صدیاں حسینؓ کی ہیں زمانہ حسینؓ کا،یوم عاشور کے جلوس رواں دواں،ملک بھر میں حسینؓ حسینؓ کی صدائیں

امام حسینؓ کی شہادت ہمیں باطل اور ظلم کے خلاف ڈٹ جانے کا درس دیتی ہے:وزیراعظم

(24 نیوز)وزیراعظم شہباز شریف نے کہا ہے کہ یوم عاشور بے شمار فضائل اور تاریخی واقعات کی وجہ سے خاص اہمیت کا حامل ہے، اس دن نواسہ رسولﷺ نے حق اور باطل کی لڑائی میں جانوں کا نذرانہ دے کر حق کو حقیقی فتح سے سرفراز کیا، امام حسینؓ کی شہادت ہمیں باطل اور ظلم کے خلاف ڈٹ جانے کا درس دیتی ہے۔

وزیراعظم کا اپنے پیغام میں کہنا تھا کہ کربلا کے میدان میں شہیدوں کے لہو نے یہ ثابت کردیا کہ حق لازوال اور باطل مٹنے کے لیے ہے، امام حسینؓ کربلا کے میدان میں یزید کی جابرانہ حکومت کے خلاف جرات و استقامت کے ساتھ اٹھ کھڑے ہوئے۔

وزیراعظم نے کہا کہ آج کا دن اس عزم کا اعادہ ہے کہ امت مسلمہ کو ہمیشہ حق و صداقت پر ڈٹے رہنا ہے، فلسطین کے لوگ عظیم مقصد کےلیے بے پناہ مشکلات برداشت کر رہے ہیں، فلسطینی قبلہ اول بیت المقدس کی حفاظت اپنے حقوق اور آزادی کے لیے جدوجہد جاری رکھے ہوئے ہیں، جب کہ فلسطینیوں کی طرح مقبوضہ کشمیر کے عوام بھی انتہائی جابر اور غاصب قوتوں کے مظالم سہہ رہے ہیں، پاکستانی قوم کو اس وقت بڑے معاشی چیلنجز کا سامنا ہے، اس مشکل وقت میں ضروری ہے ہم صبر، اتحاد اور بھائی چارے کا مظاہرہ کریں۔

امام حسینؓ کی شہادت نے ظلم کے خلاف آواز اٹھانے ،آزمائشوں میں ثابتِ قدم رہنے کا درس دیا: صدر مملکت 

(اویس کیانی ) صدر مملکت آصف علی زرداری نے کہا کہ امام حسینؓ کی شہادت میں امت مسلمہ کیلئے عظیم درس ہے،  شدید دباؤ  ، مشکلات کے باوجود ظالم و جابر حکمران کے خلاف کلمہ ِحق بلند کیا۔

 صدر مملکت آصف علی زرداری نے یوم عاشورہ پر  اپنے پیغام میں کہا کہ یوم عاشورہ حضرت امام حسینؓ    کی میدان ِکربلا میں شہادت کی یاد تازہ کرتا ہے، ظلم اور جبر کے خلاف ڈٹ  کر امام حسینؓ اور ساتھیوں نے اسلامی اقدار کے احیاء ، امت ِمسلمہ کے حقوق کی خاطر جانوں کا نذرانہ پیش کیا،  ظلم کے خلاف آواز اٹھانے ، آزمائشوں میں ثابتِ قدم رہنے کا درس دیا،امام حسینؓ اور آپ کے بہادر ساتھی ظلم کے خلاف مزاحمت کی عظیم مثال ہیں، آپؓ نے دین کی خاطر جان  اور اہل و عیال کی قربانی تو گوارا کی مگر ظالم کے  آگے سر نہ جھکایا،  آج اسلام امام حسینؓ اور ان کے ساتھیوں کی قربانیوں کی بنا پر زندہ ہے،میدانِ کربلا میں قربانیاں اہل ِایمان کے جذبات کو امتحان وابتلاء  کے وقت میں جلا بخشتی ہیں۔

انہوں نے کہا کہ آج کشمیری اور  فلسطینی بھائیوں اور بہنوں کو آزمائشوں اور مصائب کا سامنا ہے، فلسطینی اور کشمیری عوام انصاف اور آزادی کیلئے سخت مشکلات کا سامنا کر رہے ہیں،  فلسطینی اور کشمیری عوام کی جدوجہد ان کے پائیدار عزم و استقلال اور جذبے کا ثبوت ہے ،واقعہ کربلا سے سبق سیکھتے ہوئے اتحاد و اتفاق کا مظاہرہ کرنے، ظلم وجبر اور باطل قوتوں کے خلاف کھڑے ہونے کی ضرورت ہے۔

ان کا کہنا تھا کہ قوم کی فلاح  اور بہتری کی خاطر ذاتی مفادات ایک طرف رکھتے ہوئے کسی بھی قربانی  سے دریغ نہیں کرنا چاہیے، پوری پاکستانی قوم سے صبراور محنت کرنے ، انصاف کیلئے کھڑے ہونے کی اپیل کرتا ہوں،ہمیں غریبوں اور ناداروں کی ضروریات کا خیال رکھنا چاہیے،انہوں نے مزید کہا اللہ تعالیٰ ہمیں امام حسینؓ کی پیروی کرنے کی توفیق عطا فرمائے، پاکستان کو ترقی اور خوشحالی سے نوازے۔