، ریاست یا اداروں کے خلاف نعرے بازی اور بیان بازی نہیں کی جائے گی،کسی اشتہاری یا مجرم کا آڈیو یا ویڈیو پیغام نشر نہیں جائے گا۔

ذرائع کی جانب سے دعویٰ کیا گیا ہے کہ پی ٹی آئی کے لاہور جلسے کے لیے کے پی حکومت کے سرکاری وسائل کا استعمال بھی کیا جا رہا ہے، ریسکیو کی گاڑیاں اور کرینیں بھی ساتھ لائی جا رہی ہیں۔

(ملک محمد اشرف)لاہور ہائیکورٹ کے تین رکنی بنچ کے روبرو  پی ٹی آئی کو جلسے کی اجازت کی درخواست پر  سماعت،عدالت  نے ڈی سی کو پانچ بجے تک عالیہ حمزہ کی جلسے کے متعلق درخواست پر فیصلہ کرنے کا حکم  دے دیا ہے،عدالت نے قرار دیا کہ ڈپٹی کمشنر فیصلہ کرتے ہوئے کسی رپورٹ سے مرعوب نہ ہوں،عدالت نےپی ٹی آئی کا جلسہ رکوانے سے متعلق درخواست ناقابل سماعت قرار دیدی۔
 لاہور ہائیکورٹ کےجسٹس فاروق حیدر کی سربراہی میں فل بینچ نے سماعت کی ,عالیہ حمزہ نے جلسہ کی اجازت نہ دینے کے اقدام کو چیلنج کیا ہے، عدالتی حکم پر چیف سیکرٹری زاہد اختر زمان، آئی جی پنجاب ڈاکٹر عثمان انور ، کمشنر ، ڈی سی لاہور عدالت میں پیش ہونے ، سرکاری وکیل نے عدالت کو بتایا کہ عالیہ حمزہ اور امتیاز شیخ نے جلسے کی اجازت کیلئے کوئی خط نہیں لکھا، استدعا ہے کہ عالیہ حمزہ کی درخواست ناقابل سماعت قرار دے کر مسترد کی جائے، اکمل خان باری نے اگست کے مہینے میں جلو پارک میں جلسے کی اجازت مانگی تھی، پی ٹی آئی رہنماء کی مجوزہ جگہ جلو پارک میں جلسے کی اجازت نہیں دی گئی تھی، 8 ستمبر کے جلسے میں پی ٹی آئی قیادت نے وفاقی و صوبائی حکومت، عدلیہ اور صحافیوں کے بارے گالم گلوچ کی زبان استعمال کی، تحریک انصاف کے وکیل نے کہا 14 اگست کو جلسے کی اجازت کی درخواست دی گئی۔

 جسٹس علی ضیاء باجوہ نے استفسار کیا عالیہ حمزہ پی ٹی آئی میں کیا عہدہ ہے؟ اشتیاق اے خان ایڈوکیٹ نے جواب دیا عالیہ حمزہ نے این اے 118 سے الیکشن لڑا، عالیہ حمزہ پی ٹی آئی سنٹرل ایگزیکٹو کمیٹی کی رکن ہیں،  جسٹس  محمد طارق ندیم نے استفسار کیا کیا انہیں پارٹی کی طرف سے جلسے کی اجازت کیلئے کوئی اختیار دیا گیا؟  وکیل درخواست گزار نے کہا عالیہ حمزہ جلسے کے انتظامات کمیٹی کی ممبر ہیں، عدالت کے استفسار پر ڈپٹی کمشنر نے عالیہ حمزہ کی اجازت نامے سے متعلق کسی بھی درخواست  وصولی کی تصدیق نہیں کی۔

ضرورپڑھیں:جہاں روکا گیا، وہیں جلسہ ہوگا،پی ٹی آئی نےحکمت عملی تیار کرلی

جسٹس فاروق حیدر نے ریمارکس دئیے عالیہ حمزہ عدالت کے سامنے نہیں، جلسے کی اجازت کے درخواست گزار عمر ایوب بھی موجود نہیں، عدالت نے اگر جلسے سے متعلق کوئی بیان حلفی لینا ہو تو کیا کریں گے؟   اشتیاق اے خان ایڈوکیٹ نے جواب دیا عالیہ حمزہ گھر میں قید ہیں، عدالت جب حکم کرے گی عالیہ پیش ہو جائیں گی، جسٹس فاروق حیدر نے ریمارکس دئیے ،عالیہ حمزہ جلسے کی اجازت نامے کی درخواست گزار ہی نہیں ہیں تو عدالت کیا حکم دے گی؟ عالیہ حمزہ ابھی ڈی سی کو جلسے کی اجازت کی درخواست دیں، ہم دوبارہ سماعت کریں گے، اس کیس کا فیصلہ آج ہی ہو گا۔

جسٹس فاروق حیدر کی سربراہی میں دوبارہ سماعت ہوئی تو  تین رکنی بنچ میں شامل جسٹس محمد طارق ندیم نے دوران سماعت ریمارکس دئیے کہ یہ ملک ہے تو ہم سب ہیں، ماضی قریب میں دوسری طرف سے یہی باتیں آتی تھیں،،حکومتیں آتی جاتی رہتی ہیں، آپ کل  بھی ادھر تھے آج بھی ادھر ہیں اور آئی جی بھی ادھر ہیں، کیوں نہ کوئی ایک جگہ مختص کر دی جائے کہ جلسہ ایک مخصوص جگہ پر ہی ہوگا، ہر کسی نے کسی عہدے ہر نہیں رہنا، کوئی ایسا کریڈٹ لے لیجئے کہ یاد رکھا جائے 2 سربراہوں نے یہ فیصلہ کیا، جب جلسے کی بات ہوتی ہے تو ملک جام ہو جاتا ہے۔

 جسٹس محمد طارق ندیم نے مزید ریمارکس دیتے ہوئے کہا کوئی جنازہ جا رہا ہوتا ہے اس میں رکاوٹ آتی ہے، بیمار ہسپتال نہیں پہنچ پاتے، ہم دنیا کو کیا پیغام دے رہے ہیں؟ دنیا کہاں کی کہا چلی گئی ہم آج بھی اظہار رائے کی آزادی میں پھنسے ہوئے ہیں۔

اشتیاق اے خان ایڈوکیٹ نے کہا عالیہ حمزہ کی درخواست میرے پاس ہے، امتیاز شیخ کی درخواست پہلے ہی ڈی سی کے پاس موجود ہے، جسٹس فاروق حیدر نے ریمارکس دئیے غیر قانونی حراساں کرنے کا معاملہ ناقابل برداشت ہے، عدالت نے اشتیاق اے خان ایڈوکیٹ سے استفسار کیا کیا پی ٹی آئی کے کسی عہدے دار کو حراساں کیا گیا؟ آئی جی ڈاکٹر عثمان انور نے جواب دیا کسی کو غیر قانونی حراساں نہیں کیا گیا،  اور نہ آئندہ کسی کو غیر قانونی حراساں کیا جائے گا، عالیہ حمزہ اور امتیاز شیخ کی جانب سے عدالت میں ڈی سی کو جلسے کی اجازت کی درخواست دے دی گئی، جس پر عدالت نے ڈی سی کو ہدایت کی کہ وہ عالیہ حمزہ کی درخواست پر 5 بجے تک فیصلہ کریں ۔عدالت نے پی ٹی آئی کا جلسہ روکنے کی متفرق درخواست بھی مسترد کر دی۔