شک تھا کہ شاہ رُخ اور سلمان خان میرا کیرئیر ختم کرنا چاہتے ہیں: عامر خان

(ویب ڈیسک)بالی ووڈ کے مسٹر پرفیکشنسٹ عامر خان نے انکشاف کیا ہے کہ ایک موقع پرانہیں لگا تھا کہ سلمان خان اور شاہ رُخ خان ان کا کیرئیر ختم کر کے انہیں بالی ووڈ سے نکالنا باہر کرنا چاہتے تھے۔

"دنگل" اسٹار عامر خان نے حال ہی میں انکشاف کیا ہے کہ وہ ابتدائی طور پر اس فلم کو قبول کرنے میں ہچکچا رہے تھے اور انہیں شبہ تھا کہ شاہ رخ خان اور سلمان خان نے ان کے کیریئر کو سبوتاژ کرنے کے لیے ہدایت کار نتیش تیواری کو اس پروجیکٹ کی پیشکش لے کر ان کے پاس بھیج کر سازش کی ہے۔

ایک حالیہ انٹرویو میں عامر خان نے دنگل پر اپنے ابتدائی ردعمل کو یاد کرتے ہوئے بتایا کہ جب نتیش تیواری نے اسکرپٹ پڑھ کر سُنایا تو وہ فوری طور پر متاثر ہوئے اور اسے قبول کرنے کے لیے بے چین ہوگئےم تاہم "دھوم 3" میں انہوں نے 9.67 فیصد جسمانی چربی کے ساتھ ایک دبلی پتلی اور فٹ جسامت بنائی تھی،اس کے بعد خود کو 55 سالہ بڑھے ہوئے وزن کے ساتھ چار بیٹوں کے باپ کے طور پر تصور کرنا مشکل محسوس کیا۔

معروف اداکار نے بتایا کہ کیونکہ ماضی میں بالی ووڈ کے تینوں "خانز" کے درمیان اختلافات بھی رہے ہیں اس لئے دنگل کے کردار کیلئے درکار سخت جسمانی تبدیلی نے انہیں سوچنے پر مجبور کردیا اور انہیں شک ہوا کہ سلمان خان اور شاہ رُخ خان نے ان کا بالی ووڈ کیرئیر ختم کرنے اور انہیں انڈسٹری سے باہر نکال پھینکنے کیلئے ایک بوڑھے باپ کے کردار کی آفر بھجوائی ہے۔

یہ بھی پڑھیں:سشانت سنگھ قتل کیس کے بعد ریا چکرورتی ایک اور مشکل میں پھنس گئیں

ابتدائی طور پر عامرخان نے نتیش تیواری سے کہا کہ وہ فلم کو مزید 10-15 سال کے لیے روک دیں کیونکہ یہ کردار بعد کے مرحلے میں ان کے لیے بہتر ہوگا،تاہم فلم ساز عامر خان کے ہی ساتھ فلم بنانے پر بضد تھے۔

اداکار نے کہا کہ اس فلم کی زبردست کہانی نے انہیں اس قدر متاثر کیا کہ وہ اسے دماغ سے نکال نہ سکے اور فیصلہ کیا کہ وہ فلم کریں گے اور اگر یہ فلم ان کے کیرئیر کی آخری فلم ثابت ہوئی تو ایسا ہی صحیح۔