خیبرپختونخوا اسمبلی میں نگراں دور میں بھرتی ہزاروں سرکاری ملازمین کو فارغ کرنے کا بل منظور

(24نیوز)خیبرپختونخوا(کے پی ) اسمبلی نے نگراں دور حکومت میں بھرتی ہونے والے ہزاروں سرکاری ملازمین کو فارغ کرنے کابل منظور کر لیا۔

تفصیلات کے مطابق وزیر قانون آفتاب عالم آفریدی نے بل اسمبلی میں پیش کیا جسے ایوان نے کثرت رائے سے منظور کرلیا،بل میں کہا گیا ہے کہ سابق نگراں دور حکومت میں غیرقانونی طور پر بھرتی کیے گئے سرکاری ملازمین کو نوکریوں سے فارغ کیا جائےگا، اس ضمن میں متعلقہ ادارے جلد نوٹیفکیشن جاری کریں گے۔

بل کے مطابق کوئی قانونی پیچیدگی آڑے آئی تو کمیٹی میں اس کا جائزہ لیا جائے گا اور سیکرٹری اسٹیبلشمنٹ کی سربراہی میں 6 رکنی کمیٹی تشکیل دی جائے گی،آفتاب عالم کا کہنا تھاکہ نگراں دور حکومت میں 9 ہزار سے زائد ملازمین بھرتی ہوئے تھے اور اب ڈھائی سے 3 ہزار تک ملازمین کو نکالنا ہے۔

ایوان سے خطاب میں اپوزیشن رکن احمد کنڈی کا کہنا تھا کہ حکومت روزگار دینے کے بجائے نوکریاں چھین رہی ہے، غیر قانونی بھرتیوں کے ذمہ داروں کو سزا ملنی چاہیے۔

متاثرہ ملازمین نے اس فیصلے پر احتجاج کی دھمکی دی ہے۔

یہ بھی پڑھیں: سینیٹ اجلاس کل(منگل) کو ہوگا،اہم بلز اور امور پر غور کیا جائے گا