عام انتخابات کا دنگل،نامور سیاستدان چاروں شانے چت، آزاد امیدوار سب سے آگے

رمشا خان سے تعلقات ، احد رضا میر نے خاموشی توڑ دی

(24 نیوز)پاکستانی اداکار احد رضا میر نے اداکارہ رمشا خان سے کے ساتھ تعلقات پر خاموشی توڑ دی۔

فنکار نے حالیہ انٹرویو میں اپنی نجی زندگی اور ساتھی اداکارہ کے ساتھ تعلقات کی افواہوں پر کھل کر بات کرنے سے انکار کر دیا۔صحافی کے ساتھ گفتگو کے دوران احد رضا میر سے سوشل میڈیا پر وائرل تصاویر اور افواہوں سے متعلق سوال کیا گیا۔ سوال میں اداکارہ رمشا خان کا نام تو نہیں لیا گیا، لیکن ان افواہوں کا حوالہ دیا گیا جو ان دونوں کے ممکنہ تعلقات کے بارے میں گردش کر رہی ہیں۔

جواب میں احد رضا میر نے کہا کہ میں بور قسم کا انسان ہوں۔ مجھے نہیں لگتا لوگوں کو میری زندگی کے بارے میں جاننے میں دلچسپی ہوگی۔ میں چاہتا ہوں کہ میری زندگی نجی رہے اور لوگ وہی سمجھیں جو وہ سمجھنا چاہتے ہیں۔انہوں نے مزید کہا کہ انہیں کسی تصویر یا پوسٹ پر وضاحت دینے کی ضرورت محسوس نہیں ہوتی۔ لوگ جو چاہیں سمجھیں، مجھے فرق نہیں پڑتا۔

واضح رہے کہ احد رضا میر نے مارچ 2020 میں اداکارہ سجل علی سے شادی کی تھی۔ تاہم، 2022 میں ان کے درمیان علیحدگی کی افواہیں منظر عام پر آئیں۔ دونوں نے کبھی ان خبروں کی تصدیق یا تردید نہیں کی، لیکن صحافی آمنہ عیسانی کی تصدیق کے مطابق، دونوں کے درمیان علیحدگی ہوچکی ہے۔

ریئر ایڈمرل (ر) معظم الیاس چیئرمین پورٹ قاسم اتھارٹی مقرر

(بابر شہزاد تُرک)ریئر ایڈمرل (ر) معظم الیاس کو چیئرمین پورٹ قاسم اتھارٹی مقرر کر دیا گیا۔وفاقی بیوروکریسی میں تقرر و تبادلے کئے گئے ہیں جن میں چیئرمین پورٹ قاسم اتھارٹی کا تقرر کیا ہے، سید معظم الیاس کی تقرری کنٹریکٹ کی بنیاد پر 3 سال کیلئے بمطابق مروجہ قواعد و ضوابط ایم پی سکیل 1 میں کی گئی ہے۔

 سیکریٹری داخلہ خرم آغا کو تفویض کئے گئے سیکرٹری نارکوٹکس کنٹرول ڈویژن کے اضافی چارج میں 3 ماہ کی توسیع کی گئی ہے جو کہ  رواں برس 25 ستمبر سے شمار ہو گی، مزید برآں تقرر کے منتظر گریڈ 21 کے جودت ایاز کو اسٹیبلشمنٹ ڈویژن میں او ایس ڈی بنا کر ان کی 2 ماہ کی رخصت منظور کی گئی ہے۔

 جوائنٹ سیکریٹری، وزارتِ نیشنل فوڈ سکیورٹی امجد احمد کا تبادلہ کر کے ان کو اسٹیبلشمنٹ ڈویژن رپورٹ کرنے کی ہدایت کی گئی ہے ، ڈپٹی سیکریٹری جان بہادر کا وزارتِ مذہبی اُمور سے آبی وسائل ڈویژن تبادلہ کیا گیا ہے، اسٹیبلشمنٹ ڈویژن نے تقرر و تبادلوں کے باضابطہ نوٹیفکیشن جاری کر دیئے ہیں۔

شاہ رخ نہ سلمان، بھارت میں سب سے مقبول اداکار کون؟ فہرست جاری

(ویب ڈیسک)بھارت کی ساؤتھ کی فلم انڈسٹری کے اداکاروں نے معاوضے ، فلم کے بزنس کے بعد اب عوام میں مقبولیت میں بھی بالی ووڈ کے بڑے ناموں کو پیچھے چھوڑ دیا ہے۔

بھارتی میڈیا رپورٹس کے مطابق ساؤتھ فلم انڈسٹری کے سپر سٹار پربھاس فلم 'کلکی 2898 اے ڈی' کی شاندار کامیابی کے بعد بھارت میں سب سے مقبول اداکار بن گئے۔انہوں نے شاہ رخ خان، سلمان خان اور امیتابھ بچن جیسے بڑے سپر سٹارز کو پیچھے چھوڑ دیا۔ 

بھارتی میڈیا کے مطابق بدھ کو ملک کی پیشہ ورانہ میڈیا فرم اورمیکس نے 'سٹارز انڈیا لووز' اکتوبر کے سب سے مقبول اداکاروں کی فہرست جاری کی جس میں پربھاس کا پہلا نمبر تھا۔اداکار وجے اس فہرست میں دوسرے نمبر پر رہے جبکہ شاہ رخ خان  تیسرے ، جونیئر این ٹی آر چوتھے اور اجیت کمار پانچویں نمبر پر رہے۔

اداکار الو ارجن جو جلد ہی فلم پشپا 2 میں نظر آئیں گے، اس فہرست میں چھٹے نمبر پر ہیں۔اس کے علاوہ مہیش بابو ساتویں، سوریا آٹھویں اور رام چرن نویں پوزیشن پر ہیں۔سلمان خان، جن کی آخری فلم 2023 میں ریلیز ہوئی تھی،ان کا نمبر10واں رہا۔

ٹیکس فراڈ کی نشاندہی کرنے والے ایف بی آر افسر کیلئے 50 لاکھ انعام کا اعلان  

(24نیوز)وزیر اعظم شہباز شریف نے ٹیکس فراڈ کی نشاندہی کرنے والے ایف بی آر افسر کیلئے 50 لاکھ روپے کے انعام کا اعلان کیا ہے۔

وزیراعظم شہباز شریف کی ایف بی آر اصلاحات اور ٹیکس فراڈ کے خلاف مہم کے مثبت نتائج کا سلسلہ جاری ہے،ایف بی آر کے سینئر افسر کی جانب سے کھربوں روپے کے سیلز ٹیکس فراڈ کی کوشش پر بروقت نشاندہی اورکارروائی کی گئی۔

وزیر اعظم سے ٹیکس فراڈ کی کوشش کی بروقت نشاندہی کرنے والے ایف بی آر کے افسر اعجاز حسین کی وزیرِ اعظم ہاؤس میں ملاقات ہوئی،وزیر اعظم نے ایف بی آر کے آفیسر اعجاز حسین کی فرض شناسی کی پذیرائی کی اور ایمانداری کے اعتراف میں ان کیلئے 50 لاکھ روپے کے انعام کا اعلان کیا،وزیر اعظم نے اعجاز حسین کی فرض شناسی پر انہیں اعزازی شیلڈ بھی پیش کی۔

وزیراعظم شہبازشریف نے کہاکہ پاکستان میں فرض شناس افسران اور اپنے پیشے سے مخلص باصلاحیت لوگوں کی کمی نہیں،ضرورت اس امر کی ہے کہ ایسے ایماندار لوگوں کی حوصلہ افزائی کی جائے،اطمینان بخش امر ہے کہ ایف بی آر اصلاحات کے مثبت نتائج کا سلسلہ جاری ہے۔

انہوں نے کہاکہ پاکستان کی غریب عوام کے ٹیکس چوری کرنے والوں اور انکی معاونت کرنے والوں کی نشاندہی کرکے انہیں کڑی سے کڑی سزا دلوائی جائے گی،غریب عوام کے ٹیکس پر ڈاکہ ڈالنے والوں کے خلاف قانون کے شکنجے کو مزید مضبوط کیا جائے گا۔

وزیراعظم نے کہاکہ اعجاز حسین نے اس احسن اقدام سے ملک و قوم کی خدمت کی ہے جو لائق تحسین ہے،ایف بی آر ٹیکس فراڈ کی اس مزموم کوشش کی تفصیلی تحقیقات کے بعد ذمہ داران کو قانون کے کٹھرے میں لائے،ایف بی آر ٹیکس فراڈ میں ملوث عناصر اور انکی معاونت کرنے والوں کو سزا دلوانے کیلئے بہترین قانونی ٹیم کی خدمات حاصل کرے۔

وزیراعظم کو بریفنگ دی گئی کہ سیلز ٹیکس چوری کیلئے ایک 80 برس کی خاتون کے کوائف کو استعمال کیا گیا،4 مارچ 2024 کو ایف بی آر کے سینئر افسر اعجاز حسین نے ٹیکس فراڈ کی اس کوشش کی نشاندہی کی،سیلز ٹیکس فراڈ کی اس کوشش میں ابتدائی طور پر 37 کروڑ منتقل بھی ہوا جس کی ریکوری کا عمل جاری ہے،وزیراعظم کو  بتایا گیا کہ ٹیکس فراڈ کی کوشش میں ملوث مرکزی ملزم کو گرفتار کیا جا چکاہے۔

وزیراعظم نے ہدایت کی کہ تفصیلی تحقیقات کے بعد ٹیکس فراڈ کی کوشش میں مبینہ معاونت کرنے والے ایف بی آر کے حکام کی نشاندہی کرکے انہیں بھی قرار واقعی سزا دلوائی جائے،ملکی معیشت کی ترقی کیلئے ٹیکس بیس میں اضافے کے حوالے سے ترجیحی بنیادوں پر اقدامات کر رہے ہیں،ایف بی آر کی اصلاحات اور مکمل ڈیجیٹائیزیشن سے مستقبل میں بھی اس قسم کی کاروائیوں کی روک تھام ہو سکے گی۔

مِڈ کیریئر مینجمنٹ اور نیشنل سکیورٹی اینڈ وار کورسز کیلئے افسران کی نامزدگیاں

(بابر شہزاد تُرک) وفاقی بیوروکریسی میں گریڈ 19 میں ترقی کیلئے لازم مِڈ کیریئر مینجمنٹ اورگریڈ 20 سے21 میں ترقی کیلئے لازم سکیورٹی اینڈ وار کورسز کی نامزدگیاں کر دی گئیں۔

مِڈ کیریئر منیجمنٹ کورس کیلئے مختلف سروسز، گروپس کے 127 افسر نامزد کئے گئے ہیں، اسٹیبلشمنٹ ڈویژن نے ریکٹر نیشنل سکول آف پبلک پالیسی لاہور کو مراسلہ ارسال کر دیا ہے۔ کورس 9 دسمبر 2024 سے 14 فروری 2025 تک بیک وقت نِمز کراچی، لاہور، پشاور، اسلام آباد اور کوئٹہ میں منعقد ہو گا، نامزد افسران کو 6 دسمبر 2024 کو متعلقہ تربیتی مقام پر رپورٹ کرنے کی ہدایت کی گئی ہے۔

 پاکستان ایڈمنسٹریٹو سروس کے 25 افسر، رانا عدیل تصور، قرۃالعین ملک، وسیم حامد، الطاف احمد چاچڑ، بشریٰ اقبال راؤ، شرجیل نور، رابعہ ریاست، ملیحہ جمال، وسیم احمد، حسن وقار چیمہ، عرفان سلام، خرم پرویز، سعد بن اسد، یاسر حسین، عثمان اشرف، شامیر اقبال، اویس مشتاق، شہر یار احمد، حناء ارشد، عبدالرحمان، حسین احمد رضا، امبر گیلانی، فیاض علی، بابر صاحب الدین اور عامر حسین نامزد کئے گئے ہیں۔ پولیس سروس آف پاکستان کے 20 افسر محمد ہاشم، ڈاکٹر انوش مسعود چوہدری، وسیم ریاض، دوست محمد، محمد عمر خان، خرم شہزاد، سید اسد مظفر، احمد نواز شاہ، عطا الرحمان، محمد عمران، محمد سرفراز ورک، شہزادہ عمر عباس بابر، نجم الحسنین لیاقت، تصور اقبال، محمد عیسیٰ خان، ضیاء الدین احمد، محمد کلیم، محمد بلوچ، فہد خان اور محمد شعیب کے مِڈ کیریئر مینجمنٹ کورس کیلئے نام شامل ہیں۔

دوسری طرف  افسران کی گریڈ 20 سے 21 میں ترقی کیلئے لازم نیشنل سکیورٹی اینڈ وار کورس  2025-26 کیلئے اسٹیبلشمنٹ ڈویژن کی جانب سے گریڈ 20 کے 38 افسران نامزد کئے گئے ہیں، نیشنل سیکیورٹی اینڈ وار کورس کا انعقاد نیشنل ڈیفنس یونیورسٹی اسلام آباد میں ہو گا، اسٹیبلشمنٹ ڈویژن نے صدر نیشنل ڈیفنس یونیورسٹی کو مراسلہ ارسال کر دیا ہے، مراسلے کے مطابق کورس کے لئے پاکستان ایڈمنسٹریٹو سروس کے سروس گریڈ 20 کے 8 افسر کورس کیلئے نامزد کئے گئے ہیں۔

 افسران میں زید بن مقصود، محمد یحییٰ اخونزادہ، ڈاکٹر ناصر محمود بشیر، بلال احمد، ساجد ظفر ڈال، عدنان ارشد اولکھ، عزیز احمد جمالی اور مشتاق احمد شامل ہیں جبکہ پولیس سروس آف پاکستان کے 8 افسران، کیپٹن (ر) پرویز احمد، محمد علی خان، شوکت عباس، عمران محمود، کاشف مشتاق کانجو، نعیم احمد شیخ، عطاء محمد، ڈاکٹر وقار الدین سید، سیکریٹریٹ گروپ کے 6 افسران محمد عباس خان، طارق محمود، انتخاب عالم، شازیہ طور، شہزاد حمید درانی اور جوائنٹ سیکریٹری، اقتصادی اُمور ڈویژن ناصرہ بتول جعفری کورس کے لئے نامزد کئے گئے ہیں۔

 علاوہ ازیں ان لینڈ ریونیو سروس کے 4، پاکستان کسٹمز سروس کے 3 افسر،انفارمیشن گروپ کے 2، کامرس اینڈ ٹریڈ گروپ کے ایک افسر، پاکستان آڈٹ اینڈ اکاؤنٹس سروس کے 2 اور آئی بی کے ایک افسر ڈپٹی ڈائریکٹر جنرل اسلام آباد عبدالوہاب شیخ کورس کیلئے نامزد کئے گئے ہیں، قومی احتساب بیورو کے 2 افسران، ڈائریکٹر نیب خیبرپختونخوا، پشاور رضوان خان، ڈائریکٹر نیب سکھر سید محمد افاق اور آزاد کشمیر حکومت کے سیکرٹری محکمہٴ سروسز اینڈ جنرل ایڈمنسٹریشن ظفر محمود خان کے  نیشنل سکیورٹی اینڈ وار کورس کیلئےنام شامل ہیں۔

ایشین جونیئرہاکی کپ، قومی ٹیم مسقط روانہ

(24 نیوز) پاکستان کی 18 رکنی جونیئر ہاکی ٹیم ایشین جونیئر کپ ہاکی ٹورنامنٹ میں شرکت کے لیے عمان کے شہر مقسط روانہ ہوگئی۔

قومی جونیئر سکواڈ کی قیادت عبدالحنان کر رہے ہیں، انٹرنیشنل ہاکی فیڈریشن کا رائزنگ سٹار ایوارڈ جیتنے والے پہلے پاکستانی کھلاڑی سفیان خان نائب کپتان ہیں۔عمان کے دارالحکومت مسقط میں 26 نومبرسے 4 دسمبر 2024 تک شیڈول 10 ٹیموں کے ایونٹ کوعالمی جونیئر کپ ہاکی ٹورنامنٹ کے کوالیفائنگ راونڈ کی حیثیت حاصل ہے، پہلی 6 پوزیشن پانے والی ٹیمیں ایف آئی ایف کے تحت اگلے برس ہونے والے عالمی جونیئر کپ میں شرکت کی حامل ہوں گی۔

سکواڈ میں فیضان جنجوعہ، علی رضا( گول کیپرز)، سفیان خان، عقیل احمد، بلال اسلم، ندیم خان، محمد زین، وسیم، سمیع، ذکریا حیات، محمد احمد مدی، عبدالحنان شاہد، مغیرہ، رانا ولید، حمزہ فیاض، بشارت، قیوم ڈوگر اور سیف اللہ( فارورڈز) پر مشتمل ہے۔اولمپئین قمرابراہیم ہیڈ کوچ، اولمپئین کامران اشرف کوچ، اجمل خان منیجر اور ابوذر ویڈواینالسٹ ہیں۔

پاکستان اپنا پہلا گروپ میچ 27 نومبر کو چین کے خلاف کھیلے گا، اگلے روز دوسرے میچ میں بنگلا دیشں سے مقابلہ ہوگا، 30 نومبرکو قومی جونیئر ٹیم اپنے تیسرے میچ میں ملائشیا سے مقابلہ کرے گی۔

ایم پی اے فرخ جاوید مون کے گھر پر پولیس کا چھاپہ

(24نیوز)پاکستان تحریک انصاف (پی ٹی آئی )کا معاملہ ، ایم پی اے فرخ جاوید مون کے گھر پر پولیس کا چھاپہ۔

گارڈن ٹاون پولیس کا پی ٹی آئی ایم پی اے کے گھر پر چھاپہ ،پولیس نے ایم پی اے فرخ جاوید مون کے گھر پر چھاپہ مارا ،فرخ جاوید مون گھر پر موجود نہیں تھے، پولیس گھر کی تلاشی کے بعد واپس چلی گئی،فرخ جاوید مون نے آج پریس کلب میں پریس کانفرنس میں شرکت کی تھی ،فرخ جاوید مون نے آج احتجاج میں شریک کیلئے پمفلٹ بھی تقسیم کئے تھے۔

خیر پور، زمین کے تنازعہ پر دو گروپوں میں تصادم، 5 افراد شدید زخمی

(24 نیوز) کنب میں زمینی تنازعہ پر دو گروپوں میں تصادم،کلہاڑیوں کے وار سے پانچ افراد شدید زخمی ہوگئے۔

زخمیوں میں دو افراد تشویشناک حالت میں سول ہسپتال منتقل کر دئیے گئے،واقع خیر پور کے علاقے سانول خان چنہ میں پیش آیا۔

زخمی ہونیوالوں میں دودوچنہ، غلام مرتضیٰ، صادق علی، لعل ڈنو شامل ہیں،واقعہ زمین کی ملکیت کے معاملے پر پیش آیا ہے ۔ مقدمہ تا حال درج نہیں ہو سکا۔ 

ٰ

سرچ مارکیٹ پر گوگل کی اجارہ داری سے امریکی حکومت بھی پریشان

(24 نیوز)سرچ مارکیٹ پر گوگل کی اجارہ داری سے امریکی حکومت بھی پریشان ہوگئی۔

تفصیلات کے مطابق امریکی حکومت نے عدلیہ پر زور دیا ہے کہ وہ گوگل سے کہے کہ اپنا گوگل کروم براؤزر فروخت کردے۔ ٹیکنالوجی کی دنیا میں غیر معمولی انفرادیت کی حامل کمپنی گوگل پر الزام ہے کہ وہ اپنے بیشتر معاملات میں اجارہ داری کی طرف بڑھ رہی ہے اور اُس نے سرچ مارکیٹ کو مکمل طور پر شکنجے میں کس لیا ہے۔

عدالت میں پیش کی جانے والی ایک دستاویز سے معلوم ہوا ہے کہ امریکی محکمہ انصاف نے گوگل کی اجارہ دارانہ سرگرمیوں کو ختم کرنے کا مطالبہ کیا ہے۔عدلیہ سے کہا گیا ہے کہ وہ گوگل کو ایپل سمیت تمام سمارٹ فون تیار کرنے والے اداروں سے ایسے معاہدے رکنے سے روکے جن کا مقصد ان کمپنیوں کی پروڈکٹس میں گوگل سرچ انجن کو بنیادی براؤزر بنانا ہو۔

گوگل براؤزر دنیا بھر میں مقبولیت سے ہم کنار ہے۔ یہ دنیا میں سب سے زیادہ فروخت اور استعمال ہونے والا براؤزر ہے۔امریکی محکمہ انصاف کا کہنا ہے کہ کروم براؤزر سرچ انجن میں داخل ہونے کا اہم ذریعہ ہے۔ یہ ممکنہ حریفوں کے لیے مواقع کمزور کردیتا ہے۔ اسٹیٹ انکاؤنٹر نامی ویب سائٹ کا کہنا  ہے کہ اس وقت گوگل آن لائن سرچ مارکیٹ کے 90 فیصد سے زائد پر متصرف ہے

چیف سیکریٹری خیبرپختونخوا کی پولیس اور اداروں کوسیاسی سرگرمیوں کا حصہ نہ بننے کی ہدایت

(24 نیوز)تحریک انصاف کے 24 نومبر  کےاحتجاج میں خیبر پختونخواہ کے سرکاری وسائل و ملازمین کی شرکت روکنے کے حوالے سے بڑی پیش رفت،چیف سیکریٹری خیبرپختونخوا نے پولیس اور اداروں کوسیاسی سرگرمیوں کا حصہ نہ بننے اور ان سے دور رہنے کی ہدایت جاری کر دی۔

تفصیلات کے مطابق چیف سیکرٹری کے پی نے آئی جی خیبر پختونخواہ سمیت تمام صوبائی اداروں اور انتظامیہ سربراہان کو مراسلہ لکھا ہے جس میں انہوں نے کہا ہے کہ عوام کو بلا خوف و خطر تحفظ فراہم کرنا ہمارا فرض ہے،ہم قانون اور آئین کے تحت قوم کے خادم ہیں،ہمیں قانون اور آئین پر سختی سے عملدرآمد یقینی بنانا ہوگا،تمام ملازمین بلا خوف و خطر قانون و آئین کے مطابق اپنے فرائض سر انجام دیں، تمام ملازمین سیاسی ہمدردی سے بالاتر ہوکر  غیر جانبداری سے فرائض ادا کریں۔

مراسلے میں یہ بھی کہا گیا ہے کہ سیاسی دباؤ کو نظر انداز کرتے ہوئے قانون کی پاسداری کو یقینی بنایا جائے،ہمارا الائنس ریاست اور آئین کے ساتھ ہے کسی سیاسی جماعت سے نہیں،سرکاری وسائل اور اختیارات کاناجائز استعمال کسی صورت نہ کیا جائے،بطور پبلک سرونٹ آئین،قانون اور عوام کے اعتماد پر پورا اترنے کےلئے اقدامات کریں۔سیاسی قیادت کے احکامات بھی صرف آئین اور قانون کے مطابق مانے جائیں۔

اس سے پہلے چیف سیکرٹری خیبر پختونخواہ کو وزارت داخلہ پاکستان کی جانب سے مراسلہ لکھا گیا تھاجس میں چیف سیکرٹری کو ہدایت کی گئی تھی کہ یہ یقینی بنایا جائے کہ 24 نومبر کے احتجاج میں کوئی بھی سرکاری مشینری استعمال نہ ہو،وفاقی حکومت کی جانب سے چیف سیکرٹری سے کہا گیا تھا کہ یقینی بنایا جائے سرکاری لوگ یا پیسہ بھی استعمال نہیں ہو گا۔چیف سیکرٹری خیبر پختونخواہ نے وفاقی وزارت داخلہ کے مراسلے پر کارروائی کرتے ہوئے صوبے کے سرکاری ملازمین کو مراسلہ لکھا۔

دوسری طرف اہلکاروں کی جلسے میں شرکت نہ کرنے کے حوالے سے پشاور پولیس نے بھی سرکلر جاری کردیاہے جس میں کہا گیا ہے کہ سیاسی نمائندوں کے ساتھ بطور سیکورٹی تعینات خیبرپختونخوا کے پولیس اہلکار کسی جلسہ جلوس میں شرکت نہیں کرینگے، خلاف ورزی کرنے والے اہلکاروں کے خلاف محکمانہ کارروائی کی جائے گی،سرکلر ڈی ایس پی ہیڈکواٹر کی جانب سے جاری کیا گیا ہے۔

عمران خان کے اعلان تک جلسے کی تاریخ تبدیل نہیں ہو گی ، بشریٰ بی بی

(طیب سیف )سابق خاتون اول  بشریٰ بی بی کا کہنا ہے کہ جب تک عمران خان خود تاریخ تبدیلی کا اعلان نہیں کرتے تب تک جلسے کی تاریخ تبدیل نہیں ہو گی۔

بشریٰ بی بی نے کہا کہ آج میں بانی پی ٹی آئی کا پیغام دینے آپ کے سامنے آئی ہوں،بانی پی ٹی آئی نے پوری قوم کو 24 نومبر کو نکلنے کی کال دی ہے،یہ حقیقی آزادی کی جنگ ہے،بانی پی ٹی آئی نے ہر طبقے کو اس احتجاج کا حصہ بننے کا کہا ہے،بانی پی ٹی آئی نے کہا ہے کہ وہ قانون کی بالادستی پر یقین رکھتے ہیں،بانی پی ٹی آئی نے وکلا اور ججز کو بھی اس احتجاج کا حصہ بننے کی دعوت دی ہے،کہا جارہا ہے کہ 24 نومبر کی تاریخ تبدیل کردی جائے ،24 نومبر کسی صورت تبدیل نہیں ہوگی،جب تک بانی چیئرمین پی ٹی آئی خود تاریخ بدلنے کا اعلان نہیں کرتے،جب تک بانی پی ٹی آئی خود آکر عوام سے خطاب نہیں کرتے 24 تاریخ احتجاج کی ڈیٹ تبدیل نہیں کی جائے گی۔

بشریٰ بی بی نے مزید کہا کہ ادارے اور پولیس اپنے بچوں پر ظلم کیوں کر رہے ہیں ؟ہمارا احتجاج آئین اور قانون کے مطابق ہوگا،قانون کی خلاف ورزی ادارے خود کرتے ہیں،ؤکیا پاکستان صرف خان کا ہے؟،کیا ساری قربانیاں بانی پی ٹی آئی نے دینی ہیں؟کیا خان کا دل نہیں کرتا آرام کرنے کو؟خان کو بہت چھوٹی سی جگہ پر رکھا گیا ہے،خان ڈیڑھ سال سے ملک میں انصاف اور قانون کی بالادستی کے لیے بیٹھا ہوا ہے،کسی بھی قانون میں کسی کو پر امن احتجاج سے نہیں روکا جاسکتا،یزید مت بنیں ،احتجاج کے لیے آنے والے بچے ،بچیاں بھی آپ کے بہن بھائی ہیں،اداروں کو کہتی ہوں بانی چیئرمین پی ٹی آئی کسی سے بدلہ نہیں لیں گے۔

بانی پی ٹی آئی نے کہا کہ طاقت میں آکر معافی کا دروازہ کھولوں گا،بانی پی ٹی آئی باہر آکر بدلہ نہیں لیں گے،بانی پی ٹی آئی کسی صورت بدلہ نہیں لیں گے،بانی پی ٹی آئی نے یہ واضح کردیا ہے،

بدلہ لینا اللہ کو بھی نہیں پسند۔

اسحاق ڈار کی زیر صدارت ایرا کا اجلاس، این ڈی ایم اے کے انضمام کا فیصلہ

(انور عباس )نائب وزیراعظم اسحاق ڈار کی زیر صدارت ایرا کا اجلاس، این ڈی ایم اے اور ایرا کے انضمام کا جائزہ لیا گیا ۔

پاکستان مسلم لیگ (ن)کے سینئر رہنما اور نائب وزیر اعظم اسحاق ڈار کی زیر صدارت ایرا اور این ڈی ایم کے انضمام سے متعلق اجلاس منعقد ہوا جس میں ضم سے متعلق جائزہ لیا گیا ،نائب وزیراعظم اسحاق ڈار نے کہا کہ ایرا اور این ڈی ایم اے کا انضمام کارکردگی کو بہتر بنانے میں مدد دے گا،  ایرا اور این ڈی ایم اے کے انضمام سے وسائل کے بہتر انتظام اور استعمال کے ساتھ آفات کی صورت میں مجموعی رسپانس فریم ورک بہتر ہوگا، ڈیزاسٹر رسپانس فریم ورک کو مربوط بنانے کے لیے آزاد کشمیر اور خیبر پختون خوا کی حکومتوں سے بھی رابطے کا فیصلہ کیا ہے ۔

پی ٹی آئی کا 24 نومبر کو احتجاج ،قیادت  نے کارکنان کو سفر شروع کرنے سے روک دیا 

(طیب سیف )پاکستان تحریک انصاف کی اعلیٰ قیادت کو غیبی مدد کا انتظار ، 24نومبر احتجاج کیلئے دور دراز سے اسلام آباد آنے والے قائدین اور کارکنان کو تاحکم ثانی سفر سے روک دیا  گیا۔

پی ٹی آئی ذرائع نے بتایا کہ آج رات کا انتظار کریں کل صبح حتمی لائحہ عمل کا اعلان ہو گا ، مذاکرات میں کوئی بریک تھرو ہو گیا تو کارکنان کو سفر کی صعوبت سے بچایا جائے گا،پہلے پی ٹی آئی نے جمعہ کے روز کارکنان اور قائدین کو انفرادی طور پر پہنچنے کی ہدایات کی تھی،جمعہ کو اسلام آباد پہنچنے والے قائدین اور کارکنان کو بطور ایڈوانس پارٹی یہاں موجود ہونا تھا،پارٹی کی جانب سے روکنے پر ورکرز بھی کنفیوز ہو گئے ،کل سے اسلام آباد کے راستے بند ہو جائیں گے سفر کا حکم تاخیر سے ملا تو مشکلات ہوں گی ۔

اعظم سواتی حسن ابدال میں درج مقدمات میں بری،ٹیکسلا کیس میں جوڈیشل کردیا

(ارشاد قریشی)5اکتوبر احتجاج کے دوران گرفتار پی ٹی آئی رہنما اعظم سواتی کو حسن ابدال میں درج 2مقدمات میں ڈسچارج کردیا گیا جبکہ ٹیکسلا میں درج مقدمے میں ریمانڈ مکمل ہونے پر جوڈیشل کردیا گیا۔

تفصیلات کے مطابق اعظم سواتی کے خلاف مقدمات کی سماعت انسداد دہشتگردی عدالت کے جج امجد علی شاہ نے کی،اے ٹی سی جج نے حسن ابدال میں درج دو مقدمات میں اعظم سواتی کو ڈسچارج کر دیا گیا۔

ٹیکسلا میں درج مقدمہ میں پولیس نےاعظم سواتی کا 16روزہ ریمانڈ حاصل کر رکھا تھا،اعظم سواتی کو جسمانی ریمانڈ مکمل ہونے پر عدالت پیش کیا گیا، عدالت نے اعظم سواتی کو جوڈیشل ریمانڈ پر جیل بھجوادیا۔

موسم نے پھر سے کروٹ بدل لی، چند مقامات پر بارش کی بھی پیشگوئی

(روزینہ علی )سموگ کے ستائے شہریوں کو پھر سے بارش کی آس، محکمہ موسمیات نے موسم خشک اور دھند  کی پیشگوئی کر دی ۔ 

موسم کا حال بتانے والوں کا کہنا ہے کہ آئندہ روز اسلام آباد اور گردونواح میں موسم خشک جبکہ صبح اور رات کے اوقات میں سرد رہنے کا امکان  ہے ،خیبر پختونخوا  کے بیشتر اضلاع میں موسم خشک اور سرد رہنے کا امکان، تاہم شام/رات چترال، دیر، سوات، مالاکنڈ اورکوہستان میں مطلع جز وی ابر آلود رہنے کے علاوہ چند مقامات پر گرج چمک کے ساتھ ہلکی بارش اور پہاڑوں پر ہلکی برفباری ہو سکتی ہے۔

پنجاب کے موسم کی بات کریں تو بیشتر اضلاع میں موسم خشک رہنے کی توقع ہے ، تاہم صبح اور رات کے اوقات میں سیالکوٹ، نارووال، گوجرانوالہ، جہلم، لاہور، شیخوپورہ، قصور، اوکاڑہ، حافظ آباد، ٹوبہ ٹیک سنگھ، سرگو دھا، جھنگ، فیصل آباد، بہاولپور، ملتان، سا ہیوال، خانیوال، رحیم یار خان ، ڈیرہ غازی خان اور گردونواح میں سموگ/ دُ ھند چھا ئےرہنے کا امکان ہے ۔

سندھ کے بیشتر اضلاع میں موسم خشک رہنے کا امکان ہے جبکہ صبح کے اوقات میں کشمور،سکھر، ٹنڈو جام، جیکب آباد اور گردونواح میں سموگ/دُھند پڑنے کی توقع، بلوچستان کے بیشتر اضلاع میں موسم خشک جبکہ پہاڑی علاقوں میں صبح،رات کے اوقات میں سرد رہنے کا امکان ہے ۔گلگت بلتستان میں مطلع ابر آلود رہنے کے علاوہ شام/رات کے اوقات میں چند مقامات پر ہلکی بارش اور پہاڑوں پر ہلکی برفباری کا امکان ہے ۔
آج ریکارڈکئے ئے کم سےکم درجہ حرارت: لہہ منفی07 ،اسکردو منفی 05، استور ، گوپس منفی 03،کالام اورگلگت میں منفی 01ڈگری سینٹی گریڈ ریکارڈ کیا گیا۔

جو کہتا تھا کہ ڈیل نہیں کروں گا،’ ڈیل کرلو،’’ ڈیل کرلو‘‘ کی صدائیں دے رہا ہے: عطااللہ تارڑ

(اویس کیانی)وفاقی وزیر اطلاعات عطااللہ تارڑ نے بانی پی ٹی آئی کے جیل سے بیان پر دلچسپ تبصرہ کرتے ہوئے کہا ہے کہ’’ جیل سے رہا کرو تو احتجاج ملتوی کردوں گا‘‘کا بیان قیدی کی ’’فرسٹریشن ‘‘اور ’’گھبراہٹ ‘‘کا اعتراف ہے۔

ثابت ہوا 24 نومبر کو انتشار کی کال کا مقصد ’’ڈیل ‘‘ کے لیے جد و جہد کرنا ہے۔انہوں نے  کہا کہ جو کہتا تھا کہ ڈیل نہیں کروں گا،’ ڈیل کرلو،’’ ڈیل کرلو‘‘ کی صدائیں دے رہا ہے اور وفاق پر لشکر کشی کرنے پر بضد ہے۔

وفاقی وزیر اطلاعات نے کہا کہ آپ سے ڈیل صرف ’’قانون ‘‘کرے گا جس کے آپ مجرم ہیں۔

پیپلز پارٹی نے جماعت سے کیوں نکالا ؟ رانا ثناءاللہ نے برسوں بعد حقیقت بتا دی

(24 نیوز )پاکستان مسلم لیگ (ن)کے سینئر رہنما ، وزیر اعظم کے مشیر برائے سیاسی امور رانا ثناءاللہ نے پاکستان پیپلز پارٹی سے نکالے جانے کی روداد سنادی ۔

ڈیجیٹل چینل 24 پلس کی پوڈ کاسٹ میں شرکت کرتے ہوئے مسلم لیگ (ن)کے روح رواں سابق وزیر داخلہ رانا ثناء اللہ  نے انکشاف کیا کہ ان کا سیاسی آغاز پاکستان پیپلز پارٹی سے ہے اور انہی کی ٹکٹ سے میں پنجاب میں پہلی بار ایم پی اے منتخب ہوا تھا،انھوں نے بتایا کہ 90 کی دہائی میں جب نون لیگ نے دوتہائی اکثریت حاصل کی تو تب فیصل آباد سے صرف ایک ہی سیٹ تھی اور وہ میں نے جیتی تھی  اور اس دور میں الیکشن جیتنابہت بڑی بات ہوتی تھی۔

اس کے 2 سال بعد جب دوبارہ الیکشن ہوئے تو پیپلز پارٹی نے زاہد سرفراز کو  ایم این اے کا ٹکٹ جاری کیا جو کہ جنرل ضیاء الحق کے اوپننگ بیٹسمین تھے اور ہم نے ان کے دور حکومت میں جیلیں کاٹیں ،بڑی صعوبتیں برداشت کیں،اس لیے ہم نے ان کیخلاف جلوس نکالنا شروع کر دیے جس پر انہوں نے میرا ٹکٹ کینسل کر کے احمدسعید اعوان کو ٹکٹ جاری کردیا اور ریکارڈ پر ہے کہ زاہد سرفراز کے کہنے پر ہی  پی پی پی نے میری رکنیت ختم کی ۔

ریٹائرمنٹ نہیں لے رہا، افواہیں بے بنیاد ہیں: حارث سہیل

(24 نیوز)قومی کرکٹ ٹیم کے مڈل آرڈر بیٹر حارث سہیل نے سوشل میڈیا پر اپنی ریٹائرمنٹ سے متعلق افواہوں ردعمل دیتے ہوئے انہیں بے بنیاد قرار دیا۔

اپنے بیان میں حارث سہیل نے کہا کہ میں نے ریٹائرمنٹ کا کوئی فیصلہ نہیں کیا اور نہ ہی میرا ایسا کوئی ارادہ ہے، میری پوری توجہ اس کھیل کو جاری رکھنے پر ہے جو مجھے پسند ہے۔

دوسری جانب پاکستان کرکٹ بورڈ (پی سی بی) کا بھی کہنا ہے کہ حارث سہیل کی ریٹائرمنٹ کے حوالے سے کوئی باضابطہ اطلاع موصول نہیں ہوئی۔

واضح رہے کہ 35 سالہ کرکٹر نے 16 ٹیسٹ میچز کی 27 اننگز میں 32.57 کی اوسط سے 847 رنز بنائے، جس میں دو سنچریاں، تین نصف سنچریاں شامل ہیں جبکہ انہوں نے آخری میچ 2021 میں نیوزی لینڈ کے خلاف کھیلا تھا۔

ون ڈے میں حارث نے 45 میچز کی 44 اننگز میں 44.84 کی اوسط سے 1,749 رنز بنائے، جس میں 2 سنچریاں اور 14 نصف سنچریاں شامل ہیں، جس میں انکا ٹاپ سکور 130 اور سٹرائیک ریٹ 85.48 ہے، انہوں نے اپنا آخری ون ڈے بھی نیوزی لینڈ کے خلاف 2023 میں کھیلا تھا۔

ٹی20 فارمیٹ حارث نے 14 میچز کی 13 اننگز میں 19.09 کی اوسط سے 210 رنز بنائے۔ جس میں 2 نصف سنچریاں شامل ہیں جبکہ آخری میچ 2019 میں آسٹریلیا کیخلاف کھیلا تھا۔

روپے کی قدر میں اضافہ، ڈالر سمیت دیگر کرنسیاں سستی ہو گئیں 

(اشرف خان)حکومت کی جانب سے معاشی استحکام کیلئے اقدامات رنگ لانے لگے ،روپے کے مقابلے ڈالر سمیت دیگر کرنسیاں سستی ہو گئیں ۔

سٹیٹ بینک کے مطابق انٹر بینک میں امریکی ڈالر کی قدر میں 8   پیسے کمی   ہوئی ہے، جس کے بعد انٹر بینک میں ڈالر 278.04 روپے سے کم ہوکر 277.96 روپے پر بند ہوا ۔
اوپن مارکیٹ کی بات کریں تو امریکی ڈالر 5 پیسے کمی سے   278 روپے 95 پیسے کا ہوگیا ،یورو   1.15 روپے کم  ہوکر 293.13 روپے کا ہوگیا ،برطانوی پاؤنڈ 1.47 روپے سستا ہوکر  351.83 روپے پر آگیا  ،یو اے ای درہم 3  پیسے کمی سے  76.01 روپے پر پہنچ گیا  ،سعودی ریال 1 پیسے کم ہوکر   74.23 روپے کا ہوگیا۔

پابندیوں میں نرمی ، سموگ کی وجہ سے بند تفریحی گاہیں کھول دی گئیں

(کومل اسلم)پنجاب بھر میں سموگ کی وجہ سے بند تفریحی گاہوں کو کھول دیا گیا، تمام پارک، چڑیاگھر، تفریح گاہیں رات 8 بجے تک کھلی رہیں گی، اس ضمن میں نوٹیفکیشن بھی جاری کردیا گیاہے۔

 ڈی جی ماحولیات ڈاکٹر عمران حامد شیخ کی طرف سے جاری نوٹیفکیشن کے مطابق پارکس، چڑیا گھر، پلے گراونڈ، آوٹ ڈور سپورٹس کی اجازت ہوگی، تمام تفریحی مقامات کو آٹھ بجے تک کھلا رہنے کی اجازت ہوگی جبکہ ہر قسم کے فیسٹیول، نمائش کی بھی اجازت دے دی گئی ہے۔ 

تفریحی مقامات کو 22 نومبرسے کھولنے کی اجازت دی گئی ہے۔ لاہور، ملتان، فیصل آباد، گوجرانوالہ میں مارکیٹیں 8 بجے بند ہوں گی، فیصلے کا اطلاق دکانوں، شاپنگ مالز، مارکیٹس پر ہوگا۔

نوٹیفکیشن کے مطابق فارمیسز، تندور، ڈیپارٹمنٹل و گروسری اسٹورز سمیت بنیادی ضرورت کی اشیاء کی دکانیں کھلی رہیں گی جبکہ بیکریوں کو بھی رات 8 بجے کے بعد کام کرنے کی اجازت ہوگی۔

پی ٹی آئی سے کوئی مذاکرات نہیں ہو رہے: وزیر داخلہ

(24 نیوز) اسلام آباد ہائیکورٹ کے باہر میڈیا سے گفتگو کرتے ہوئے  وزیر داخلہ محسن نقوی نے کہا کہ جو بھی عدالت کا آرڈر ہو گا اس پر عملدرآمد ہو گا،24 کو وفد کا دورہ ہے جس پر راستے اور موبائل بند کر رہے ہوں گے۔

انہوں نے کہا کہ احتجاج کرنا ہے کریں کوئی نہیں روکے گا لیکن اسلام آباد آ کر احتجاج کرنا جس دن اہم دن ہے وہ  ایک سوال ہے ، وزیر داخلہ نے مزید کہا کہ پی ٹی آئی سے کوئی مذاکرات نہیں  ہو رہے،مذاکرات دھمکیوں سے نہیں ہوتے، بات چیت ہونی چاہیے لیکن دھمکیوں سے نہیں ۔

 موبائل بندش کا کل رات تک فیصلہ ہو گا، وزیراعلی کے پی آئی جی کے پی چیف سیکرٹری سے آئے روز بات ہوتی ہے سکیورٹی کے حوالے سے رابطہ رہتا ہے۔ 

 بعد ازاں  وفاقی وزیر داخلہ محسن نقوی کی اسلام آباد ہائیکورٹ کے میڈیا روم آمد ،اسلام آباد ہائیکورٹ جرنلسٹ ایسوسی ایشن نے وزیر داخلہ کو خوش آمدید کہا،سیکرٹری داخلہ، چیف کمشنر، آئی جی اسلام آباد بھی وزیر داخلہ کے ساتھ موجود تھے ، اس موقع پر انہوں نے گفتگو کرتے ہوئے کہا کہ پہلی دفعہ یہاں آیا ہوں،  یہاں آکر خوشی ہوئی، وزیر داخلہ محسن نقوی نے کورٹ رپورٹرز کے صحافتی کردار کو سراہا۔

علی امین گنڈا پور اور بیرسٹر گوہر کے ذریعے احتجاج ملتوی کرنے کی آفر آئی ، عمران خان کا انکشاف 

(ارشاد قریشی )بانی پاکستان تحریک انصاف (پی ٹی آئی ) نے انکشاف کیا ہے کہ علی امین گنڈاپور اور بیرسٹر گوہر کے ذریعے آفر آئی کہ احتجاج ملتوی کر دیں سب ٹھیک ہو جائے گا۔

اڈیالہ جیل میں میڈیا سے گفتگو کرتے ہوئے عمران خان نے کہا کہ میں نے خود سمیت انڈر ٹرائل لوگوں کی رہائی کا مطالبہ کر رکھا تھا تاکہ مذاکرات کی سنجیدگی کا پتہ چل جائے ،یہ ڈیمانڈ وہ تھی جو فوری طور پر پوری ہو سکتی تھی جو انھوں نے نہیں کی ،مذاکرات چلتے رہتے ہیں مگر یہ پتہ چل گیا کہ یہ سیریس نہیں تھے ،یہ صرف احتجاج ملتوی کرانا چاہتے تھے۔
بانی پی ٹی آئی نے کہاکہ ہائی کورٹ نے کل ضمانت منظور کی حکومت کے پاس سنہری موقع تھا کہ مجھے رہا کر دیتے،واضح ہو گیا کہ حکومت مجھے انگیج کر کے معاملے کو طول دینا چاہتی ہے،یہ بھی واضح ہو گیا کہ اصل طاقت جس کے پاس ہے اسی نے یہ سب کیا،یہ سب کچھ یہ بتانے کے لیے کیا گیا کہ وہ جو چاہیں کریں وہ قانون سے بالاتر ہیں،
میں جیل میں ہوں اور مجھ پر کیسز پر کیسز بنائے جا رہے ہیں اسی کو بنانا ریپبلک کہتے ہیں،وکلا ،ججز مزدور،سول سوسائٹی سب کو پیغام دے رہا ہوں کہ 24 نومبر کو احتجاج کیلئے نکلیں،ہائی کورٹ ضمانت منظور کرتی ہے اور یہاں پہلے سے طے ہو جاتا ہے کہ رہائی نہیں دینی۔
عمران خان نے مزید کہا کہ 26 ویں ائینی ترمیم مکمل نافذ ہو گئی تو کہیں سے ریلیف نہیں ملے گا،ہمارے پاس زندہ قوم کی طرح احتجاج کے علاوہ کوئی راستہ نہیں،
24 نومبر کو بیرون ملک مقیم پاکستانیوں کا ریکارڈ احتجاج ہوگا کیونکہ وہ ازاد ملکوں میں رہتے ہیں،ہمیں حکومت کی نیت کا پتہ چل چکا ہے احتجاج بھی ہوگا مذاکرات بھی چلتے رہیں گے،24 نومبر کا احتجاج 100 فیصد ہوگا۔

بانی پی ٹی آئی کی پارٹی صدارت سے ہٹانےسمیت دیگر درخواستیں سماعت کیلئے مقرر

(ملک اشرف) بانی پی ٹی آئی کو پارٹی صدارت سے ہٹانے، حلقہ این اے 95 سے نااہلی، بلے کا نشان واپس لینے ، انٹرا پارٹی الیکشن سمیت دیگر معاملہ،لاہور ہائیکورٹ میں بانی پی ٹی آئی اور تحریک انصاف کی درخواستیں سماعت کے لئے مقرر کر دی گئیں۔

جسٹس شمس محمود مرزا کی سربراہی میں پانچ رکنی بنچ کیس کی سماعت کل کرے گا،پانچ رکنی لارجر بنچ میں جسٹس شاہد کریم، جسٹس شہرام سرور چوہدری،جسٹس جواد حسن اور جسٹس رسال حسن سید شامل ہیں۔درخواستیں بانی پی ٹی آئی اور سیکرٹری تحریک انصاف سمیت دیگر کی جانب سے دائر کی گئی ہیں۔

دوسری طرف لارجر بینچ کے روبرو وفاقی حکومت ، الیکشن کمیشن اور پی ٹی آئی کے وکلاء پیش ہوں گے۔

بانی پی ٹی آئی عمران خان کی جیل میں سیکیورٹی تعینات

(ارشاد قریشی)بانی پاکستان تحریک انصاف (پی ٹی آئی )اور سابق وزیر اعظم عمرا ن خان کے سیل میں سیکیورٹی تعینات کر دی گئی ، سیکیورٹی عملہ تین شفٹ میں ڈیوٹی سر انجام دے گا۔

پہلی شفٹ صبح 8سے شام 4بجے  تک ، دوسری شفٹ شام 4 سے رات 12بجے تک اور تیسری شفٹ رات 12سے صبح 8بجے تک سیکیورٹی ڈیوٹی سرانجام دے گی،
سیل 4کی سیکیورٹی تعینات کرنے کے لئے سی پی او نے جیل سپرنٹنڈنٹ اڈیالہ جیل کو مراسلہ بجھوایا تھا ،پہلی شفٹ میں سب انسپکٹرمحمد اسلم تین اہلکاروں سمیت سیکیورٹی ڈیوٹی سرانجام دیں گے,دوسری شفٹ میں سب انسپکٹر محمد آصف3اہلکاروں سمیت سیکیورٹی ڈیوٹی سرانجام دیں گے ،تیسری شفٹ میں سب انسپکٹر محمد ازرم 3اہلکاروں کے ہمراہ سیکیورٹی ڈیوٹی سرانجام دیں گے۔

جی ڈی پی اور بحری شعبے کی ترقی کیلئے پی ایم ایس ٹی پی نئے راستے کھولے گا: نیول چیف

(24نیوز)چیف آف نیول اسٹاف ایڈمرل نوید اشرف کا کہنا ہے کہ جی ڈی پی اور بحری شعبے کی ترقی کے لیے پی ایم ایس ٹی پی نئے راستے کھولے گا۔

انٹر سروسز پبلک ریلیشنز (آئی ایس پی آر) پاکستان کے پہلے میری ٹائم سائنس اینڈ ٹیکنالوجی پارک کی گراؤنڈ بریکنگ تقریب کراچی ایکسپو سینٹر میں ہوئی۔آئی ایس پی آر کے مطابق چیف آف نیول  سٹاف ایڈمرل نوید اشرف تقریب کے مہمانِ خصوصی تھے۔اس موقع پر گفتگو کرتے ہوئے چیف آف نیول اسٹاف ایڈمرل نوید اشرف نے کہا کہ پی ایم ایس ٹی پی میری ٹائم سائنسز، ٹیکنالوجی، کاروبار اور صنعت میں ترقی کی راہ ہموار کرے گا۔

آئی ایس پی آر کا کہنا ہے کہ پی ایم ایس ٹی پی پاکستان میں اپنی نوعیت کا پہلا میری ٹائم سائنس پارک ہے، جس کا مقصد بحری ٹیکنالوجیز، آرٹیفیشل انٹیلیجینس اور سائبر سیکیورٹی کو فروغ دینا ہے۔پاک فوج کے شعبۂ تعلقاتِ عامہ کے مطابق اس پارک کا مقصد اوشین رینیوایبل انرجی، سی فوڈ پروسیسنگ، جہاز سازی، ساحلی سیاحت کو فروغ دینا ہے۔

آئی ایس پی آر نے یہ بھی کہا ہے کہ پاکستان میری ٹائم سائنس اینڈ ٹیکنالوجی پارک ایک جدید تحقیقی اور ترقیاتی مرکز ہے، پی ایم ایس ٹی پی بحری وسائل اور ٹیکنالوجی کے شعبے کی ترقی کے لیے بنایا گیا ہے۔
 

الیکشن کمیشن نے رکن قومی اسمبلی عادل بازئی کو ڈی سیٹ کردیا

( 24 نیوز) الیکشن کمیشن نے کوئٹہ سے رکن قومی اسمبلی عادل بازئی کو ڈی سیٹ کردیا ۔

الیکشن کمیشن نے پی ٹی آئی کی حمایت سے منتخب رکن قومی اسمبلی عادل بازئی کو نااہل قرار دے دیا، الیکشن کمیشن نے آرٹیکل63 اے کے تحت عادل بازئی کو ڈی سیٹ کیا۔الیکشن کمیشن نے عادل بازئی کی نااہلی کیلئے نواز شریف کی درخواست منظور کرلیا ، عادل بازئی کیخلاف نواز شریف کی درخواست پر سپیکر نے کا ریفرنس منظور کیا ۔

نواز شریف کاکہنا ہے کہ عادل بازئی نے 26ویں ترمیم کے حق میں ووٹ نہیں دیا، عادل بازئی کاکہنا ہے کہ کبھی نون لیگ میں شمولیت اختیار نہیں کی،اسمبلی ویب سائٹ پر بطور آزاد رکن موجود ہوں۔عادل بازئی این اے 262کوئٹہ سے رکن قومی اسمبلی منتخب ہوئے تھے، الیکشن کمیشن نے این اے262کوئٹہ کی نشست کو خالی قرار دے دیا۔

انسداد دہشت گردی عدالت نے عمران خان کا 5 روزہ جسمانی ریمانڈ منظور کر لیا

( ارشاد قریشی)تھانہ نیو ٹاؤن میں درج مقدمے میں انسداد دہشت گردی عدالت نے بانی پی ٹی آئی عمران خان کا 5 روزہ جسمانی ریمانڈ منظور کرلیا۔

انسداد دہشتگردی عدالت کے جج امجد علی شاہ نے اڈیالہ جیل میں سماعت کی،پراسیکیوشن نے 15 روزہ جسمانی ریمانڈ مانگا تھا جس پر عدالت نے عمران خان کا 5 روزہ جسمانی ریمانڈ منظور کیا۔

عمرن خان کو تھانہ نیوٹاون کے مقدمے میں 26 نومبر کو پیش کیا جائے گا، تفتیشی افسر راشد کیانی اڈیالہ جیل میں تفتیش کریں گے۔

جسمانی ریمانڈ منظور ہوتے ہی بانی پی ٹی آئی کے سیل کو پولیس اسٹیشن ڈکلیئر کر دیا گیا، عمران خان جسمانی ریمانڈ پر اڈیالہ جیل میں تھانہ نیو ٹاون پولیس کی حراست میں رہیں گے۔

عظمیٰ بخاری پہلے زمینی حقائق معلوم کریں پھر بیان دیں، شرجیل میمن

(24نیوز)سندھ کے سینئر وزیر شرجیل میمن نے وزیرِ اطلاعات پنجاب عظمیٰ بخاری کے بیان پر ردِعمل دیا ہے۔

شرجیل انعام میمن نے کہا ہے کہ پانی کے انتظام پر سندھ کے خدشات بے بنیاد نہیں، پانی سب کا مشترکہ حق ہے، بغیر اتفاقِ رائے کوئی بھی منصوبہ شروع کرنا مناسب نہیں۔

 انہوں نے کہا کہ1991ء کا معاہدہ تمام صوبوں میں پانی کی منصفانہ تقسیم کو لازمی قرار دیتا ہے، عظمیٰ بخاری پہلے زمینی حقائق معلوم کریں پھر بیان دیں۔

شرجیل انعام میمن نے کہا کہ ہم چاہتے ہیں کہ پورے پاکستان میں خوش حالی ہو اور زراعت کا شعبہ ترقی کرے، چھوٹے کسانوں کو زیادہ سے زیادہ سہولتوں اور مدد کی ضرورت ہے۔

پارا چنار سے پشاور جانے والی مسافر گاڑیوں پر حملہ،خواتین اور بچوں سمیت 39 افراد جاں بحق

(24نیوز)خیبرپختونخوا کے ضلع کرم میں مسافر گاڑیوں پر مسلح افراد کی خود کار ہتھیاروں سے فائرنگ کے نتیجے میں 39 افراد جاں بحق 50 زخمی ہوگئے۔

 ضلع کرم میں لوئر کے علاقے اوچت میں قافلے میں شامل مسافر گاڑیوں پر مسلح افراد کی جانب سے حملہ کیا گیا جس کے نتیجے میں 7خواتین اور ایک بچی سمیت 39 افراد جاں بحق جبکہ  50زخمی ہو گئے ، پولیس حکام کے مطابق پارا چنار سے پشاور جانے والی مسافر گاڑیوں کو نشانہ بنایا گیا،عینی شاہدین کا کہنا ہے کہ گاڑیوں پر خود کار ہتھیاروں سے فائرنگ کی گئی۔

دوسری جانب وفاقی وزیر داخلہ محسن نقوی نے واقعہ کی مذمت کرتے ہوئے قیمتی انسانی جانوں کے ضیاع پر گہرے دکھ اور افسوس کا اظہار کیا اور جاں بحق افراد کے لواحقین سے دلی ہمدردی و اظہار تعزیت کیاہے۔

محسن نقوی کا کہنا تھا کہ معصوم لوگوں کو نشانہ بنانے والے  کسی رعایت کے مستحق نہیں،تمام تر ہمدردیاں جاں بحق افراد کے لواحقین کے ساتھ ہیں۔

ہواؤں کا رخ ایک بار پھر لاہور کی طرف، سموگ سے بچاؤ کی تدابیر کی اپیل

(24نیوز)لاہور میں ہوائوں کا رخ ایک بار پھر شہر کی طرف ہونے کی امید ہے۔ حکومت نے شہریوں سے سموگ سے بچاؤ کی تدابیر اختیار کرنے کی اپیل کی ہے۔

 وزیر اطلاعات پنجاب مریم اورنگزیب نے کہا کہ شہریوں کو سموگ سے بچاؤ کے لیے ماسک لازمی پہننے چاہیے۔انہوں نے اس بات پر زور دیا کہ اجتماعی کوششوں سے شہریوں کی زندگی کا تحفظ ممکن ہے، وزیراعلیٰ کی زیرو ٹالرنس پالیسی کے تحت کارروائیاں تیز کر دی گئی ہیں، جس کے تحت صبح کے اوقات میں تعلیمی اداروں میں چھاپے مارے گئے اور متعدد نوٹسز جاری کیے گئے ہیں۔

لاہور کے انٹری پوائنٹس پر ہیوی ٹرانسپورٹ ویہیکلز (HTV) کا داخلہ سختی سے بند کر دیا گیا ہے۔ مریم اورنگزیب نے بتایا کہ خصوصی طور پر تعینات  سکواڈز نے 134 بڑے وہیکلز کو روکا ہے۔سموگ رولز کی خلاف ورزی پر پنجاب میں 10 بھٹے مسمار کر دیے گئے ہیں، جبکہ ایمیشن کنٹرول سسٹم نصب نہ کرنے پر وہاڑی میں ایک فیکٹری بھی مسمار کی گئی۔ لاہور میں 12 اور دیگر اضلاع میں 10 صنعتی یونٹس کو سیل کیا گیا ہے، اور لاہور میں 3 فیکٹریوں کے خلاف ایف آئی آر بھی درج کی گئی ہیں۔ 

فائنل کال،24 نومبر کو احتجاج کی قیادت عمران خان خود کریں گے؟

(24 نیوز)تحریک انصاف کا جارحانہ رویہ پھر سے مفاہمت میں تبدیل ہوتا ہوا نظر آرہا ہے۔ظاہر ہے بانی پی ٹی آئی نے اسٹیبلشمنٹ سے مذاکرات کیلئے وزیر اعلیٰ خیبرپختونخوا علی امین گنڈاپور کو فری ہینڈ دے دیا ہے ۔ایسا لگ رہا ہے جیسے تحریک انصاف کو نظر آرہا ہے کہ 24 نومبر کا احتجاج مؤثر ثابت نہیں ہوگا۔اور پی ٹی آئی کے اندر سے بھی یہ آوازیں اُٹھ رہی ہیں کہ یہ احتجاج انتشار کو ہوا دے سکتا ہے ۔یہاں تک کہ جے یو آئی ف کے رہنما مولانا عبد الغفور حیدری بھی اِس خدشے کا اظہار کر رہے ہیں ۔وہ کہتے ہیں کہ احتجاج تحریک انصاف کا آئینی حق ہے لیکن اگر وہ نو مئی کو دوہرانا چاہے توکیا کہا جاسکتا ہے۔
یعنی تحریک انصاف کی اپوزیشن اتحادی جماعت کی جانب سے بھی احتجاج پر سوال اُٹھائے جارہے ہیں ۔اور دیکھا جائے تو احتجاجی تحریک چلانے سے ایک بے یقینی کی کیفیت تو رہے گی کہ تحریک انصاف مطلوبہ نتائج حاصل کرسکتی ہے یا نہیں ۔کیونکہ ریاست ہر قسم کی صورتحال سے نمٹنے کیلئے پہلے سے ہی تیار ہے۔اسلام آباد میں دفعہ 144 نافذ ہے اور وہاں رینجرز تعینات کردیے گئے ہیں ۔پنجاب پولیس نے بھی امن و امان خراب کرنے والوں سے سختی سے نمٹنے کا فیصلہ کرلیا اور صوبے بھر سے 10 ہزار 700 کی نفری اسٹینڈ بائی کردی ہے۔یعنی ریاست ٹکراؤ کا جواب ٹکراؤ سے دینے کو تیار ہے۔اختیار ولی خان کہتے ہیں کہ علی امین گںداپور کو سوچنا ہوگا کہ وہ کس کے ساتھ کھڑے ہیں ،پھر اِسی طرح وزیر اطلاعات پنجاب عظمیٰ بخاری کا ایک سوال کے جواب میں کہنا تھا کہ احتجاج کرنے والوں کے ساتھ وہی سلوک ہوگا جو دہشتگردوں کے ساتھ ہوتا ہے ۔مزید دیکھئے پروگرام’10تک‘کی اس ویڈیو میں

بیٹر کازوردار شاٹ، گیند امپائر کے منہ پر لگ  گیا، تشویشناک حالت میں ہسپتال منتقل

(24نیوز) آسٹریلین ڈومیسٹک کرکٹ میں بیٹر  کی جانب سے زور دار شارٹ  کھیلنے کے بعد گیند  امپائر کے منہ پرلگ گیا جس پر  امپائر کو تشویشناک حالت میں ہسپتال پہنچا دیا گیا۔

غیر ملکی میڈیا رپورٹس کے مطابق پرتھ میں کھیلے گئے ایک مقامی میچ کے دوران آسٹریلوی امپائر ٹونی ڈی نوبریگا کے چہرے پر گیند لگ گئی جس سے ان کے چہرے کا حلیہ بگڑ گیا۔میچ میں بیٹر نے سٹریٹ ڈرائیو شاٹ کھیلا جس کے بعد گیند سیدھی امپائر کے چہرے پر لگی جس سے ان کے چہرے پر شدید چوٹیں آئیں اور انہیں فوری ہسپتال منتقل کیا گیا۔ڈاکٹرز کا  کہنا ہے کہ  آسٹریلوی امپائرہسپتال میں داخل ہیں، ان کی کوئی ہڈی نہیں ٹوٹی پھر بھی ان کا آپریشن کیے جانے کا امکان ہے۔سوشل میڈیا پر امپائر کی تصویر سامنے آنے کے بعد ان کے لیے نیک خواہشات کا اظہار کیا جا رہا ہے۔

سابق قومی ٹیسٹ کرکٹر و امپائر انتقال کرگئے

(وسیم احمدسے)سابق قومی ٹیسٹ کرکٹر و امپائر نذیر جونئیر انتقال کرگئے،نذیر جونئیر گذشتہ ایک ہفتے سے شدید علیل تھے،وہ لاہور کے مقامی ہسپتال میں زیر علاج تھے۔

سابق ٹیسٹ کرکٹر نذیر جونئیر نے پاکستان کیلئے 14 ٹیسٹ اور 4 ون ڈے میچز کھیل رکھے تھے۔نذیر جونئیر نے مجموعی طور پر 37 وکٹیں حاصل کر رکھی ہیں۔نذیر جونئیر پاکستان کی جانب سے ڈیبیو ٹیسٹ کی پہلی اننگز میں سب سے زیادہ 7 وکٹیں لینے والے پہلے سپنر بھی ہیں۔نذیر جونئیر نے 15 ون ڈے اور 5 ٹیسٹ میچز میں امپائرنگ کے فرائض بھی انجام دئیے۔