رانا ثنا اللہ کا سندھ کی 3بڑی سیاسی جماعتوں سے رابطہ، متنازع کینالز سے متعلق مذاکرات کی پیشکش

(عثمان خان،حیدر خان)وزیراعظم کے مشیر رانا ثنا اللہ نے سندھ کی 3بڑی سیاسی جماعتوں سے رابطہ کیا اور متنازع کینالز سے متعلق مذاکرات کی پیش کش کی۔

تفصیلات کے مطابق رانا ثنا اللہ نے جےیوآئی سندھ کے سیکرٹری جنرل علامہ راشد محمود سومرو سے رابطہ کیا اوردریائے سندھ پر متنازعہ کینالز سے متعلق جےیوآئی کو مذاکرات کی پیشکش کی،علامہ راشد محمود سومرو نے مشاورتی عمل میں قوم پرست جماعتوں کو شامل کرنے کا مطالبہ کیا۔

علامہ راشد سومرو نے کہاکہ سندھ کی سیاسی جماعتوں اور وکلا کو بھی اعتماد میں لیا جائے،مذاکرات سے پہلے متنازعہ کینالز پر فوری طور پر کام روکا جائے، سندھ کے پانی پر کسی قسم کا سمجھوتہ قبول نہیں۔ 

دریں اثنا رانا ثنا اللہ نے قومی عوامی تحریک کے سربراہ ایاز لطیف پلیجو سے گفتگو کرتے ہوئے کہاکہ ایاز لطیف پلیجو صاحب وزیراعظم شہباز شریف صاحب آپ سے ملنا چاہتے ہیں،ایاز لطیف پلیجو نے کہاکہ چھ کینالوں کے معاملے پر سارے سندھ میں غصّہ اور بے چینی موجود ہے،کینال بنانے کا فیصلہ کر کے سندھ کے ساتھ شدید ناانصافی کی گئی ہے۔

رانا ثنا اللہ نے کہاکہ اس مسئلے کو وزیراعظم صاحب آپ سے گفتگو کے ذریعے حل کرنا چاہتے ہیں،سندھ کی مختلف جماعتوں کے نمائندوں کا کوئی وفد بنائیں گے تو ان سے بھی بات چیت کی جا سکتی ہے۔

قومی عوامی تحریک کے سربراہ نے کہاکہ آپ فوراً کینالوں کا فیصلہ واپس لیں تو مسئلہ حل ہو سکتا ہے،سندھ اس وقت سارے فیصلے مشترکہ مشاورت کے طور پر کر رہا ہے،سندھ کی ساری سیاسی جماعتوں کا مشترکہ فیصلہ ہے کہ پہلے کینالوں کا فیصلہ واپس لیا جائے۔

وزیراعظم کے مشیر برائے سیاسی امور رانا ثناء اللہ نے صدر سندھ یونائیٹڈ پارٹی اور کنوینر دریائے سندھ بچاؤ تحریک سید زین شاہ سے فون پر رابطہ کیا ،رانا ثنا اللہ نے  کینالوں اور کارپوریٹ فارمنگ کے مسئلے پر سید زین شاہ کو مذاکرات کی پیشکش کرتے ہوئے کہاکہ اس مسئلے پر وزیراعظم شہباز شریف آپ سے ملاقات کرنا چاہ رہے ہیں۔

سید زین شاہ نے کہا کہ ہم دریائے سندھ بچاؤ تحریک میں شامل جماعتوں، وکلاء ایکشن کمیٹی، آبادگاروں اور اپنے اتحادیوں سے مشاورت کر کے آگاہ کریں گے، جب تک کینالوں اور کارپوریٹ فارمنگ کا منصوبہ واپس لینے کا اعلان نہیں کیا جاتا جب تک ہماری جدوجہد جاری رہے گی۔

یہ بھی پڑھیں:افسوسناک خبر!فاسٹ باؤلر رومان رئیس کی ہمشیرہ انتقال کر گئیں