جے یو آئی ف کا جمعہ کو ملک بھرمیں یوم احتجاج منانےکااعلان 

(24نیوز)جمعیت علمائے اسلام(ف) نے حماس کے سربراہ اسماعیل ہنیہ کی شہادت کے خلاف جمعہ کے روز ملک بھر میں یوم احتجاج منانے کا اعلان کر دیا۔

جے یو آئی ف کی طرف سے جاری ایک بیان میں کہا گیا ہے کہ اسماعیل ہنیہ کی شہادت پاکستان بالخصوص امت مسلمہ کیلئے  ایک عظیم سانحہ ہے،ان کی شہادت کے خلاف جمعہ کے روز پورے ملک میں مظاہرے کیے جائیں گے اور یوم احتجاج منایا جائے گا۔

قبل ازیں جے یو آئی کے رہنما مولانا عبدالغفور حیدری نے کہا ہے کہ حماس رہنماء اسماعیل ہنیہ کی شہادت پر(جمعہ کو) ملک بھر میں مظاہرے کئے جائیں گے، مسلم دنیا اب تک لفاظی پر ہی اکتفا کر رہی ہے، کوئی عملی اقدام نہیں کیا گیا، فلسطین اپنی جنگ صرف خود ہی لڑ رہا ہے۔  اگر مسلم دنیا صرف2 روز کیلئے تیل بند کر دے امریکہ اور اسرائیل گھٹنے ٹیک دیں گے۔  او آئی سی اور عرب لیگ کس مرض کی دوا ہیں؟۔

اسلام آباد میں پریس کانفرنس کرتے ہوئے مولانا عبدالغفور حیدری نے کہا کہ اسماعیل ہنیہ کا سانحہ بہت بڑا ہے وہ بہت بڑی شخصیت تھے۔ اسماعیل ہنیہ ایران کی دعوت پر گئے، کیا اسے ایران کی سیکیورٹی فورسز کی ناکامی سمجھا جائے؟ بظاہر اسرائیل نے جنگ کو وسعت دینے کی کوشش کی ہے۔اسماعیل ہنیہ مسلسل اسرائیلی قبضے کے خلاف جدوجہد کرتے رہے، ان کے بیٹے، اہلیہ، بیٹی اور ان کے خاندان کے کئی لوگ شہید کیے گئے، امریکہ اور اسرائیل کی کوشش ہوتی ہے چن چن کر مخالفین کو قتل کرائیں۔

یہ بھی پڑھیں: انٹر بینک میں ڈالر مہنگا، روپے نے غصہ دیگر کرنسیوں پر نکال دیا