(ویب ڈیسک )صائم ایوب کی آئی سی سی چیمپئنز ٹرافی میں شرکت مشکوک ہو نے سے ان کے متبادل کے طور پر غیر متوقع کھلاڑی کا نام سامنے آگیا۔
قومی سلیکٹرز ان کی جگہ ٹیسٹ کپتان شان مسعود کو آزمانے پر غور کررہے ہیں لیکن اس کا انحصار ویسٹ انڈیز کے خلاف آخری ٹیسٹ میں شان مسعود کی کارکردگی پر ہے جبکہ امام الحق بھی ایک آپشن ہیں۔
ذرائع کا کہنا ہے کہ عبداللہ شفیق کی خراب کارکردگی کے بعد سلیکٹرز ون ڈے فارمیٹ میں صائم ایوب کی جگہ شان مسعود کو موقع دینے پر غور کررہے ہیں کیوں کہ وہ 50 اوور کی کرکٹ میں لمبی اننگز کھیلنے کی صلاحیت رکھتے ہیں۔
مزیدپڑھیں:بابر اعظم زیادہ مقبول یا شاہد آفریدی؟سابق کپتان کااہم دعویٰ سامنے آگیا
شان مسعود نے 9 ون ڈے انٹر نیشنل میچز میں ایک نصف سنچری کی مدد سے 163 رنز 18 کی اوسط سے بنائے ہیں، شان نے آخری بار نیوزی لینڈ کے خلاف 2023 میں ون ڈے میچ کھیلا تھا۔
شان مسعود انگلش سیزن کے ساتھ ساتھ پاکستان میں بھی ون ڈے کرکٹ کھیلتے ہیں ، ان کے علاوہ فخر زمان کی ٹیم میں واپسی یقینی ہے جب کہ شاداب خان کی شمولیت کے امکانات نہ ہونے کے برابر ہیں۔
ایک ہفتے میں سلیکٹرز پاکستان میں ہونے والی تین قومی سیریز کیلئے ٹیم کا اعلان کریں گے، ممکنہ طور پرتین ملکی سیریز کھیلنے والی پاکستانی ٹیم ہی چیمپئنز ٹرافی میں شریک ہوگی۔
مزید پڑھیں:صائم ایوب کی انجری:قومی ٹیم کے اعلان میں مسلسل تاخیر
صائم ایوب اس ماہ کے آخر تک انگلینڈ میں رہیں گے جہاں میڈیکل پینل کی ہدایت پر ان کا ری ہیب بھی جاری ہے، فروری کے شروع میں ان کی وطن واپسی ہوسکتی ہے لیکن انہیں کرکٹ میں واپس لانے کیلئے جلد بازی سے گریز کیا جارہا ہے۔
آئی سی سی چیمپئنز ٹرافی کے لیے سلیکٹرز کے درمیان ون ڈے اسکواڈ کو حتمی شکل دینے کے لیے مشاورت جاری ہے۔
ذرائع نے بتایا ہے کہ چیمپئنز ٹرافی اسکواڈ سے آؤٹ آف فارم عبداللّٰہ شفیق اور عثمان خان کے ڈراپ ہونے کا امکان ہے۔
مزید پڑھیں:قومی کرکٹر حسیب اللہ خان انجری سے صحت یاب ہوگئے
امام الحق اور حسیب اللہ کے ناموں پر بھی غور کیا جا رہا ہے، محمد رضوان، بابر اعظم، سلمان علی آغا، طیب طاہر اور عرفان خان کی اسکواڈ میں شمولیت کا امکان ہے۔ اس کے علاوہ محمد حسنین، نسیم شاہ، شاہین آفریدی، حارث رؤف، کامران غلام، ابرار احمد اور سفیان مقیم بھی اسکواڈ کا حصہ ہو سکتے ہیں۔
پاکستان کے علاوہ چیمپئنز ٹرافی کی تمام ٹیموں نے اسکواڈز کا اعلان کردیا ہے جب کہ پاکستان بھی آئی سی سی کو ابتدائی سکواڈ کے نام بھجوا چکا ہے۔
واضح رہے کہ میگا ایونٹ کے لیے 11 فروری تک حتمی اسکواڈ کا لازمی اعلان کرنا ہے۔ پاکستان، جنوبی افریقا اور نیوزی لینڈ کے درمیان سہ فریقی سیریز کا پہلا میچ 8 فروری کو ہو گا۔