جے یو آئی رہنماو سابق صوبائی وزیر رحمت سلام خٹک مسلم لیگ ن میں شامل 

(اویس کیانی) سابق صوبائی وزیر اورجمعیت علمائے اسلام ( جے یو آئی) کے رہنما رحمت سلام خٹک نےباضابطہ طور پر مسلم لیگ ن میں شمولیت کا اعلان کردیا۔ 

تفصیلات کےمطابق وفاقی وزیر اور صدر مسلم لیگ ن خیبر پختونخوا انجینئر امیر مقام اور مسلم لیگ ن کے رہنما کیپٹن ریٹائرڈ صفدرنے پشاور میں پریس کانفرنس کی جہاں سابق صوبائی وزیر اور جے یو آئی (ف) کے رہنما رحمت سلام خٹک نے اپنے دوستوں سمیت مسلم لیگ ن میں شمولیت کا اعلان کیا۔ 

صوبائی صدر مسلم لیگ ن انجینئر امیر مقام اور مسلم لیگ ن کے رہنما کیپٹن ریٹائرڈ صفدر رحمت سلام خٹک کی رہائش گاہ آئےجہاں جے یو آئی رہنما نے  مسلم لیگ ن میں شمولیت کا اعلان کیا،اس موقع پر سابق گورنر کے پی اقبال ظفر جھگڑا، اراکین صوبائی اسمبلی، ٹکٹ ہولڈرز اور دیگر رہنما بھی موجود تھے،انجینئر امیر مقام نے ان کا پرتپاک خیرمقدم کیا اور کہا کہ صوبے کے عوام کو بہتر خدمات فراہم کرنے کے منتظر ہیں۔

پرہجوم پریس کانفرنس سے خطاب کرتے ہوئے انجینئر امیر مقام نے کہا کہ مسلم لیگ ن کی حکومت ملک کو معاشی اور دیگر بحرانوں سے نکالنے کے لیے پرعزم ہے،امیر مقام نے کہا کہ حکومت کی مضبوط پالیسیوں کی وجہ سے معیشت استحکام کی راہ پر گامزن ہے، انہوں نے مزید کہا کہ عوام کو ریلیف فراہم کرنے کے لیے بھی اقدامات کیے جا رہے ہیں۔

امیر مقام نے کہا کہ بدقسمتی سے کے پی حکومت نے صوبے کی ترقی کے لیے کچھ نہیں کیا، انہوں نے کہا کہ کے پی کے وزیراعلیٰ دوسرے صوبوں کا مقابلہ کریں تو اچھا ہوگا لیکن ان کی ترجیح ترقی اور خوشحالی نہیں ہے۔ 
انہوں نے کہا کہ ہم نے پی ڈی ایم حکومت کے دوران ملک کو ڈیفالٹ سے بچایا  اور کوششوں سے ملک میں سرمایہ کاری آرہی ہے،انہوں نے کہا کہ سوات موٹروے کی منظوری سابق وزیراعظم نواز شریف نے دی تھی اور بعد میں پی ٹی آئی نے کام روک دیا تھا۔  
اس موقع پر کیپٹن صفدر نے خیبرپختونخوا میں مسلم لیگ ن کی جانب سے مکمل کیے گئے مختلف منصوبوں پر روشنی ڈالی،انہوں نے کہا کہ مسلم لیگ ن کی قیادت پنجاب کی طرح خیبرپختونخوا میں بھی ترقی اور خوشحالی لائے گی، انہوں نے کہا کہ ہم اپنے صوبے کو کامیاب دیکھنا چاہتے ہیں،کیپٹن صفدر نے کہا کہ جب انجینئر امیر مقام وزیراعلیٰ بنیں گے تو اس صوبے کو عظیم بنائیں گے۔ 
قبل ازیں، وفاقی وزیر انجینئر امیر مقام نے رحمت سلام خٹک کو مسلم لیگ ن کی ٹوپی پیش کی، اس موقع پر مسلم لیگ ن کے کارکنان اور صوبائی و ضلعی قیادت کی بڑی تعداد بھی موجود تھی۔

یہ بھی پڑھیں : عمران خان نے علی امین گنڈاپور سے صدر پی ٹی آئی کے پی کا عہدہ واپس لے لیا