دنیا کی امیر ترین شخصیات کی فہرست جاری

(ویب ڈیسک) نئے سال کے ساتھ دنیا کے امیرترین ارب پتی شخصیات کی فہرست جاری کردی گئی ہے، فوربز کی امیر ترین ٹاپ شخصیات میں ایلون مسک، جیف بیزوز اور مارک زکربرگ شامل ہیں۔

فوربز کی رپورٹ کے مطابق دنیا بھر میں دولت کے اضافے میں 500 امیر ترین افراد کی ذاتی دولت میں بے پناہ اضافہ ہوا اور ایک مثالی سنگ میل عبور کرلیا ہے،ان افراد میں ایلون مسک، مارک زکربرگ اور جینسین ہوانگ کی مجموعی دولت 10 ٹریلین ڈالر ہے اور بتایا گیا ہے اس دولت کو امریکی ٹیکنالوجی  سٹاک سے جوڑا جاسکتا ہے کیونکہ مذکورہ امیر ترین افراد کی دولت میں اضافے کا ایک اہم سبب یہ ہے۔

ٹیکنالوجی کے شعبے کے سرفہرست ناموں میں لیری الیسن، جیف بیزوز، مائیکل ڈیل اور گوگل کے شریک بانی لیری پیج اور سیرگے برین شامل ہیں،ٹیکنالوجی کے ان 6 سرفہرست ناموں کا 1.5 ٹریلین ڈالر اضافے میں مجموعی حصہ 600 ارب ڈالر ہے۔

فوربز کی 2025ء کی امیر ترین شخصیات کی فہرست کے ساتھ ان ممالک کے نام بھی شامل کئے گئے ہیں جہاں سب سے زیادہ دولت میں اضافہ ہوا ہے یا ان ممالک سے تعلق رکھنے والے افرد کی دولت سب سے زیادہ ہے۔

ان ممالک میں امریکا 813 ارب ڈالر کے ساتھ پہلے چین 473 ارب ڈالر کے ساتھ دوسرے نمبر پر ہے، اسی طرح بھارت نے 200 ارب ڈالر کے ساتھ تیسری پوزیشن حاصل کرلی ہے۔

فوربز نے 2025ء کیلئے درج ذیل شخصیات کو دنیا کے 10 امیرترین افراد کی فہرست میں شامل کیا ہے، امریکا سے تعلق رکھنے والے ایلون مسک کو فوربز نے پہلے نمبر پر رکھا ہے اور ان کی دولت کا حجم 733.9 ارب ڈالر ہے، ان کی دولت کا بنیادی ذریعہ الیکٹرک کار بنانے والی کمپنی ٹیسلا اور سپیس ایکس ہے۔

ایلون مسک گزشتہ برس 400 ارب ڈالر کی دولت بنانے والی شخصیت بننے کا ریکارڈ بناچکے ہیں اور سپیس ایکس کی ویلیو 350 ارب ڈالر بتائی گئی تھی، امریکا کے صدر ڈونلڈ ٹرمپ کی مہم میں بھرپور حصہ لینے والے مسک کی دولت میں یکم دسمبر کے بعد بڑا اضافہ ہوا ہے اور اس کا اندازہ تقریباً 91 ارب ڈالر لگایا گیا ہے۔

مسک کی کمپنی  سپیس ایکس دنیا بھر میں نجی کمپنیوں میں سب سے امیرترین کمپنی کی پوزیشن پر آگئی ہے،ایلون مسک کی دیگر کمپنیوں میں ٹیسلا، سوشل میڈیا کمپنی ایکس، اے آئی کمپنی ایکس اے آئی اور بورنگ بھی شامل ہیں، جو ان کی اربوں ڈالر دولت میں روز بروز حیران کن اضافے کا باعث بن رہی ہیں۔

امریکا کے کاروباری جیف بیزوز 239.4 ارب ڈالر کے ساتھ دوسرے نمبر پر ہیں اور ان کی دولت کا محور امیزون ہے تاہم ان کی دولت کا حجم ایلون مسک کے مقابلے میں تقریباً نصف ہے۔

فیس بک کے ذریعے دنیا میں سماجی رابطوں میں انقلاب برپا کرنے والے مارک زکربرگ کا تعلق بھی امریکا سے ہے اور وہ 211.8 ارب ڈالر دولت کے ساتھ دنیا میں تیسرے نمبر پر ہیں، مارک زکربرگ کی دولت کی بنیاد فیس بک ہے، جو آج بھی دنیا بھر میں سماجی رابطوں کی مقبول ویب سائٹ ہے۔

فوربز کی فہرست میں چوتھے نمبر پر امریکا کے لیری الیسن ہیں، اوریکل کے مالک کی دولت 204.6 ارب ڈالر ہے اور اوریکل سے ہی ان کی دولت میں بے پناہ اضافہ ہوا ہے۔

دنیا کے امیر ترین افراد کی فہرست میں پہلے 4 نمبروں کے بعد پانچواں نام فرانس کے برنارڈ آرنلٹ کا ہے، ان کی فیملی کی دولت ایل وی ایم ایچ کمپنی سے 181.3 ارب ڈالر تک پہنچ چکی ہے، فہرست میں چھٹے نمبر پر امریکا گوگل کے بانی لیری پیج 161.4 ارب ڈالر دولت کے ہیں، ساتواں نمبر امریکا کے سیرگی برین کا ہے، گوگل کے شریک بانی کی دولت 154.0 ارب ڈالر ہے، آٹھویں نمبر پر وارن بوفیٹ ہیں، جن کی کمپنی بریکشائر ہیتھاوے کی مدد سے ان کی دولت 146.2 ارب ڈالر ہے۔

مائیکروسافٹ سے جڑے سٹیو بالمر بھی امریکی شہری ہیں اور دنیا کے دولت مند افراد میں ان کا نمبر 9 ہے، مائیکرو سافٹ کمپنی ان کی دولت کی بنیاد ہے اور دولت کا حجم 126 ارب ڈالر ہے۔

فوربز کی 2025ء کی دنیا کے امیرترین افراد کی فہرست کے 10 ویں نمبر پر امریکا سے تعلق رکھنے والے جین سین ہوانگ ہیں، ان کی کمائی کا باعث بننے والی کمپنی نیویڈیا (این وی آئی ڈی آئی اے) ہے جس سے ان کی دولت 120.2 ارب ڈالر ہوچکی ہے، ہوانگ دنیا کے امیر ترین افراد کی فہرست میں پہلی مرتبہ 10 ویں نمبر پر آگئے ہیں۔

یہ بھی پڑھیں: امریکامیں برفانی طوفان،الاباما میں 143 سالہ ریکارڈ ٹوٹ گیا