(24نیوز ) پاکستان کرکٹ بورڈ (پی سی بی) کے چیئرمین محسن نقوی کے ساتھ میٹنگ کے دوران مینٹورز نے چیمپئنز ٹی 20 کپ میں بہترین کھلاڑیوں کی نشاندہی کردی، چیئرمین پی سی بی محسن نقوی نے کہا کہ ٹی ٹوئنٹی میں ٹیم کو 150 سے زائد کے سٹرائیک ریٹ سے کھیلنے والے کھلاڑیوں کی ضرورت ہے۔
ذرائع کے مطابق چیئرمین پی سی بی محسن نقوی کی اسلام آباد میں بورڈ کے مینٹورز کے ساتھ میٹنگ ہوئی جس میں وقار یونس، شعیب ملک، ثقلین مشتاق، سرفراز احمد اور مصباح الحق شریک ہوئے،میٹنگ میں چیمپئنز ٹی 20 کپ کا جائزہ لیا گیا، چیئرمین پی سی بی محسن نقوی نے چیمپئنز ٹی ٹوئنٹی کپ کے بہترین پرفارمرز کے حوالے سے مینٹورز سے پوچھا تو مینٹورز نے چیمپئنز ٹی 20 کپ میں بہترین کھلاڑیوں کی نشاندہی کی۔
ذرائع کا کہنا ہے کہ مینٹورز نے ہر شعبے کے 2 سے 3 بہترین پرفارمرز کی نشاندہی کی، چیمپئنز ٹی 20 کپ سے تینوں شعبوں، بیٹنگ، فیلڈنگ اور بولنگ میں 12 کے قریب بہترین کھلاڑیوں کو سلیکٹ کیا گیا۔
اس موقع پر محسن نقوی کا کہنا تھا کہ ٹی 20 کرکٹ میں 150 سے زائد کے اسٹرائیک ریٹ سے کھیلنے والے کھلاڑیوں کی ٹیم کو ضرورت ہے، سلیکٹ ہونے والے کھلاڑیوں کی ٹریننگ، خوراک اور فٹنس پی سی بی کے ذمے ہوگی، منتخب ہونے والے کھلاڑیوں کے اسکلز کو مزید بہتر بنانے کے لیے کام کیا جائے گا۔
چیئرمین پی سی بی کا مزید کہنا تھا کہ سابق ٹیسٹ کرکٹر عبدالرزاق کو بھی بہتر اسٹرائیک ریٹ کے بیٹرز کی تلاش کے لیے ذمہ داری دی گئی ہے، مقصد قومی ٹی 20 ٹیم کے لیے ماڈرن ڈے کرکٹ کے لیے کھلاڑیوں کی تلاش اور انہیں قومی سطح پر موقع دینا ہے۔
یہ بھی پڑھیں:ویلڈن!انگلش کرکٹر نے پی ایس ایل کیلئے آئی پی ایل کو ٹھکرادیا