چیمپئنزٹرافی کے5 مقابلوں میں پاکستان کا پلڑا بھاری 

(24 نیوز )آئی سی سی چیمپئنز ٹرافی کے گزشتہ ایونٹس میں دونوں ٹیموں کے درمیان ہونے والے مقابلوں کی بات کی جائے تو اس میں پاکستان ٹیم کا پلڑا بھاری ہے۔

چیمپئنز ٹرافی ایونٹس میں دونوں ٹیمیں 5 بار آمنے سامنے آئی ہیں جن میں سے 3 بار پاکستان فاتح  رہا ہے جب کہ  2 بار بھارت کو فتح حاصل ہوئی ہے۔

 دونوں ٹیمیں پہلی بار 2004 کی چیمپئنز ٹرافی میں آمنے سامنے آئی تھیں، انگلینڈ کے شہر برمنگھم میں کھیلےگئے میچ میں انضام الحق کی قیادت میں پاکستانی ٹیم نے بھارت کو 3 وکٹوں سے شکست دی تھی۔

 مزید پڑھیں:یووراج سنگھ نے پاکستان کو فیورٹ قرار دیدیا

 دوسری بار دونوں ٹیموں کا ٹاکرا 2009 میں ہوا تھا جس میں بھی قومی ٹیم نے بھارت کو 54 رنز سے شکست دی تھی۔

 تیسری بار اس ایونٹ میں دونوں ٹیمیں 2013 میں برمنگھم میں ٹکرائی تھیں جہاں پہلی بار بھارتی ٹیم کو فتح حاصل ہوئی تھی۔ بارش سے متاثرہ میچ میں پاکستانی ٹیم 40 ویں اوور میں 165 رنز بنا کر آؤٹ ہوگئی تھی، پاکستان  ٹیم کی قیادت مصباح الحق کے ہاتھ میں تھی۔ 

 چوتھی بار دونوں ٹیمیں 2017 میں  ایک بار پھر برمنگھم میں آمنے سامنے آئیں جہاں جیت دوبارہ بھارتی ٹیم کے حصے میں آئی۔ بھارت نے پہلے کھیلتے ہوئے 48 مقررہ اوور میں 319 رنز بنائے جس کے جواب میں قومی ٹیم 34 ویں اوور میں 164 رنز بنا کر آؤٹ ہوگئی۔

مزید پڑھیں:رمیز راجہ نےپاکستان کو بھارت کیخلاف جیت کافارمولا بتا دیا

 پانچویں بار دونوں ٹیموں کا ٹاکرا چیمپئنز ٹرافی 2017 کے فائنل میں ہوا جہاں سرفراز احمد کی قیادت میں پاکستان ٹیم نے بھارت کو 180 رنز کے بھاری مارجن سے شکست دی اور پہلی بار  چیمپئنز ٹرافی جیتنےکا اعزاز حاصل کیا۔