سعودی عرب کے بعد  امارات اور قطر میں بھی شوال کا چاند نظر آگیا،عید الفطر کل منائی جائیگی

(24 نیوز) سعودی عرب  کے بعد قطر اور امارات میں بھی  ہفتہ 29 رمضان المبارک کی شام کو شوال 1446 ہجری کا چاند نظر آگیا جس کے بعد مملکت میں عید الفطر کل بروز اتوار، 30 مارچ 2025 کو منائی جائے گی۔

متحدہ عرب امارات اور قطر میں بھی شوال کا چاند نظر آگیا ہے اور وہاں عیدالفطر کل بروز اتوار ہوگی،یو اے ای میں  شوال کا چاند دیکھنے کے لیے اماراتی فتویٰ کونسل کا اجلاس جاری ختم ہوا ،  ابوظہبی شوال کا چاند دیکھنے کے لیے اماراتی فتویٰ کونسل کا اجلاس  قلعہ الحصن ، ابوظہبی میں ہو ا،اجلاس کی صدارت شیخ عبداللہ بن بیہ اور ڈاکٹر عمر حبتور الدرعی نے کی ،شرعی ، فلکیاتی اور قانونی ماہرین اجلاس میں شریک ہیں۔

 دوسری جانب سعودی میڈیا کے مطابق سپریم کورٹ کی جانب سے تشکیل کردہ رویت ہلال کمیٹیوں نے چاند کی رویت کے لیے اجلاس منعقد کیا جہاں فیلڈ میں موجود ماہرین نے مختلف علاقوں سے موصول ہونے والی شہادتوں کی بنیاد پر چاند نظر آنے کی تصدیق کی،سعودی سپریم کورٹ نے شہریوں سے اپیل کی تھی کہ وہ 29 رمضان کی شام کو شوال کا چاند دیکھنے کی کوشش کریں اور اگر کوئی شخص چاند دیکھے تو قریبی عدالت یا متعلقہ اداروں کو مطلع کرے۔

اجلاس کے بعد سرکاری طور پر اعلان کیا گیا کہ چاند کی رویت ہوگئی ہے جس کے نتیجے میں رمضان المبارک 29 روزوں پر مشتمل ہوگا اور یکم شوال بروز اتوار ہوگی،سعودی میڈیا کے مطابق خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان نے چاند کی رویت کے اعلان کے بعد سعودی عوام اور پوری امت مسلمہ کو عید الفطر کی مبارکباد پیش کی،انہوں نے دعا کی کہ یہ مبارک موقع عالم اسلام کے لیے امن، خوشحالی اور اتحاد کا باعث بنے۔

ماہرین فلکیات نے بھی اس سے قبل پیش گوئی کی تھی کہ سعودی عرب میں 29 رمضان کو چاند نظر آنے کے امکانات موجود ہیں۔

 مزید پڑھیں :سعودی عرب میں شوال کا چاند نظر آگیا،عید کل ہوگی