اسلام آباد:جماعت اسلامی کادھرنا،قافلے پہنچنا شروع

دھرنا،10مطالبات کی منظوری،جماعت اسلامی اپنے موقف پر ڈٹ گئی

(24 نیوز)اِس وقت ملک میں جماعت اسلامی کا نام لیا جارہا ہے۔وہ لوگ بھی جو کبھی جماعت اسلامی کے ساتھ وابستہ نہیں رہے،آج اِس جماعت کی حمایت کر رہے ہیں۔ کیونکہ جماعت اسلامی نے ٹائمنگ کےاعتبار سےا سلام آباد میں دھرنا دیا ہے ،جماعت اسلامی نے ایسے وقت میں اسلام آباد کی طرف مارچ اور دھرنے کی کال دی جب عوام کا بجلی کے بلوں اور مہنگائی کی وجہ سے شدید اضطراب میں مبتلا ہیں ۔اب جماعت اسلامی ہی ہے جو عوامی ایشوز پر سراپا احتجاج ہے ،ابھی کوئی دوسری سیاسی جماعت ایسی نہیں جو بجلی کے بلوں،آئی پی پیز معاہدوں اور بیروز گاری کے خلاف اس طرح احتجاج کر رہی ہو،جیسے جماعت اسلامی کر رہی ہے۔یہی وجہ ہے سیاسی وابستگی سے بالاتر ہو کر عوام جماعت اسلامی کے لیاقت باغ راولپنڈی میں دھرنے کی حمایت کر رہے ہیں۔کیونکہ عوام کو اِس وقت اپنے روزمرہ کے معاملات کو حل کروانے میں دلچسپی ہے،اور تحریک انصاف کو بھی اِس بات کا اداراک ہے کہ اگر جماعت اسلامی دھرنے کے ذریعے کوئی بڑا بریک تھرو حاصل کرلیتی ہے تو پھر تحریک انصاف کی سیاست کو دھچکا لگے گا،شاید یہی وجہ ہے کہ تحریک انصاف جماعت اسلامی کے دھرنے کی حمایت کا اعلان کر رہی ہے۔
اب تجزیہ کار کہتے ہیں کہ تحریک انصاف کو اِس وقت جلسوں اور احتجاج کرنے کی اجازت نہیں مل رہی ایسے میں اگر جماعت اسلامی اپنے مطالبات حکومت سے منوا لیتی ہے تو تحریک انصاف بہت پیچھے رہ جائے گی،لیکن یہ بات مفروضے پر مبنی ہے کیونکہ ایسا اُسی صورت میں ممکن ہے کہ حکومت جماعت اسلامی کے مطالبات کے آگے سرینڈر کردے،لیکن وزیر توانائی کہہ چکے ہیں کہ آئی پی پیز معاہدوں کو کسی صورت نہیں بدلا جائے گا۔
دوسری جانب جماعت اسلامی کا دھرنا پانچویں روز بھی جاری ہے،امیر جماعت السلامی حافظ نعیم الرحامن دو ٹوک انداز میں کہہ چکے ہیں کہ جب تک مطالبات پورے نہیں کئے جاتے تب تک جماعت اسلامی جان نہیں چھوڑے گی ۔
اب ایک طرف حکومت جماعت اسلامی کے آئی پی پیز سے کئے گئے معاہدوں میں تبدیلی کے مطالبے کو تسلیم کرنے کو تیار نہیں دوسری جانب جماعت اسلامی اپنے مطالبے سے پیچھے ہٹنے کو تیار نہیں ،کل حکومت اور جماعت اسلامی میں مذاکرات کا دور ہوا جس میں جماعت اسلامی نے حکومت کے سامنے اپنے مطالبات رکھے اور جواب میں وفاقی وزیر اطلاعات نے یہ یقین دہانی بھی کروائی کہ جماعت اسلامی کے مطالبے پر غور کیا جائے گا اور جماعت اسلامی کے گرفتار کارکنوں کو رہا کردیا جائے گا جبکہ دوسری جانب حافظ نعیم الرحمان کا یہ دعوی ہے کہ حکومت ایک طرف مذاکرات اور دوسری طرف گرفتاریاں کر کے ڈبل گیم کر رہی ہے۔

اب جماعت اسلامی کی جانب سے مطالبہ کیا گیا ہے کہ 500 یونٹ بجلی استعمال کرنے والوں کو 50 فیصد رعایت دی جائے، پیٹرولیم لیوی ختم، پیٹرولیم مصنوعات کی قیمتوں میں حالیہ اضافہ واپس لیا جائے، اشیائے ضروریہ کی قیمتوں میں 20 فیصد کمی کی جائے، اسٹیشنری آئٹمز پر لگائے گئے ٹیکس فوری ختم کیے جائیں۔حکومتی اخراجات کم کر کے غیر ترقیاتی اخراجات پر 35 فیصد کٹ لگایا جائے، کیپیسٹی چارجز اور آئی پی پیز کو ڈالروں میں ادائیگی کا معاہدہ ختم کیا جائے۔ آئی پی پیز کے ساتھ کیے گئے تمام معاہدوں کا از سرنو جائزہ لیا جائے۔جماعت اسلامی نے مطالبہ کیا کہ زراعت اور صنعت پر ناجائز ٹیکس ختم اور 50 فیصد بوجھ کم کیا جائے۔ صنعت، تجارت اور سرمایہ کاری کو یقینی بنایا جائے تاکہ نوجوانوں کو روزگار ملے۔تنخواہ دار طبقے پر ٹیکس ختم کیے جائیں، مراعات یافتہ طبقے کو ٹیکس نیٹ میں لایا جائے۔اب یہ بات تو حقیقت ہے کہ عوام بجلی کے بلوں کے بوجھ تلے دب رہے ہیں ،کبھی خودکشیاں کر رہے ہیں تو کبھی بھائی دوسرے بھائی کو قتل کر رہا ہے،پہلے گوجروانوالہ میں بھائی نے بھائی کو بجلی کے بل کی وجہ سے قتل کیا اب ایک اور ایسا درد ناک واقعہ گوجروانوالہ ہی میں پیش آیا ہے جہاں آپریشن کے پیسے بجلی کے بل میں جمع کرانے پر مریضہ دلبرداشتہ ہوگئی اور نالے میں چھلانگ لگا کر اپنی جان دے دی ،اِس درد ناک واقعے کی سی سی ٹی وی بھی سامنے آئی تھی، ویڈیو میں دیکھا جا سکتاہے بیٹی نے بچانے کی کوشش کی لیکن والدہ نالے میں کود گئیں۔خاتون کے بیٹے عثمان کا کہنا تھا کہ جولائی کا بجلی کا بل 10 ہزار روپے آیا اور والدہ کے ہرنیہ کے آپریشن کے لیے جمع رقم سے بل جمع کرانا پڑا۔بیٹے نے بتایاکہ پیسے بجلی بل میں خرچ ہونے پر والدہ دلبرداشتہ تھیں اور نالے میں چھلانگ لگا دی۔اب آئے روز بجلی کے بلوں سے تنگ آکر خود کشیوں اور قتل کے واقعات میں اضافہ ہورہا ہے،ایسے میں ضرورت اِس بات کی ہے کہ حکومت سنجیدگی سے اِس معاملے پر سوچےا ور بجلی کی مد میں عوام کے فوری ریلیف کا بندوبست کرے۔مزید دیکھئے یہ ویڈیو

جماعت اسلامی کا دھرنا،پولیس نے خواتین کو راولپنڈی جانے سے روک دیا

(اقصیٰ سجاد،عاجز جمالی)پولیس کی جانب سے اسلام آباد دھرنے کیلئے جانے والی خواتین کے بسوں کو روکنے پر منصورہ ملتان روڈ پر جماعت اسلامی خواتین نے احتجاجی مظاہرہ کرتے ہوئے دھرنا دیدیا۔

احتجاجی مظاہرے کے دوران خواتین نے ریاستی غنڈی گردی اور پولیس کے خلاف نعرے بازی کی۔ خواتین کا کہنا ہے کہ گھروں سے مائیں بہنیں صبح سویرے اپنی قوم کے حق میں لڑنے نکلی ہیں،حکومت کو چاہئے کہ ریاستی غنڈی گردی بند کردے۔

دھرنے کے باعث ملتان روڈ پر ٹریفک روانی متاثر ہوئی،پنجاب پولیس نے راولپنڈی جانے والی بسیں روک کر قبضے میں لے لیں۔

 دوسری جانب گورنر سندھ کامران خان ٹیسوری نے جماعت اسلامی کے گورنر ہاؤس کے باہر دھرنا کے اعلان پر اپنے ایک بیان میں کہا ہے کہ  جماعت اسلامی کا گورنر ہاؤس کے باہر دھرنا ان کا جمہوری حق ہے۔  گورنر ہاؤس کے باہر دھرنا کو خوش آمدید کہتا ہوں، گورنر ہاؤس کے دروازے عوام کے لئے پہلے ہی کھول دیئے ہیں۔ 

 گورنر سندھ کا کہنا تھا کہ  دھرنا مظاہرین گورنر ہاؤس میں جاری آئی ٹی کلاسز کا خیال رکھیں، قوم کے معماروں کی تربیت اور ان کی دیکھ بھال سب کی ذمہ داری ہے،احتجاج وہاں کریں جہاں مسائل کا حل ممکن ہو۔

جب رکاوٹیں کھڑی کریں گے تو وہ توڑی بھی جائیں گی: حافظ نعیم

 (24نیوز) امیر جماعت اسلامی حافظ نعیم الرحمان نے کہا ہے کہ آئی پی پیز سے معاہدے غیر قانونی ہیں، قوم کے سامنے لائے جائیں۔

راولپنڈی میں دھرنے کے شرکاء سے خطاب کرتے ہوئے امیر جماعت اسلامی حافظ نعیم الرحمان کا کہنا تھا کہ آج دھرنے کو 4 دن ہوگئے ہیں، یہ تاریخی دھرنا عزم ،ہمت اور حوصلے کا پیغام بن کر دنیا کے سامنے آرہا ہے، بجلی بلوں کے بم گررہے ہیں کوئی پوچھنے والا نہیں، اب بات خودکشیوں تک پہنچ چکی ہے۔

انہوں نے کہا کہ چیلنج سیاسی لوگ کرتے ہیں، سیاسی پارٹیوں کی ذمہ داری ہوتی ہے عوام پر ہونے والے ظلم کو چیلنج کریں، جو ماحول بنا دیا گیا ہے جماعت اسلامی کے سوا کوئی آواز سامنے نہیں آرہی، جماعت اسلامی نے فیصلہ کیا کہ 25کروڑ عوام کی ترجمانی کرے گی۔

حافظ نعیم الرحمان کا کہنا تھا کہ ہم پرامن مزاحمت کرتے ہوئے مری روڈ پر موجود ہیں، افسوس ہے لاہور میں خواتین کے ساتھ برا سلوک کیا گیا، خواتین کو چاروں طرف سے ناکہ بندی کرکے روکا گیا ہے، سیکڑوں، ہزاروں خواتین کے راستے روکے گئے، صوبائی اور وفاقی حکومت رکاوٹیں کھڑی کرکے اپنے لیے مشکل حالات پیدا کررہی ہے۔

امیر جماعت اسلامی نے کہا کہ مطالبہ کررہا ہوں فوری رکاوٹیں ختم کی جائیں، ہماری ماؤں ،بہنوں اور بیٹیوں کو دھرنے میں شرکت کرنے دی جائے، ان حالات کا سامنا گھر کی عورت ہی کرتی ہے، جب خواتین اپنے حق کیلئے نکلتی ہیں تو آپ رکاوٹیں کھڑی کرتے ہیں، یہ بزدلانہ کام کیے جارہے ہیں۔

ان کا کہنا تھا کہ پاکستان تصادم کا راستہ برداشت نہیں کرسکتا، جب رکاوٹیں کھڑی کریں گے تو وہ توڑی بھی جائیں گی،پھر ہم سے شکایات نہ کریں، گزشتہ حکومتوں نے آئی پی پیز کو طاقتور بنایا ہے، آئی پی پیز معاہدوں میں جھوٹ اور دھوکا ہے، بتایا جائے جو معاہدہ ہوا وہ کیا تھا اور حقیقت میں کیا ہے۔

حافظ نعیم الرحمان نے کہا کہ اصل حق اس کا ہوتا ہے جو قانونی طریقے سے معاہدہ کرتا ہے، کپیسٹی چارجز ختم کرنے پر کس نے حکومت کا ہاتھ روکا ہے، ہم کیوں اپنے بجلی بلوں میں ان پیسوں کو ادا کریں، بجلی کے بلوں میں ٹیکسز ہم کیوں ادا کریں۔

امیر جماعت اسلامی نے کہا کہ ہم نے مذاکرات کے پہلے دور میں اپنے مطالبات حکومت کے سامنے رکھ دیئے ہیں، ہمیں کپیسٹی چارجز کسی طور قابل قبول نہیں، حکومت کو واضح کیا ہے کہ مراعات بالکل ختم کرنا پڑیں گی۔

ان کا کہنا تھا کہ حکومت بتائے کیا واپڈا اوردوسرے محکموں کے افسران کو بجلی مفت نہیں ملتی؟ ایک بہت بڑے طبقے کو پٹرول مفت ملتا ہے، بڑی بڑی گاڑیوں میں گھومتے ہیں، ان کو گھر اور ذاتی استعمال کیلئے پٹرول مفت ملتا ہے، مفت پٹرول مختلف افسران کو ملتا ہے۔

انہوں نے کہا کہ جو افسران کی بڑی گاڑیوں کو مفت پٹرول ملتا ہے اس کی ادائیگی ہم کرتے ہیں، تمام افسران کیلئے طے کیا جائے کہ وہ 1300سی سی سے بڑی گاڑی استعمال نہ کریں، محمد خان جونیجو کے دور میں تمام بڑے لوگوں کیلئے 1000سی سی سے اوپر گاڑی نہیں ہوتی تھی، اب کم از کم 1300سی سی گاڑی پر تو آجائیں۔

انہوں نے مطالبہ کیا کہ عالمی مارکیٹ میں پٹرول کی قیمتیں کم ہوئی ہیں، آپ پٹرول پر لیوی ختم کریں، نااہلی آپ کی ہو اور پیسے ہم کیوں دیں؟ آپ نے فکس ڈیوٹی لگا دی ہے، آپ انڈسٹری تباہ کرکے کیسا کھیل کھیل رہے ہیں؟ آپ اس بیروزگاری کو کہاں لیکر جائیں گے، ہمارے تمام مطالبات عوام کی آواز ہیں۔

حافظ نعیم الرحمان کا کہنا تھا کہ ہمارا مطالبہ ہے ساری مراعات ختم ہونی چاہئیں، ایک ایک آئی پی پی کا فرانزک آڈٹ ہو، قوم 2600 ارب روپے آئی پی پیز معاہدوں کی مد میں ادا کرتی ہے، آپ تنخواہ دار لوگوں کو برباد نہ کریں،چاہے وہ پرائیویٹ سیکٹر کے ہوں یا گورنمنٹ کے۔

جماعت اسلامی کا دھرنا اور پی ٹی آئی کا احتجاج،اسلام آباد کے تمام راستے جزوی بلاک، میٹرو سروس بھی بند

(24نیوز)اسلام آباد میں جماعت اسلامی کے دھرنے اور پی ٹی آئی کی احتجاج کی کال پر ریڈ زون اور راولپنڈی سے دارالحکومت آنے والے راستوں کنٹینر لگاکر جزوی طور پر بند کردیا گیا۔

فیض آباد کے مقام پر راولپنڈی جانے والے راستہ کنٹینرز لگا کر بند کر دیا گیا ہے اور مری روڈ پر چاندنی چوک اور سکستھ روڈ پر کنٹینر پہنچادیئے گئے ہیں،ترجمان جماعت اسلامی کا کہنا ہے کہ بجلی کے بھاری بلوں اور مہنگائی کے خلاف دھرنا ضرور ہوگا اور قافلے اسلام آباد کی طرف رواں ہیں۔

امیر جماعت حافظ نعیم الرحمان اور نائب امیر لیاقت بلوچ اسلام آباد موجود ہیں، لیاقت بلوچ کے گھر چھاپے میں دو ملازمین کو حراست میں لے لیا گیا،جماعت اسلامی نے لاہور، گجرات، وہاڑی، سرگودھا، حافظ آباد اور فیصل آباد سے متعدد کارکنان کو حراست میں لئے جانے کا دعویٰ کیا ہے۔

دوسری جانب پی ٹی آئی نے بانی پی ٹی آئی، گرفتار کارکنوں کی رہائی اور مہنگائی کیخلاف احتجاج کا اعلان کیا ہے۔

علاوہ ازیں انتظامیہ کا کہنا ہےکہ احتجاج کے پیش نظر اسلام آباد میں میٹروبس سروس بند کردی گئی ہے، میٹروبس سروس آئی جے پی سے پاک سیکرٹریٹ تک بند کی گئی۔

انتظامیہ کے مطابق راولپنڈی میں میٹروبس سروس بحال ہے اور فیض آباد سےصدر تک میٹرو بس سروس چل رہی ہے۔

پولیس نے ایکسپریس چوک سے جماعت اسلامی کے کارکنوں کو گرفتار کرنا شروع کر دیا ،دھرنے کیلئے پہنچنے والے قافلے سے 5 کارکنوں کو حراست میں لے لیا گیا۔ 

اسلام آباد پولیس نے ڈی چوک کے قریب متعدد مظاہرین کو گرفتار کر لیا،ذرائع کا کہنا ہے کہ کارکنان کو انٹرچینج کے پاس جمع ہونے کے بعد ڈی چوک کی طرف پیش قدمی کی جائے گی۔ 

جماعت اسلامی ضلعی قیادت احتجاج کی قیادت کرے گی،پولیس کی جانب سے مختلف مقامات پر جماعت اسلامی کے کارکنان کی گرفتاری کا سلسلہ جاری ہے۔

تازہ ترین صورتحال کے مطابق تحریک انصاف نے اسلام آباد میں ہونے والا آج کا احتجاج ملتوی کر دیا،پی ٹی آئی کے رہنما عامر مغل عدالت نے ہمیں پیر کے روز احتجاج کی اجازت دی ہے، ہم عدالتی احکامات کی تعمیل کریں گے، اس حوالے سے پریس ریلیز کچھ دیر میں جاری کر رہے ہیں۔

دفعہ 144 کی خلاف ورزی کرنیوالوں سے سختی سے نمٹا جائیگا، عظمیٰ بخاری

(24 نیوز) صوبائی وزیر اطلاعات پنجاب عظمی بخاری نے کہا ہے کہ پنجاب میں دفعہ 144 دہشتگردی کے پیش نظر لگائی گئی ہے، جو بھی قانون کی خلاف ورزی کریگا اس سے سختی سے نمٹا جائے گا اور قانونی کاروائی کی جائے گی۔

  صوبائی وزیر اطلاعات پنجاب کا  کنہا ہے کہ احتجاج اور دھرنے کے نام پر شہریوں کی زندگیاں اجیرن بنانے کی ہرگز اجازت نہیں دی جائے گی، جو جماعت 2014 سے سڑکوں پر ہے تین دن گھروں میں آرام کر لے، ماضی سے لے کر اب تک تحریک انصاف کی سیاسی تاریخ سڑکیں اور چوک چوراہوں کے گرد ہی گھومتی  رہی ہے، پاکستان میں انتشار افراتفری اور ہیجان کی کیفیت پیدا کرنا ہی دھرنا پارٹی کا ایجنڈا ہے اور یہ اس پارٹی کے آغاز سے ہی رہا ہے۔

عظمیٰ بخاری نے کہا ہے کہ اڈیالہ جیل میں بیٹھے قیدی کا مشن دھرنوں کے ذریعے ہی اقتدار میں پہنچنا ہے لیکن اب پہلے جیسی سہولت کاری دستیاب نہیں اورنہ ہی دھرنے کے لیے وہ فنانسر میسر ہیں، آپ لوگوں کو اڑھائی گھنٹے والی بھوک ہڑتال ہی سوٹ کرتی ہے، 3 سے 7 والی ٹائمنگ بہتر ہے۔

ان کا کہنا ہے کہ دھرنا پارٹی کے پاس احتجاج اور دھرنے کے لیے خیبر پختونخواہ موجود ہے،کچھ دن پہلے بنوں میں ہونے والے افسوسناک واقعے پر ابھی بھی قوم کے بہت سارے سوالات موجود ہیں،خیبر پختونخواہ کے عوام کی بدقسمتی ہے کہ ان پر خرچ ہونے والا پیسہ اگلے پانچ سال تک دھرنوں اور احتجاج پر خرچ ہوگا۔

عظمیٰ بخاری نے اپنے بیان میں مزید کہا ہے کہ مریم نواز پنجاب کی عوام کو سستی روٹی، سستا آٹا، مفت ادویات دے رہی ہے جبکہ خیبر پختونخواہ کی عوام 11 سال سے انقلابی تقریریں اور ریاست مخالف پروپیگنڈے سے پیٹ بھر رہی ہے۔