(24نیوز ) گورنرہاؤس پشاورمیں یوم پاکستان کے موقع پرتقسیم اعزازات کی پروقار تقریب منعقدہوئی جس میں چیئر لفٹ حادثے میں سکول کے بچوں کو بچانے والے شانگلہ کے نوجوان کو بھی اعلیٰ سول ایوارڈ سے نوازا گیا۔
تقریب میں ایئر وائس مارشل، ایئرآفیسرکمانڈنگ ناردرن ائیرکمانڈ تیمور اقبال(ستارہ امتیازملٹری)،سیکرٹری محکمہ انتظامیہ شاہد سہیل سمیت اعزازات وصول کرنیوالوں کے عزیز و اقارب نے بڑی تعداد میں شرکت کی۔
گورنرخیبرپختونخوا فیصل کریم کنڈی نے صدراسلامی جمہوریہ پاکستان کی طرف سے صوبے کی 7 شخصیات کو صدارتی سول اعزازت سے نوازا جس میں 4 شخصیات کو تمغہ شجاعت اور 3 شخصیات کو تمغہ امتیاز کے صدارتی سول ایوارڈ سے نوازا۔
تقریب میں گورنر نے سعید خان (مرحوم)کو بہادری کے اعتراف میں بعد از وفات تمغہ شجاعت سے نوازا جبکہ صاحب خان کو ان کی بہادری کے اعتراف میں تمغہ شجاعت، ملک محمود جان (شہید) اور سمیع اللہ خان (شہید) کو انکی بہادری کے اعتراف میں بعد از شہادت صدارتی اعزاز تمغہ شجاعت سے نوازا گیا۔
گورنر خیبر پختونخوا نے ڈاکٹر عاکف اللہ خان کو شعبہ طب، ارشد عزیز ملک کو شعبہ صحافت اوربختیار احمد خٹک کوشعبہ گلوکاری میں گراں قدر خدمات پر صدارتی سول ایوارڈ تمغہ امتیاز سے نوازا۔
یہ بھی پڑھیں: ذوالفقار علی بھٹو کو بعد از شہادت اعلیٰ ترین سول اعزاز ملنا اہم سنگ میل ہے،بلاول بھٹو