(ویب ڈیسک)اداکاروں کے درمیان اختلافات عام بات ہے، اکثر فنکاروں کے درمیان پیشہ ورانہ اختلافات کی خبریں منظرعام پر آتی رہتی ہیں لیکن کئی بار یہ جھگڑے اس حد تک بڑھ جاتے ہیں کہ نوبت مارپیٹ تک پہنچ جاتی ہے،ایسا ہی ایک واقعہ اداکارہ امریتا راؤ اوران کی ساتھی اداکارہ ایشا دیول کے درمیان پیش آیا جہاں تنازعہ اتنا بڑھ گیا کہ ایشا دیول نے امریتا راؤ کو تھپڑ مار دیا۔
اداکارہ امریتا راؤ نے بالی ووڈ میں اپنے کیریئر کا آغاز 2002 میں فلم "اب کے برس" سے کیا، جس نے باکس آفس پر ملا جلا ردعمل حاصل کیالیکن ان کی اداکاری کو سراہا گیا۔
انہیں بڑی کامیابی 2003 میں فلم "عشق وشق" میں شاہد کپور کے ساتھ ملی، انہوں نے تیلگو فلم "اتھیدی" میں مہیش بابو کے ساتھ بھی کام کیا لیکن تیلگو انڈسٹری میں مزید کردار نہیں کیے
امریتاراؤ نے شاہد کپور کے ساتھ "ویواہ" اور شاہ رخ خان کے ساتھ "میں ہوں نا" جیسی ہٹ فلمیں دیں، ان کی اداکاری نے فلم سازوں کی توجہ حاصل کی جس کے نتیجے میں انہیں سنی دیول کے ساتھ "سنگھ صاحب دی گریٹ" اور اجے دیوگن کے ساتھ "دی لیجنڈ آف بھگت سنگھ" جیسے کردار ملے۔
فلموں اور اداکاری سے ہٹ کرامریتا کئی بار مختلف وجوہات کی بنا پر خبروں کی شہ سرخی بنی۔ ایسا ہی ایک واقعہ 2005 میں فلم "پیارے موہن" کے سیٹ پر ہوا جب ان کی اور ان کی ساتھی اداکارہ ایشا دیول کے درمیان تنازعہ ہوا،اور ایشا دیول نے امریتا راؤ کو تھپڑ مار دیا۔ ایشا نے بعد میں کہا کہ انہیں اپنے عمل پر کوئی افسوس نہیں ہے۔
یہ بھی پڑھیں : راحت فتح علی خان کی بھارتی کرکٹر دھونی سے ملاقات، ویڈیو وائرل
ایشادیول نے کہا کہ امریتا نے ڈائریکٹر اور کیمرہ مین کے سامنے ان کی بے عزتی کی،جو ان سے برداشت نہیں ہوا۔ ایشا نے بتایا کہ امریتا نے بعد میں اپنی غلطی تسلیم کی اورمعافی مانگی جس پر ایشا دیول نے انہیں معاف کردیا اور ان کے درمیان معاملات ٹھیک ہو گئے۔
ایشادیول کا کہنا تھاکہ وہ ایک مہذب بیک گراونڈ سےتعلق رکھتی ہیں اورایسا کچھ کرنے کی عادی نہیں ہیں جب تک کہ انہیں اشتعال نہ دلایا جائے۔
امریتا نے 2014 میں اپنے بوائے فرینڈ آر جے انمول سے شادی کے بعد فلمی دنیا سے تقریبا کنارہ کشی اختیار کرلی، نومبر 2020 میں، ان کے ہاں ایک بیٹا پیدا ہوا، جس کا نام ویر رکھا گیا۔
انہوں نے آخری فلم "ٹھاکرے" (2019) میں پانچ سال کے وقفے کے بعد کی تھی۔ یہ فلم بالاصاحب ٹھاکرے کی زندگی پر مبنی تھی۔ یہ جوڑا ایک یوٹیوب چینل ”کپل آف تھنگز“ چلاتا ہے اور اسی نام کی ایک کتاب بھی فروری 2023 میں شائع کی۔