کس کس شہر میں بادل برسیں گے؟محکمہ موسمیات کی اہم پیشگوئی

(روزینہ علی)محکمہ موسمیات نے کشمیر اور گلگت بلتستان کے چند مقامات پر بارش اور برفباری کی پیش گوئی کردی۔

رپورٹ کے مطابق آج رات  ملک کے بیشتر علاقوں میں موسم سرد اورخشک جبکہ پہاڑی علاقوں میں رات کے اوقات میں شدیدسرد رہنے کا امکان ہے۔ تاہم کشمیر، گلگت بلتستان، شمال مشر قی پنجاب، بالا ئی خیبر پختو نخوا ، مری ، گلیات اور گردونواح میں چندمقامات پرہلکی بارش/ہلکی برفباری کی توقع ہے۔ پنجاب کے زیادہ ترمیدانی علا قوں اور بالائی/وسطی سندھ میں سموگ/درمیانی سے شدید دُھند چھائے رہنے کی توقع ہے۔

موسم کا احوال بتانے والوں کا کہناتھا کہ ہفتے کے روز اسلام آباد اور گردونواح میں موسم سرد جبکہ صبح/رات کے اوقات میں موسم شدید سرد رہنے کا امکان ہے۔جبکہ صبح کے اوقات میں چند مقامات پر کہرا پڑنے کی بھی توقع ہے۔

یہ بھی پڑھیں:بینکوں میں لین دین کرنے والوں کیلئے اہم خبر

ادھرخیبرپختونخوا کے بیشتر اضلاع میں موسم سرد اورخشک جبکہ پہاڑی علاقوں میں شدید سرد رہنے کا امکان ہے۔تاہم صبح اور رات کے اوقات میں صوابی، مردان، پشاور، نوشہرہ، کوہاٹ،بنوں، ڈیرہ اسماعیل خان اور گردو نواح میں چند مقامات پر دھند پڑنے کی توقع ہے۔

اسی طرح پنجاب کے بیشتر اضلاع میں موسم سرد اور خشک رہنے کی توقع ہے۔جبکہ مری، گلیات اور گردو نواح میں موسم شدید سرداور مطلع ابرآلود رہے گا۔تاہم رات اور صبح کے اوقات میں سیالکوٹ، نارووال ،گوجرانوالہ، منگلا، جہلم ، راولپنڈی، لاہور، شیخوپورہ،ا وکاڑہ، ساہیوال،سرگودھا، فیصل آباد،جھنگ،بھکر، لیہ ، ملتان،بہاولپور، بہا ولنگر، رحیم یار خان ،ڈی جی خان اور گردونواح میں درمیانی سے شدید دھند /سموگ چھائے رہنے کی توقع ہے۔ جبکہ صبح کے اوقات میں خطہ پوٹھوہار میں چند مقامات پر کہرا پڑنے کی بھی توقع ہے۔

یہ بھی پڑھیں:ڈالر روپے پر حاوی ہو گیا، قیمت میں بڑااضافہ

بلوچستان کے بیشتر اضلاع میں موسم سرد اورخشک جبکہ پہاڑی علاقوں میں صبح اور رات کے اوقات میں شدید سرد رہنے کا امکان ہے،سندھ کے بیشتر اضلاع میں بھی موسم سرد اورخشک رہنے کا امکان ہے ۔ تاہم صبح /رات کے اوقات میں سکھر ، شہید بینظیر آباد،شکارپور، کشمور، خیر پور، مو ہنجو دارو اور گردونواح میں درمیانی سے شدید دھند /سموگ چھائے رہنے کی توقع ہے۔

رپورٹ کے مطابق گلگت بلتستان اور  کشمیر میں صبح کے اوقات میں موسم شدید سرد اور مطلع ابر آلود رہنے کے علاوہ چند مقامات پر ہلکی بارش/ہلکی برفباری کا امکان  ہے۔

جمعہ کو کم سےکم درجہ حرارت سکردومنفی13،لہہ منفی12، گوپس منفی 09،استور، گلگت، زیارت منفی08،کوئٹہ ، قلات منفی 07 ،ہنزہ ، بگروٹ منفی 06 اورکالام میں منفی 05 ڈگری سینٹی گریڈ ریکارڈ کیا گیا۔

یہ بھی پڑھیں:شہریار منور کی شادی میں ماہرہ خان کا زبردست ڈانس، سوشل میڈیا پر دھوم مچا دی