دبئی کے ویزے کیلئے ضروری ہدایات جاری

(24 نیوز)متحدہ عرب امارات کے ویزا کے حوالے سے نئی ہدایات جاری کر دی گئی ہیں, یو اے ای کے سفارتخانے کے ترجمان کے مطابق ویزا فیس فی فرد 69 امریکی ڈالر مقرر کی گئی ہے اور تمام ویزوں کے لیے درخواستیں آن لائن جمع کرانا لازمی ہوگا۔

ترجمان نے مزید کہا کہ ویزا اپلائی کرنے کے بعد ایک نوٹیفکیشن جاری کیا جائے گا، اور درخواست دہندگان کو لازمی دستاویزات اپنے ساتھ رکھنا ہوں گی،درخواست دہندگان کے بینک سٹیٹمنٹ میں کم از کم 5 ہزار امریکی ڈالر یا اس کے مساوی رقم ہونا ضروری ہے۔

مزید پڑھیں:بھارتی یاتریوں کے 154 رکنی گروپ کو پاکستانی ویزے جاری

 سفارتخانے میں درخواست جمع کرواتے وقت ہوٹل یا رہائش کا ثبوت فراہم کرنا لازمی ہوگا اور اس کے ساتھ ساتھ تصدیق شدہ ریٹرن ٹکٹ بھی دکھانا ضروری ہے،ویزے کے لیے پاسپورٹ کی مدت کم از کم 6 ماہ ہونا لازمی ہے اور ویزا فیس مخصوص الفلاح بینک اکاؤنٹ میں جمع کروانی ہوگی۔

بچوں کے ویزا کے حوالے سے بھی نئی ہدایات جاری کی گئی ہیں، 5 سال سے کم عمر کے بچوں کو ویزا سینٹر جانے کی ضرورت نہیں، جبکہ 6 سے 15 سال کی عمر کے بچوں کی تصویر ویزا سینٹر میں لی جائے گی،15 سال یا اس سے زیادہ عمر کے بچوں کو ویزا سینٹر آنا لازمی ہوگا، ترجمان کے مطابق بائیومیٹرک تصدیق اور ویزا پراسیسنگ کا عمل ویزا سینٹر میں مکمل کیا جائے گا۔