(ویب ڈیسک)ممبئی میں انڈر 19 کرکٹ میچ کے دوران امپائرنگ کرتے ہوئے امپائر انتقال کر گیا۔
ممبئی میں انڈر 19 کرکٹ میچ کے دوران افسوسناک واقعہ پیش آیا جس نے مقامی کرکٹ برادری کو غم میں مبتلا کر دیا۔
ممبئی میں بھاما کپ انڈر19 ٹورنامنٹ میں سندر کرکٹ کلب گراؤنڈ پر کے آر پی الیون سی سی اور کریسنٹ سی سی کے درمیان میچ کھیلا جارہا تھا، ممبئی کرکٹ ایسوسی ایشن کے 60 سالہ امپائر پرساد مالگونکر اچانک اس وقت گرپڑے جب وہ لیگ امپائرنگ کے فرائض انجام دے رہے تھے۔
مڈ ڈے کے مطابق مالگونکر 11ویں اوور کی امپائرنگ کیلئے سکوائر لیگ پر موجود تھے، جیسے ہی اوور کی دوسری گیند مکمل ہوئی وہ زمین پر گر پڑے اور سانس لینے میں دشواری محسوس کرنے لگے، فوری طور پر انہیں بمبئی کے ہسپتال لے جایا گیا مگر ڈاکٹروں نے انہیں مردہ قرار دے دیا۔
یہ بھی پڑھیں:سوناخریدنا خواب بن گیا،قیمت ملکی تاریخ کی بلند ترین سطح پر پہنچ گئی
رپورٹ کے مطابق ساتھی امپائر پرتھمیش انگنے کے مطابق میچ سے قبل مالگونکر نے معدے میں تیزابیت کی شکایت کی تھی، جس پر انہیں آرام کرنے کا مشورہ بھی دیا لیکن وہ اصرار کرتے رہے کہ وہ ٹھیک ہیں اور امپائرنگ کرسکتے ہیں، ابتدائی 10 اوورز تک وہ بہتر محسوس کررہے تھے لیکن 10.2 اوورز کے بعد اچانک ان کی طبیعت بگڑ گئی۔
ممبئی ہسپتال کے ایمرجنسی وارڈ کے ایک ڈاکٹر نے میڈیا کو بتایا کہ جب مالگونکر کو لایا گیا تو ان کا بلڈ پریشر اور آکسیجن لیول صفر تھا، ای سی جی میں کوئی حرکت نہیں تھی اور ان کی آنکھوں کی پتلیاں پھیل چکی تھیں، جس کے بعد انہیں مردہ قرار دے دیا گیا۔
یہ بھی پڑھیں:آئی سی سی ویمنز کرکٹ ورلڈ کپ کوالیفائر ،ویسٹ انڈیز اور بنگلہ دیش کے میچ کا نتیجہ آ گیا