پنجاب کے نو منتخب ارکان صوبائی اسمبلی نے حلف اٹھا لیا،سپیکر،ڈپٹی سپیکر کا انتخاب کل ہوگا

(24 نیوز)پنجاب اسمبلی میں اپوزیشن کا شور شرابہ اور ہلڑ بازی،اسپیکر اسمبلی کا ایکشن،اپوزیشن کے گیارہ ارکان پر اسمبلی میں داخلے پر پابندی۔اسپیکرپنجاب اسمبلی کا ایوان میں نظم و ضبط برقرار رکھنے کیلئے ایتھکس کمیٹی بنانے کا اعلان، ملک احمد خان نے کہا ہے کہ گزشتہ روز کچھ ارکان نے ایوان میں نازیبا گفتگو کی اور گالیاں دیں،ہلڑ بازی کرنے والوں کی رکنیت موجودہ سیشن کیلئے معطل کی گئی،پارلیمان میں ہلڑ بازی یا گالیاں کسی صورت برداشت نہیں،کوئی ایوان کا ماحول خراب کرےگا تو ہر صورت ایکشن لیا جائے گا۔
پنجاب اسمبلی میں اپوزیشن کا شور شرابہ اور ہلڑ بازی،اسپیکر اسمبلی کا ایکشن،اپوزیشن کے گیارہ ارکان پر اسمبلی میں داخلے پر پابندی لگادی ،معطل ہونے والوں میں ذوالفقار علی،رانا شہبازاحمد، محمد عاطف، طیب راشد شامل،امتیاز محمود، حافظ فرحت عباس، چوہدری محمد اعجاز شفیع، رانا اورنگزیب، شعیب امیر، اسامہ اصغر علی گجر اور اسد عباس بھی فہرست میں شامل ہیں۔

پنجاب اسمبلی کے باہر میڈیا سے گفتگو کرتے ہوئے سپیکر اسمبلی ملک محمد احمد خان کا کہنا تھا کہ وزیر اعلیٰ پنجاب مریم نواز کے خطاب کے دوران اپوزیشن کی جانب سے کئے جانے والی بے ہودگی اور ہلڑ بازی کا مظاہرہ کسی صورت برداشت نہیں ہوگا، اپوزیشن لیڈر معاملات طے کرنے کے باوجود اپنے ارکان کو نہیں سنبھال سکے، اسمبلی میں اخلاقیات کے حوالے سے پارلیمانی کمیٹی بنانے کااعلان کرتا ہوں۔

 گزشتہ روز وزیر اعلیٰ مریم نواز کے خطاب کے دوران تمام اخلاقی اور پارلیمانی روایات کو بری طریقے سے پامال کیاگیا،جس کی اجازت نہیں دی جا سکتی، اپوزیشن لیڈر اپنے ہی ارکان کو سنبھالنے میں ناکام رہے۔ماضی میں اپوزیشن کو دیوار کیساتھ لگایا گیا لیکن گزشتہ چار ماہ کے دوران اپوزیشن کی تمام جائز باتوں کو ایوان میں لانے کی اجازت دی ۔تاہم گالی گلوچ اور ہلڑ بازی کا رویہ کسی بھی صورت قابل قبول نہیں ۔

ملک محمد احمد خان کا کہنا تھا کہ کسی کی گاڑی کو اسمبلی میں داخل ہونے سے اس لئے روکا گیا کہ مسلح لوگوں کی پنجاب اسمبلی میں آنے کی اطلاع تھی۔

ضرورپڑھیں:ایران کے صدارتی الیکشن کیلئے دوبارہ ووٹنگ ہوگی
ارکان پر پابندیوں کے خلاف اپوزیشن نےپنجاب اسمبلی گیٹ پر دھرنا دے دیا،اپوزیشن ارکان نے نعرے بازی کی توقیدیوں کیلئے وین بھی آ گئی،پولیس تعینات کر دی گئی،اپوزیشن لیڈرملک احمد بھچر کا کہنا ہے کہ ہمارے ارکان کو احتجاج کا حق نہیں دیا جا رہا،جو جمہوریت کے خلاف ہے۔

(حسن علی)پنجاب اسمبلی اجلاس میں ہنگامہ آرائی، شور شرابے کی نذرڈپٹی سپیکر ہاؤس کو ان آرڈر کرنے میں ناکام ہوگئے۔مجبوراً وقفہ کرنا پڑا ۔وقفے کے بعد اپوزیشن لیڈر نے خطاب میں کہا کہ بھل صفائی کا موسم نہیں لیکن پیسے رکھ دئیے گئے ہیں،بیوروکریسی وہ فنڈز کھا جائے گی۔اجلاس کی صدارت ڈپٹی سپیکر پنجاب اسمبلی ملک ظہیر اقبال چنڑ کر رہے ہیں۔  
پنجاب اسمبلی کا اجلاس  پنجاب اسمبلی کا اجلاس ایک گھنٹہ 34 منٹ کی تاخیر سے شروع ہوا تو بانی پی ٹی آئی کی تصویر لانے پر ن لیگی رکن تحسین فواد نے اعتراض اٹھادیا ۔نامزد اپوزیشن لیڈر ملک احمد خان بھچر کی تقریر کے دوران اعتراض کیاگیا،پی ٹی آئی ارکان نے لیگی قائدین کے خلاف ڈیسک بجاکر نعرے بازی شروع کر دی،پنجاب اسمبلی،لیگی رکن ملک وحید اور دیگر ارکان شور مچاتے رہے،ملک وحید بانی پی ٹی آئی کی تصویر ہٹانے کا مطالبہ کرتے رہے،پنجاب اسمبلی،ڈپٹی سپیکر ظہیر چنڑ ہائوس ان آرڈر نہ کراسکے،ڈپٹی اسپیکر نے 10 منٹ کے لئے اجلاس ملتوی کردیا  ۔
وقفے کے بعد نامزداپوزیشن لیڈرملک احمد خان بچھر نے بجٹ پر بحث کا آغاز کر دیا،تقریر کے دوران چندحکومتی ارکان نے پنجاب اسمبلی اجلاس سے واک آؤٹ کر دیا،حکومتی اراکین کےواک آؤٹ پر وزیر خزانہ کی ایوان میں آنے کی درخواست،ڈپٹی سپیکر نےبلال یاسین کوحکومتی ارکان کومناکرواپس لانےکاٹاسک دیا اور وہ واپس لے آئے۔
 اپوزیشن لیڈر احمد خان بھچر نے اپنے خطاب میں کہا ہے کہ بھل صفائی کا موسم نہین لیکن پیسے رکھ دئے گئے ہیں، بیوروکریسی وہ فنڈز کھا جائے گی،وفاق صوبہ بلوچستان کے لئے ساٹھ فیصد سبسڈی دے رہا ہے،،کسانوں کو ٹیوب ویل کے چلانے پر سںسڈی دینا ہو گی،بجٹ میں زراعت کے لئے بہت کم فنڈز رکھے گئے ہیں،اے ڈی پی میں تمام پروگرامز میں سریا استعمال ہو گا جو کہ اتفاق فاؤنڈری سے آئے گی ۔
ان کا کہنا تھا کہ یہ فور ملز کو گندم خریدنے کے لئے قرضہ لینے کا کہہ رہے ہیں،نو مئی پر ہمارا بطور جماعت ایک مؤقف ہے،ہم نو مئی کی جوڈیشل انکوائری کروانا چاہتے ہیں،بانی پی ٹی آئی کا بھی موقف ہے کہ آزادنہ تحقیقات کروائی جائیں،پہلے بھی جتنی قبیح کام ہوئے ہیں ان میں ان کا ہاتھ نکلا ہے۔

مزید پڑھیں:  غزہ جنگ بندی پر بات چیت کیلئے امریکی وزیر انتھونی بلنکن سعودی عرب پہنچ گئے

دوسری جانب نامزد اپوزیشن لیڈر احمد خان بھچر کا میڈیا پر سے گفتگو کے دوران کہنا ہے کہ پنجاب میں ایسی حکومت ہے جس کا مینڈیٹ نہیں ہے۔ آرٹیکل 126کے تحت 9 ماہ کا بجٹ پیش ہی نہیں کر سکتے۔ 

اس حکومت کے پاس تو 4 ماہ کے بجٹ کا اختیار تھا۔ موجودہ دور فسطانیت کا دور ہے، صاف ستھرا  پنجاب پر عمل درآمد زیرو ہے۔ رمضان نگہبان پیکج کا ایک بیگ اٹھا کر تصویر بنا رہے ہیں۔ ہم کوشش کریں گے حکومت بجٹ پاس نہ کر سکے۔

(24 نیوز) پنجاب کابینہ نے 24-2023 کے 4 ہزار 480 ارب روپے کے بجٹ کی منظوری دیدی۔

وزیر اعلیٰ پنجاب مریم نواز شریف کی زیر صدارت پنجاب کابینہ کا دوسرا اجلاس ہوا جس میں صوبائی وزراء، چیف سیکرٹری، آئی جی پنجاب اور دیگر متعلقہ حکام نے شرکت کی,کابینہ نے آئی ایم ایف کو تسلی بخش بریفنگ دینے پر سیکرٹری فنانس مجاہد شیر دل کو سراہا،صوبائی کابینہ نے پنجاب سیلز ٹیکس سروس ایکٹ میں ترامیم کی منظوری بھی دی، صوبائی کابینہ نے ضمنی بجٹ 24-2023 کی منظوری دی اور جولائی تا اکتوبر، نومبر تا فروری اور مارچ 2024 کے بجٹ کی توسیع بھی کی۔

کابینہ نے صوبے کے ترقیاتی بجٹ کیلئے 655 ارب اور سماجی تحفظ اقدامات کا تخمینہ بجٹ 20 ارب روپے منظور کر لیا، صحت کیلئے 473 ارب، تعلیم کیلئے 596 ارب اور تعمیرات کیلئے 382 ارب کا بجٹ منظور کیا گیا ہے جبکہ رمضان پیکیج کے لئے 30ارب روپے کا بجٹ منظور ہوا ہے،پنجاب میں مفت کتابوں کی فراہمی کے لئے 11 ارب روپے کا تخمینہ لگایا گیا ہے جبکہ سنٹرل بزنس ڈسٹرکٹ کے لئے 12.5 ارب، پی کے ایل آئی انڈوومنٹ فنڈ کے لئے 10ارب اور حفظان صحت کے توسیعی پروگرام کے لئے 11.4 ارب روپے مختص کئے گئے ہیں۔

اسی طرح گندم کے قرضہ کی ادائیگی کے لئے 264 ارب ، بجٹ میں زراعت پر سبسڈی کے لئے 25.6 ارب رکھنے کی منظوری دی گئی ہے جبکہ وزیر اعلیٰ مریم نواز شریف کے خصوصی اقدامات کیلئے بھی بجٹ مختص کیا گیا ہے،اجلاس کے دوران صوبائی کابینہ نے تاریخ کا بہترین رمضان پیکیج پیش کرنے پر وزیر اعلیٰ پنجاب مریم نواز شریف کو خراج تحسین پیش کیا۔

اجلاس کے دوران وزیراعلیٰ پنجاب مریم نواز کا کہنا تھا کہ اگلے سال مستند ڈیٹا کے ساتھ بہتر رمضان پیکیج لائیں گے، صوبہ بھر میں 35 لاکھ سے زائد گھرانوں کو رمضان پیکیج کی ترسیل مکمل ہو چکی ہے، ایک ہفتے تک رمضان پیکیج کی ترسیل کا عمل مکمل کر لیا جائے گا، پیاز اور دیگر اشیاء کی قیمتیں تیزی سے نیچے آ رہی ہیں۔

 وزیراعلیٰ پنجاب مریم نوازکا مزید کہنا تھا کہ پرائس کنٹرول میں بہتری کی وجہ سے اشیاء کے بے مثال حد تک نرخ نیچے آ رہے ہیں، چیف سیکرٹری، ان کی ٹیم اور ضلعی انتظامیہ رمضان میں بہتر اقدامات پر شاباش کی مستحق ہے، پوری ٹیم نے رمضان پیکیج اور پرائس کنٹرول کیلئے توقعات سے بڑھ کر کام کیا۔

دوسری جانب وزیراعلیٰ پنجاب نے15روزمیں لاہور شہرکوتجاوزات سےپاک کرنےکاحکم دیدیا۔

(راؤ دلشاد)پنجاب کی نومنتخب وزیراعلیٰ مریم نواز نے حلف اٹھالیا۔

نومنتخب وزیر اعلیٰ پنجاب کی تقریب حلف برداری گورنرہاؤس میں ہوئی ،گورنر پنجاب انجینئر بلیغ الرحمان نے مریم نواز سے عہدے کا حلف لیا ۔حلف برداری کی تقریب میں سابق وزرائے اعظم نواز شریف ،شہباز شریف ،سابق وزیراعلیٰ پنجاب حمزہ شہباز،سپیکرپنجاب اسمبلی ملک محمداحمدخان ،سینیٹراسحاق ڈار،احسن اقبال،راناثنااللہ،عطاتارڑ شریک ہوئے۔
خواجہ محمدآصف،سردارایازصادق،رانامبشراقبال ،راناتنویرحسین،ملک محمدافضل کھوکھر،ملک سیف الملوک کھوکھر،ملک شہبازعلی کھوکھر،ملک فیصل ایوب کھوکھر،عرفان صدیقی بھی موجود ،مریم نواز کی تقریب حلف برداری میں ان کے بیٹے جنید صفدر بھی موجود تھے ۔

ضرور پڑھیں:مریم نواز پنجاب کی پہلی خاتون وزیراعلیٰ منتخب ہوگئیں
 مریم نواز نےبطور وزیر اعلیٰ پنجاب حلف نامے پر دستخط کیے،مریم نواز نے شہباز شریف اور والد نواز شریف کو گلےلگایا،گورنر پنجاب محمد بلیغ الرحمن ،شہباز شریف اور نواز شریف نے مریم نواز کو مبارکباد دی ۔وزیر اعلیٰ پنجاب مریم نواز شریف نے تقریب میں موجود مہمانوں کا شکریہ ادا کیا ،مریم نواز کا کہنا تھا کہ آپ سب کا دل کی آتھا گہرائیوں سے  شکریہ ادا کرتی ہوں۔

(24 نیوز)نومنتخب وزیر اعلیٰ پنجاب مریم نواز نے اپنے خطاب میں  5سال کا پلان بتادیا۔

مریم نواز کہتی ہیں کہ میاں نوازشریف کےساتھ مل کر 5سال کا پلان ترتیب دیا، میرا مشن یوتھ کی زندگیوں میں بہتری لےکر آنا ہے،یوتھ کو لیپ ٹاپ چاہیےتو لیپ ٹاپ، ٹیب چاہیےتو ٹیب دیں گے، نوجوانوں کو بلاسود قرضے ملیں گے۔آئی ٹی اسٹارٹ اپس کیلئے تمام وسائل مہیاکریں گے۔

ضرور پڑھیں:مریم نواز پنجاب کی پہلی خاتون وزیراعلیٰ منتخب ہوگئیں

یاد رہے  سابق وزیر اعظم نواز شریف کی صاحبزادی مریم نواز پنجاب کی بھاری اکثریت سے پہلی خاتون وزیراعلیٰ منتخب ہوگئی ہیں ۔

(24 نیوز) مسلم لیگ ن کے سینئر رہنما اور سابق وفاقی وزیر رانا ثناء اللہ نے کہا ہے کہ آج پنجاب کی بہادر بیٹی خدمت کے سب سے بڑے منصب پر فائز ہونے جا رہی ہیں، اب مریم نواز خدمت کی روایات کو آگے بڑھائیں گی،مریم نواز صاحبہ میرٹ پر کام کریں گی، ان کو تمام طبقات کا تعاون حاصل رہے گا۔

پنجاب اسمبلی کے باہر میڈیا سے گفتگو کرتے ہوئے رانا ثناء اللہ کا کہنا تھا کہ پنجاب کی تاریخ ہزاروں سالوں پر محیط ہے، خدمت کی جو روایات نوازشریف نے بطور وزیراعلیٰ کے منصب پر رہتے قائم کیں، نواشریف کی روایات کو شہبازشریف نے آگے بڑھایا، اب مریم نواز خدمت کی روایات کو آگے بڑھائیں گی،پنجاب اسمبلی میں تاریخی لمحہ دیکھنے آئے ہیں، مریم نواز پنجاب کی منتخب وزیراعلیٰ ہوں گی۔ 

لیگی رہنما کا کہنا تھا کہ مریم نواز پنجاب میں سیاسی اور معاشی استحکام میں اپنا کردار ادا کریں گی، جب منتخب حکومت چارج سنبھالے گی تو فیصلے کرے گی، ضمنی الیکشن ان لوگوں کا بنیادی حق ہے جنہوں نے حلقوں میں محنت کی،پورے پاکستان کی سیاست میں بدتمیزی اور بدتہذیبی کا سلسلہ گزشتہ 4 سال سے جاری ہے، پاکستان سیاسی عدم استحکام کا شکار ہے، پاکستان کو سیاسی استحکام دینا بڑا چیلنج ہے، سیاسی استحکام سے ہی معاشی استحکام آئے گا۔

رانا ثناء اللہ کا کہنا تھا کہ ان کے اوپر 2018 میں دھاندلی کا الزام تھا، وہ کہتے تھے آئینی و قانون طریقہ کار اپنائیں، اب وہ بھی آئینی و قانونی طریقہ کار اپنائیں اور ریلیف لیں، میں پارٹی کے ساتھ ہوں، پارٹی جہاں چاہے گی میں حاضر ہوں،ہماری کوشش ہے کہ عوام کو مسائل سے باہر نکالیں۔
 

(24 نیوز )وزیر اعلیٰ پنجاب کیلئے مضبوط امیدوار  کے طور پر سامنے آنے والی مریم نواز کے بارے میں بہت سے لوگ ان کے بارے میں جاننا چاہتے ہیں ، ان کی بطور کارکن اور پھر بطور لیڈر محنت اور جدوجہد سے بھی بہت سے لوگ نا واقف ہیں ۔ 

مریم نواز 28 اکتوبر 1973 کو  پاکستانی سیاست دان اور پاکستان کے تین بار وزیر اعظم رہنے والے نواز شریف گھر پیدا ہوئیں ، ، مریم نے اپنی عملی سیاست کا آغاز2012 میں کیا اس سے قبل وہ  خاندان کے فلاحی کاموں کی سرپرست رہیں ،وہ ایک عرصے تک شریف ٹرسٹ، شریف میڈیکل سٹی اور شریف ایجوکیشن انسٹی ٹیوٹ کی چیئرپرسن کے طور پر خدمات سر انجام دیتی رہیں، 2013 کے عام انتخابات کے دوران انہیں پاکستان مسلم لیگ (ن) کی انتخابی مہم کا انچارج بنایا گیا ، انتخابات کے بعد انہیں وزیراعظم یوتھ پروگرام کی چیئرپرسن مقرر کیا گیا لیکن عمران خان کی جانب سے اقربا پروری کی بنیاد پر ان کی تقرری کو تنقید کا نشانہ بنانے اور ان کی ڈگری کو لاہور ہائی کورٹ میں چیلنج کرنے کے بعد انہوں نے 2014 میں استعفیٰ دے دیا تھا۔

اس کے بعد مریم نے پی ٹی آئی کی جانب سے درپیش چیلنجز سے نمٹنے کے لیے مسلم لیگ ن کے سوشل میڈیا کا کنٹرول سنبھال لیا،مارچ 2017 میں انہیں برٹش براڈکاسٹنگ کارپوریشن (بی بی سی )کی جانب سے  دنیا کی 100 طاقتور ترین خواتین میں منتخب کیا گیا اور کچھ ہی عرصہ بعد دسمبر 2017 میں انہیں نیویارک ٹائمز کی جانب سے دنیا بھر کی 11 طاقتور خواتین کی فہرست میں شامل کر لیا گیا ،

مریم نوا ز2017 میں سیاسی طور پر اس وقت سرگرم ہوئیں جب ان کے والد کو پاناما پیپرز کیس اور متحدہ عرب امارات میں ملازمت کے ذریعے منی لانڈرنگ کے سلسلے میں سپریم کورٹ آف پاکستان کی جانب سے نااہل قرار دیا گیا اور سزا سنائی گئی، انہوں نے حلقہ این اے 120 میں ضمنی انتخابات کے دوران اپنی والدہ کلثوم نواز کے لیے مہم چلائی۔

جون 2018 میں انہیں حلقہ NA-127 اور PP-173 سے 2018 کے عام انتخابات میں حصہ لینے کے لیے مسلم لیگ ن کا ٹکٹ دیا گیا تھا،جولائی میں انہیں قومی احتساب بیورو (نیب) کی جانب سے دائر ایون فیلڈ کیس میں کرپشن کے الزام میں 7 سال قید کی سزا سنائی گئی تھی، جب کہ ان کے والد نواز شریف کو 9 ماہ طویل ٹرائل میں 10 سال قید کی سزا سنائی گئی تھی، انہیں "اپنے والد کی جائیدادیں چھپانے میں اہم کردار" پائے جانے کے بعد اکسانے کے جرم میں 7 سال کی سزا سنائی گئی، جس میں نیب کے ساتھ عدم تعاون پر مزید ایک  سال قید کی سزا بھی شامل تھی ۔ 

سپریم کورٹ کی جانب سے فیصلے کے نتیجے کے طور پر وہ 10 سال کے لیے سیاست سے نااہل ہوگئیں جس کے بعد مسلم لیگ (ن) نے علی پرویز اور ملک عرفان شفیع کھوکھر کو بالترتیب حلقہ NA-127 اور PP-173 سے 2018 کے انتخابات میں حصہ لینے کے لیے نامزد کیا۔

اسلام آباد ہائی کورٹ میں اپنی سزا کے خلاف مریم کی اپیل کے بعد انہیں اور ان کے والد کو 19 ستمبر 2018 کو اڈیالہ جیل سے رہا کر دیا گیا جب اسلام آباد ہائی کورٹ نے انہیں ایون فیلڈ کرپشن کیس میں ضمانت اور ان کی متعلقہ قید کی سزائیں معطل کر دیں،تاہم انہیں 8 اگست 2019 کو نیب لاہور کی جانب سے چودھری شوگر ملز کرپشن کیس کے سلسلے میں ایک اور گرفتاری کا سامنا کرنا پڑا، انہیں کوٹ لکھپت جیل میں قید کیا گیا جہاں ان کے والد نواز شریف بھی قید تھے ،اس کے بعد لاہور ہائی کورٹ سے رجوع کرنے پر 6 نومبر 2019 کو  ضمانت کی درخواست منظو ر ہو گئی اور اس طرح ان کی رہائی کا پروانہ جاری کر دیا گیا ۔

19 نومبر کو ان کے والد نواز شریف ضمانت پر رہا ہونے کے صرف 20 دن بعد برطانیہ روانہ ہوئے، مسلم لیگ (ن) کے رہنماؤں نے اس بات پر زور دیا کہ نواز شریف کا جلاوطنی کا کوئی ارادہ نہیں ہے، اس کے باوجودانہوں نے 4سال کے لیے برطانیہ میں خود ساختہ جلاوطنی کا انتخاب کیا اور اکتوبر 2023 میں پاکستان واپس آ گئے،مریم اپنے والد کی برطانیہ میں 4سالہ خود ساختہ جلاوطنی کے دوران  مسلم لیگ (ن) کو فرنٹ فٹ پر لیڈ کرتی نظر آئیں ،2019 میں انہیں مسلم لیگ ن کی نائب صدر مقرر کیا گیا،اس کے بعد انہوں نے ملک بھر میں حکومت مخالف ریلیوں کی قیادت کی۔

29 ستمبر 2022 کو شہباز شریف کے وزیر اعطم بننے کے بعد اسلام آباد ہائی کورٹ نے ان کی بدعنوانی کی سزا کو کالعدم قرار دے دیا اور ان کے رشتہ داروں کیخلاف بہت سے مقدمات کی پیروی کرنے سے انکار کر دیا اور پھر وہ دوبارہ الیکشن لڑنے کی اہل ہو گئیں،3 جنوری 2023 کو مریم کو مسلم لیگ ن کی سینئر نائب صدر کے طور پر مقرر کیا گیا، جس سے وہ مسلم لیگ ن کے سینئر ترین رہنماؤں میں سے ایک بن گئیں، اس فیصلے کی منظوری شہباز شریف نے دی جو پارٹی کے صدر بھی تھے، انہیں پارٹی کی "چیف آرگنائزر" کے طور پر بھی مقرر کیا گیا تھا جس میں پارٹی کو ہر سطح پر تنظیم نو کا مینڈیٹ دیا گیا تھا۔

مریم نواز 2024 کے عام انتخابات میں مسلم لیگ ن کی امیدوار کے طور پر لاہور سے قومی اسمبلی کےحلقہ NA-119 سے پاکستان کی قومی اسمبلی کی نشست اور PP-159 لاہور-XV سے پنجاب کی صوبائی اسمبلی کی نشست کے لیے منتخب ہوئیں ، یہ مریم نواز کا پہلا باقائدہ الیکشن تھا ،انتخابات کے بعد مریم نواز کو مسلم لیگ (ن) نے صوبہ پنجاب میں وزیراعلیٰ کے لیے اپنا امیدوار نامزد کیااور اس کام کو عملی جامہ پہنانے کیلئے مسلم لیگ (ن)نے پاکستان پیپلز پارٹی سے اتحاد بھی کر رکھا ہے، اس طرح  مریم نواز پنجاب کی پہلی خاتون وزیر اعلیٰ کے طور پر سامنے آئیں گی ۔

(24 نیوز)مسلم لیگ ن نے نامزد وزیر اعلیٰ پنجاب مریم نواز کے سوا سینئر پارٹی قیادت کو صوبائی اسمبلی کی نشستیں چھوڑنے کی ہدایت کر دی۔

ذرائع ن لیگ کے مطابق شہباز شریف قصور اور لاہور کی صوبائی نشستیں چھوڑ دیں گے جبکہ حمزہ شہباز لاہور کی صوبائی نشست چھوڑیں گے۔ سردار غلام عباس چکوال کی صوبائی نشست چھوڑیں گے جبکہ رانا تنویر شیخوپورہ کی صوبائی نشست سے دستبردار ہوں گے۔

ضرورپڑھیں:وزیراعلیٰ منتخب ہونے سے پہلے ہی مریم نواز مستعفی
سیکرٹری جنرل مسلم لیگ ن احسن اقبال نارووال کی صوبائی نشست چھوڑیں گے جبکہ سردار اویس لغاری ڈیرہ غازی خان کی صوبائی نشست چھوڑیں گے اور جام کمال لسبیلہ کی صوبائی نشست سے دستبردار ہوں گے۔

خیال رہے کہ آج ہونے والے پنجاب اسمبلی کے اجلاس میں نو منتخب اراکین حلف اٹھائیں گے جبکہ بلوچستان اسمبلی کا اجلاس تاحال طلب نہیں کیا گیا ہے۔

(راؤ دلشاد)نامزدوزیراعلیٰ پنجاب مریم نوازپنجاب اسمبلی پہنچ گئیں،اسمبلی اجلاس میں شرکت سے پہلے قومی اسمبلی کی نشست سے استعفیٰ دے دیا ہے۔
مسلم لیگ ن کی طرف سے وزیراعلیٰ پنجاب کیلئے نامزد امیدوار مریم نواز کے ساتھ مریم اورنگزیب اور پرویز رشید بھی اسمبلی آئے۔مریم نواز پنجاب اسمبلی کے بیک گیٹ سے اسمبلی پہنچیں۔

مریم نواز نےاین اے ایک سو انیس  سے استعفٰی دے دیا۔عام انتخابات میں مریم نواز قومی اسمبلی کےحلقے این اے 119سے بھی کامیاب ہوئی تھیں۔

ضرورپڑھیں:پنجاب اسمبلی کا اجلاس کچھ دیر بعد شروع ہوگا،نومنتخب ارکان اسمبلی حلف اٹھائیں گے  

ن لیگ کی رہنما عظمیٰ بخاری کہتی ہیں کہ مریم نواز آج اپنی پارلیمانی سیاست کا آغاز کریں گی۔بزدار اور چوہدری پرویز الہٰی دور کی باقیات ختم کرنے جارہے ہیں۔ آج صرف نومنتخب ارکان اسمبلی حلف اٹھائیں گے،اسپیکر اور ڈپٹی اسپیکر پنجاب اسمبلی کا انتخاب کل ہوگا۔

دوسری جانب پنجاب میں اقتدارکی منتقلی کےمرحلےکا آغاز ہوگیا ہے،عام انتخابات 2024 کے بعد پنجاب اسمبلی کا پہلا اجلاس آج ہوگا۔اسپیکرسبطین خان کی صدارت میں اجلاس 10 بجےطلب کیا گیا،نومنتخب ارکان آج اجلاس میں حلف اٹھائیں گے،جہاں مریم نوازکا بھی بطور وزیراعلی پنجاب حلف اٹھائے جانےکا امکان ہے۔