بجلی سستی!عوام کیلئے بڑی خبر آ گئی

(24نیوز)حکومت پاکستان سے نظر ثانی معاہدوں کے بعد آئی پی پیز نے بجلی سستی کرنے کیلئے نیپرا سے رجوع کر لیا۔

مہنگی بجلی کے ستائے پاکستانی شہریوں کیلئے اچھی خبر آ گئی ہے کہ حکومت سے نظر ثانی معاہدوں کے بعد آئی پی پیز نے بجلی سستی کرنے کیلئے نیپرا سے رجوع کر لیا ہے۔

سی پی پی اے اور 7 آئی پی پیز کی درخواست پر نیپرا میں کل سماعت ہو گی۔ درخواست 2002 کی پاور پالیسی کے تحت لگنے والے آئی پی پیز نے جمع کرائی ہے۔

درخواست دائر کرنے والوں میں نشاط چونیاں پاور، نشاط پاور، نارووال انرجی لمیٹڈ، لبرٹی پاور ٹیک لمیٹڈ، اینگرو پاور جن قادرپور لمیٹڈ، سیفائر الیکٹرک پاور لمیٹڈ اور سیف پاور لمیٹڈ شامل ہیں۔

وفاقی کابینہ نے رواں سال جنوری میں مذکورہ 7 آئی پی پیز کے ساتھ نظرثانی معاہدوں کی منظوری دی تھی۔

نیپرا سماعت میں روپے اور ڈالر کی قدر کے فرق کے طریقہ کار پر نظرثانی کے معاملے کا جائزہ لے گا۔ اس کے علاوہ سماعت میں ٹیک اینڈ پے سسٹم کے تحت ادائیگیوں کے طریقہ کار اور ای پی سی لاگت کے 0.90 فیصد انشورنس کیپ پر نظرثانی کا معاملہ بھی زیرغور آئے گا۔

یہ بھی پڑھیں:ون ڈے سیریز؛پاکستانی نژاد شہری نیوزی لینڈ سکواڈ میں شامل