گورنر کے پی کا اسلام آباد انٹرنیشنل ایئرپورٹ بینظیر بھٹو سے منسوب کرنےکا مطالبہ

 (24نیوز) گورنر خیبرپختونخوا فیصل کریم کنڈی نے اسلام آباد انٹرنیشنل ایئرپورٹ کو بینظیر بھٹو سے منسوب کرنے کا مطالبہ کردیا۔

گورنر کے پی کے فیصل کریم کنڈی نے صدرمملکت آصف علی زرداری اور وزیراعظم شہباز شریف کواس حوالے سے خط  لکھاہے کہ21 جون 2008ء کو اس وقت کے وزیرِاعظم نے ایئر پورٹ کا نام بے نظیر بھٹو انٹرنیشنل ایئر پورٹ رکھنے کا اعلان کیا تھا، 17جولائی 2008ء کو سول ایوی ایشن اتھارٹی کی جانب سے باقاعدہ اعلامیہ بھی جاری کیا گیا لیکن اس پر عمل درآمد نہیں کیا گیا۔

خط کے متن میں کہا گیا ہے کہ اسلام آباد ایئر پورٹ کا نام بے نظیر انٹرنیشنل ایئر پورٹ رکھنا محترمہ کی خدمات کو خراجِ تحسین پیش کرنا ہے۔

گورنر کے پی کے خط میں کہا گیا ہے کہ پاکستان اور دنیا کے دیگر ممالک میں بھی قومی ہیروز کے نام پر ایئر پورٹس موجود ہیں،یہ اقدام شہید بے نظیر بھٹو کی قربانیوں کو خراجِ تحسین پیش کرنا ثابت ہو گا۔

یہ بھی پڑھیں:رمضان المبارک،سکولوں کے اوقات کار تبدیل

خط میں گورنر خیبر پختو نخوا فیصل کریم کنڈی نے صدر مملکت آصف علی زرداری اور وزیرِ اعظم شہباز شریف سے استدعا کرتے ہوئے کہا ہے کہ عوامی مطالبے پر درخواست کرتا ہوں کہ متعلقہ حکام کو اس حوالے سے ہدایات جاری کی جائیں۔