(ویب ڈیسک)معروف اداکارہ اور ٹی وی میزبان ندا یاسر نے اعتراف کیا ہے کہ انہوں نے بغیر تصدیق کے ایک ساتھی اداکارہ کی شادی کا اعلان کردیا تھا جس پر انہیں افسوس ہے۔
ندا یاسرنے اپنے شو میں بتایا کہ کچھ روز قبل انہوں نے کسی سلیبرٹی سے ایک اداکارہ کی شادی سے متعلق بات سنی تھی جس کی انہوں نے تصدیق کیے بغیر ہی اپنے شو میں اناؤنسمنٹ کردی جو انہیں نہیں کرنی چاہیئے تھی۔
ندایاسرنے کسی کا نام لیے بغیر معذرت کرتے ہوئے تسلیم کیا کہ انہوں نے غلطی سے ایک اداکارہ کو نئی نویلی دلہنوں میں شامل کر کے ان کی شادی کی مبارکباد دی۔
معروف میزبان نے بتایا کہ انہیں اُس اداکارہ کا فون آیا اور کہا کہ میری تو شادی نہیں ہورہی اور آپ نے اعلان کردیا جس پر انہیں افسوس ہوا کیونکہ لڑکیوں کی شادی سے متعلق بات ان کیلئے مسئلہ بن جاتی ہے، کسی کی سنی سنائی باتوں پر یقین نہیں کرنا چاہیے۔
یہ بھی پڑھیں:جیکولین فرنینڈس کیلئے مبینہ بوائے فرینڈنے بالی جزیرے پر زمین خرید لی
ندا یاسر کی یہ اعترافی ویڈیو سوشل میڈیا پر وائرل ہوگئی ہے جسے سوشل میڈیا صارفین ان کی پرانی وائرل ویڈیو جس میں انہوں نے اداکارہ انمول بلوچ کی شادی کے بارے میں بتایا تھا، سے جوڑ رہے ہیں۔