جماعت اسلامی کا انکار،پی ٹی آئی جے یو آئی (ف)سے مل کر حکومت بنائے گی؟

قومی اسمبلی کا اجلاس 29 فروری صبح دس بجے بلانے کا فیصلہ

(عثمان خان)قومی اسمبلی کا اجلاس 29 فروری صبح دس بجے بلانے کا فیصلہ کرلیا گیا۔

ذرائع کے مطابق وزارت پارلیمانی امور نے اجلاس بلانے کی سمری تیار کرلی ۔وزارت پارلیمانی امور سمری کو ایوان صدر کی جگہ قومی اسمبلی سیکرٹریٹ کو بھجوائے گی۔سیکرٹری قومی اسمبلی کی منظوری کے بعد قومی اسمبلی کا افتتاحی اجلاس بلایا جائے گا۔ صدر مملکت کی جانب سے اجلاس بلائے جانے کی سمری مسترد ہونے کے بعد وزارت پارلیمانی امور نے سمری قومی اسمبلی سیکرٹریٹ بھجوانے کا فیصلہ کیا۔

یاد رہے کہ صدر مملکت عارف علوی نے قومی اسمبلی اجلاس بلانے کی سمری مسترد کرکے واپس بھیج دی ہے۔ذرائع کے مطابق صدر مملکت عارف علوی نے موقف اختیارکیا ہےکہ پہلےخواتین اور اقلیتوں کی نشستوں کو مکمل کیا جائے.

نگران وفاقی حکومت کا مؤقف ہے کہ آرٹیکل91کی دفعہ 2 کے تحت 21 دن تک اجلاس بلانا لازمی ہے، صدراجلاس نہیں بھی بلاتے تو 29 فروری کو قومی اسمبلی کا اجلاس ہر صورت ہوجائے گا اور 29 فروری کو ہونے والا اجلاس آئین کے عین مطابق ہوگا۔

ن لیگ نے وزیراعلیٰ کا ایک اور امیدوار لانے کا اعلان کردیا

(24 نیوز)خیبر پختونخوا اسمبلی میں اپوزیشن نے اپنا امیدوار لانے کا اعلان کر دیا۔

میڈیا سے گفتگو میں خیبر پختونخوا اسمبلی میں مسلم لیگ ن کے ٹکٹ پر خواتین کی نشست پر نامزد رکن اسمبلی صوبیہ شاہد نے کہا ہے کہ کے پی اسمبلی میں اپوزیشن جماعتیں مل کر وزیراعلیٰ کا متفقہ امیدوار لائیں گی۔ اسمبلی میں اپوزیشن جماعتیں اسپیکر اور ڈپٹی اسپیکر کے امیدواران بھی کھڑے کریں گی۔

رہنما مسلم لیگ ن کا کہنا تھا وزیراعلیٰ، اسپیکر اور ڈپٹی اسپیکر کی ناموں کا اعلان اپوزیشن جماعتوں کے اجلاس میں کیا جائے گا۔ اسمبلی میں ن لیگ کے 9 نمائندگان عوام اور صوبے کے حقوق کے لیے بھرپور جنگ لڑیں گے۔

قومی اسمبلی،کتنے ارکان گریجوایٹ ہیں؟

(ویب ڈیسک)قومی اسمبلی کے نئے منتخب ممبران میں تعلیم یافتہ ارکان کی اکثریت ہے۔

2024 کے عام انتخابات میں رکن قومی اسمبلی منتخب ہونے والوں میں گریجویٹ اور ماسٹرز سرفہرست ہیں۔تحقیق میں دلچسپ اعدادو شمار سامنے آئے ہیں۔اعداد و شمار کے مطابق منتخب 265 میں سے 42 فیصد یعنی 112 نومنتخب ارکان کی تعلیمی قابلیت گریجویشن ہے۔

قومی اسمبلی،نوجوان ارکان اسمبلی کی تعداد کتنی ہے؟

(ویب ڈیسک)تمام سیاسی جماعتیں پارلیمنٹ میں نوجوانوں کو لانے کے دعوے تو کرتی ہیں لیکن ایسا کچھ نہیں ہوتا ،نئی منتخب قومی اسمبلی میں نوجوانوں کی تعداد 4 فیصد سے بھی کم ہے۔

نجی ٹی وی کی تحقیق میں دلچسپ اعداد و شمار سامنے آئے ہیں،ان اعداد و شمار کے  مطابق قومی اسمبلی میں  درمیانی عمر کے ممبران 52 فیصد سے بھی زیادہ اور نوجوان کی تعداد 4  فیصد سے بھی کم ہے۔

اعداد و شمار کے مطابق 265 میں سے صرف 10نو منتخب ممبران نوجوان ہیں جن کی عمریں 26 سے 35 سال کے درمیان ہیں جبکہ 93 ممبران کی عمریں 46 سے 55 سال کے درمیان ہیں۔

عوام کا پیغام ہے آپس میں بیٹھ کر فیصلہ سازی کریں، بلاول بھٹو

(24 نیوز ) سابق وزیر خارجہ  اور چیئر مین پیپلز پارٹی  بلاول بھٹو کا کہنا ہے کہ امید ہے اعلیٰ عدلیہ  اپنے اوپر لگنے والے داغ کو دھوئے گی اور بانی آئین کو انصاف ملے گا۔

تفصیلات کے مطابق سپریم کورٹ کے باہر میڈیا سے گفتگو کرتے ہوئے بلاول بھٹو کا کہنا تھا کہ ن لیگ کو ووٹ اپنی شرائط پر دیں گے اور حکومت سازی کے لیے اپنے مؤقف پر قائم ہیں اس لیے کسی اور نے اپنا مؤقف تبدیل کرنا ہے تو پیشرفت ہوسکتی ہے، دوران الیکشن مہم میں (ن) لیگ کی مخالفت کے سوال پر بلاول بھٹو زرداری نے کہا کہ میں اپنی مہم کے مطابق چل رہاہوں، اگر میں الیکشن جیت جاتا اور اکثریتی جماعت ہوتا تو کہہ سکتا تھا کہ یہ میرا مینڈیٹ ہے لیکن عوام کی دانشمندی اور شعور دیکھیں کہ کسی ایک جماعت کو اکثریت ہی نہیں دی کہ وہ اپنے طور پر حکومت کرے، عوام نے پیغام دیا ہےکہ ملک ایک جماعت نہیں چلاسکتی، آپس میں بیٹھ کر فیصلہ سازی کریں، عوام کہہ رہے ہیں جسے حکومت کرنا ہے دوسرے لوگوں کے ساتھ ملنا پڑے گا۔

انہوں نے کہا کہ حقیقت یہ ہے کہ عوام نے ایسا فیصلہ دیا ہے جس پر اب مجبوراً تمام اسٹیک ہولڈرز سیاسی جماعتوں کو مل بیٹھ کر اتفاق کرنا پڑے گا تاکہ ہم نہ صرف اپنی جمہوریت بلکہ پارلیمانی نظام، معیشت اور وفاق کو بچاسکیں۔

 بلاول بھٹو کا کہنا تھا کہ جو سیاسی جماعتیں اتحاد بناتی ہیں تو کسی کے کچھ پوائنٹس مانے جائیں گے، اب اس پوری کشمکش میں واحد طریقہ ڈائیلاگ اور کمپرومائز ہے، حکومت سازی کے عمل میں تاخیر سے پاکستان کے سیاسی استحکام پر سوالات اٹھ رہے ہیں اس لیے جتنی جلدی حکومت سازی کا عمل مکمل ہوجاتا اتنا بہتر ہوتا،انہوں نے مزید کہا کہ پیپلز پارٹی نے فیصلہ کیا ہے کہ جو ہمارے پاس آئے ہیں ان سے مل کر بات کریں گے، مجھے (ن) لیگ کو ووٹ دینا ہے تو اپنی شرائط پر دونگا، (ن) لیگ کی شرائط پر ووٹ کیسے دوں؟ 

چیئرمین پی پی کا کہنا تھاکہ حکومت سازی کے حوالے سے جو مشاورتی کمیٹیاں ہیں وہ سست روی کا شکار ہیں، اس غیر سنجیدگی کا نقصان پاکستان اور جمہوریت کو ہورہاہے اس لیے یہ جتنی جلدی معاملہ حل ہو یہ استحکام اور آنے والی حکومت کے لیے بہتر ہوگا،بلاول بھٹو نے کہا کہ ہمیں یا پیپلز پارٹی کو کوئی جلدی نہیں، ہم اپنے مؤقف پر قائم ہیں، کسی اور نے اپنا مؤقف تبدیل کرنا ہے تو پیشرفت ہوسکتی ہے اگر کوئی اپنا مؤقف تبدیل کرنے کو تیار نہیں تو بہت خطرناک تعطل نظر آرہا ہے، اس کے نتجے میں جو ہوگا وہ جمہوریت، معیشت اور سیاسی استحکام کے لیے فائدہ مند نہیں ہوگا۔

ایک صحافی کے سوال پر بلاول بھٹو نے کہا کہ آپ کے پاس کیا ثبوت ہے کہ میں اسٹیلشمنٹ سے ملا ہوا ہوں،  مجھ پر الزام لگانے سے پہلے ثبوت دیں، اگرمولانا یا کوئی بات کرتے ہیں تو ان سے پوچھیں، اگر میری ملاقات ہوئی بھی توکیا میں نے جمہوریت، آئین پر بات کی یا سودے بازی کی؟

پاکستان تحریک انصاف پارلیمنٹیرینز خواتین کی مخصوص نشستوں سے دستبردار

(ویب ڈیسک )سابق وزیر اعلیٰ پرویز خٹک کی جماعت پاکستان تحریک انصاف پارلیمنٹیرینز خواتین کی مخصوص نشستوں سے دستبردار ہوگئی۔

 میڈیا ذرائع کے مطابق  پی ٹی آئی پی کی مخصوص نشستوں کیلئے پارٹی سے نامزد تمام خواتین نے استعفے الیکشن کمیشن میں جمع کرادیے ہیں۔

استعفے دینے والی خواتین میں سومی فلک ناز، یاسمین فہد، آسیہ اسد، نائمہ اسلم، ثوبیہ رحمان، انیتا محسود اور نادیہ شیر شامل ہیں،پاکستان تحریک انصاف پارلیمنٹیرینز نے خیبرپختونخوا اسمبلی میں 2 نشتیں جیتیں ہیں۔

یاد رہےکہ اس سے قبل سربراہ پی ٹی آئی پارلیمنٹیرینز پرویزخٹک کا بھی بطور پارٹی چیئرمین استعفی سامنے آیا تھا۔

عام انتخابات میں دھاندلی:چیف الیکشن کمشنر پر مقدمہ درج کرکے گرفتار کرنے کا مطالبہ

 (24نیوز)عام انتخابات میں دھاندلی کے خلاف احتجاج زورپکڑ گیا،جماعت اسلامی اور نیشنل پارٹی نے چیف الیکشن کمیشنر کیخلاف مقدمہ درج کرنے کا مطالبہ کردیا ۔ساتھ ساتھ گرفتاری کا مطالبہ بھی کیا جارہا ہے۔

نجی ٹی وی کی رپورٹ کے مطابق سینیٹ اجلاس میں اظہار خیال کرتے ہوئے نیشنل پارٹی کے رہنما سینیٹر طاہر بزنجو نے کہا کہ بلوچستان میں چن چن کر حقیقی عوامی نمائندوں کو ہرایا گیا اور صوبے میں دوبڑی جماعتوں کی آشیرباد سے ڈرگ لارڈ اور لینڈگریبرز کو اسمبلی تک پہنچایا گیا۔انہوں نے سوال اٹھایا کہ کیا عدلیہ کو حق تھا کہ وہ پی ٹی آئی کا نشان چھینے؟ ایسے دھاندلی زدہ انتخابات کے نتیجے میں ملک میں استحکام آئے گا؟

طاہر بزنجو نے مطالبہ کیا کہ چیف الیکشن کمشنر کو گرفتار کرکے آئین شکنی کا مقدمہ چلایا جائے۔ لاپتا افراد کے مسئلے کو التوا میں ڈالنےکے لیے یہ سب کیا گیا ہے۔

2نومنتخب آزاد ارکان اسمبلی کا ن لیگ میں شمولیت کااعلان

(ویب ڈیسک)نومنتخب رکن اسمبلی محمد ادریس اور  کاشف نوید نے مسلم لیگ ن میں شمولیت کا اعلان کردیا.

تفصیلات کے مطابق مسلم لیگ ن کے صدرشہبازشریف سےنومنتخب آزاد ارکان  محمد ادریس اور کاشف نوید نے ملاقات کی، دونوں نومنتخب ارکان نے  مسلم لیگ (ن)میں شمولیت کا اعلان  کر دیا،اس موقع پر امیر مقام، سعد رفیق، اعظم نذیر تارڑ، عطا اللہ تارڑ اور ملک احمد خان بھی موجود تھے، شہباز شریف نے محمد ادریس اور کاشف نوید کو ن لیگ میں شمولیت پر مبارکباد دی۔

 یاد رہے کہ محمد ادریس این اے 12کوہستان سے آزادامیدوار کی حیثیت سے منتخب ہوئے تھے،کاشف نوید پی پی 242بہاولنگر سے آزاد امیدوار کی حیثیت سے منتخب ہوئے تھے۔

 فرقہ واریت پھیلانے والوں کو کبھی کامیاب ہونے نہیں دیں گے، علامہ ناصر عباس

(24نیوز)مجلس وحدت المسلمین ( ایم ڈبلیو ایم ) کے سربراہ علامہ راجہ ناصر عباس نے کہا ہے کہ ملک کے نوے فیصد لوگ بانی پی ٹی آئی عمران خان  کے ساتھ کھڑے ہیں،ہم فرقہ واریت پھیلانے والوں کو کبھی کامیاب ہونے نہیں دیں گے۔

اسلام آباد میں پی ٹی آئی رہنما بیرسٹر گوہر اور سربراہ سنی اتحاد کونسل صاحبزادہ حامد رضا کے ساتھ مشترکہ پریس کانفرنس کرتے ہوئے مجلس وحدت المسلمین کے سربراہ علامہ ناصر عباس نے کہا کہ  پاکستان کی تاریخ میں تحریک انصاف کے ورکرز نے ڈٹ جانے کی تاریخ رقم کی ، لوگوں کو خوف زدہ کرنے کیلئے ہتھکنڈے استعمال کئے گئے اور غیر آئینی طور پر الیکشن بھی التوا کا شکار کیا گیا،انہوں نے کہا کہ پی ٹی آئی کی لیڈر شپ کو جیل میں ڈال کر جعلی کیسز بنائے گئے اور پی ٹی آئی سے ان کا انتخابی نشان بھی چھین لیا گیا، ہم پی ٹی آئی کے ساتھ بوجھ اٹھانے والے بنیں گے، ملک کے نوے فیصد لوگ بانی پی ٹی آئی کے ساتھ کھڑے ہیں۔

یاد رہے کہ پاکستان تحریک انصاف نے قومی اور صوبائی سطح پر سنی اتحاد کونسل کے ساتھ اتحاد کا اعلان کر دیا ہے اور پی ٹی آئی کی حمایت سے کامیاب ہونے والے آزاد امیدوار سنی اتحاد کونسل میں شامل ہوں گے۔

خیال رہے کہ اس سے قبل پی ٹی آئی کی جانب سے مجلس وحدت المسلمین کے ساتھ اتحاد پر بھی غور کیا جا رہا تھا۔

پی ٹی آئی کے تمام آزاد ارکان اسمبلی سنی اتحاد کونسل میں شامل ہوں گے: بیرسٹر گوہر

(24نیوز )سیاست میں نیا موڑ،پی ٹی آئی نے اپنے آزاد امیدواروں کی سنی اتحاد کونسل میں شمولیت کا اعلان کر دیا ، بیرسٹر گوہر نے کہا کہ الیکشن کمیشن قانون کے مطابق ہمیں ہماری مخصوص نشستیں فراہم کرے، سنی اتحاد کونسل میں شمولیت کا فیصلہ اتفاق رائے سے کیا گیا ہے۔

تفصیلات کے مطابق پی ٹی آئی کے چئیرمین بیرسٹر گوہر نےپریس کانفرنس سے خطاب کرتے ہوئے کہا کہ تحریک انصاف کے جتنے بھی امیدوار منتخب ہوئے ہیں ،وہ آپ سب لوگوں کو معلوم ہے ، پاکستان تحریک انصاف کے امیدوار نیشنل اسمبلی میں 180 سیٹوں پر جیت چکے ہیں ، جتنے امیدوار نوٹیفائی ہو چکے ہیں، جو ہمیں ہمارے آزاد امیدوار وں نے جن حالات میں الیکشن لڑا ، ان کو آزاد سمجھا گیا، ہمارا کہناہے کہ وہ تحریک انصاف کے امیدوار تھے ، پی ٹی آئی کے ہی ٹکٹ انہیں دیئے گئے ، انہیں "بلا" دیا جانا تھا لیکن آخری دن فیصلے سے قبل ہی آزاد نمائندوں کے نشان دیئے گئے ، جتنوں نے بھی لڑا انہیں پی ٹی آئی نے سپورٹ کیا ، وہ سارے صوبوں میں جیتے، الیکشن کمیشن کی نظر میں انہیں تحریک انصاف کے حمایت یافتہ آزاد امیدوار کہا جاتاہے۔
بیرسٹر گوہرکا کہناتھا کہ  ابھی تک تین نوٹیفکیشن ہوئے ہیں، 16،17 اور 18 فروری کو نوٹیفکیشن جاری ہو چکاہے ، اس کے مطابق آزاد نے تین دن میں پارٹی کو جوائن کرنا ہوتاہے ،ہمیں خوشی ہے کہ ہمارے ساتھ مولانا علامہ ناصر اور حامد رضا بیٹھے ہوئے ہیں، ہم نے کل بھی مشاورتی میٹنگ کی تھی، ہماری تفصیلی بات ہو چکی ہے ، سب کے اتفاق رائے اور مشور ے سے ، یہ اتحاد اس ملک کیلئے ہے ، جمہوریت  کیلئے اتحاد ہے ، ہم نے ان حالات میں ایک دوسرے کو کندھا دینا تھا تاکہ قانون کے مطابق آگے بڑھیں ، قومی اور صوبائی اسمبلیوں کے ہمارے تمام کامیاب امیدوار سنی اتحاد کونسل میں شامل ہوں گے ۔

خیبرپختونخوا میں تحریک انصاف کے اندر اختلافات نے سر اٹھا لیا

(عامر شہزاد )خیبرپختونخوا میں تحریک انصاف کے اندر اختلافات نے سر اٹھا لیا،تحریک انصاف پارلیمنٹرین سے اتحاد ہو تو شدید احتجاج کیا جائے گا،اراکین صوبائی و قومی اسمبلی نے تحریک انصاف پارلیمنٹرین کے ساتھ اتحاد کی مخالفت کردی۔
پی ٹی آئی کا پاکستان تحریک انصاف پارلیمنٹرینز کے اتحاد پر پی ٹی آئی کے اندر اختلافات سامنے آگئے،ذرائع کے مطابق پرویز خٹک نے پی ٹی آئی میں واپس آنے کے لئے اپنی پارٹی سے استعفی دیا۔تحریک انصاف کے اراکین اسمبلی نے پرویز خٹک گروپ کے ساتھ اتحاد کی مخالفت کردی ۔

مریم نواز نے صوبے کا چارج سنبھالنے کی تیاریاں شروع کردیں

(24 نیوز) پنجاب کی نامزد وزیراعلیٰ مریم نواز نے منتخب ہونے سے پہلے ہی  صوبے کو سنبھالنے کی تیاریاں شروع کردی ہیں۔مختلف سرکاری محکموں سے بریفنگ لینے کا سلسلہ شروع کردیا ہے۔

 اطلاعات کے مطابق سب سے پہلےچیف سیکرٹری پنجاب اور سیکرٹری صحت علی جان نے مریم نواز کو بریفنگ دی جب کہ جمعہ کو سیکرٹری سی این ڈبلیو، سیکرٹری ایکسائز ور محکمہ تعلیم کے دونوں سیکرٹریوں نے نامزد وزیر اعلی کو بریفنگ دیں، آج مزید محکموں کے سیکرٹری بریفنگ دیے گے جس کے بعد نئی حکومت کیلئے ورکنگ پالیسی سازی کی جائے گی۔

’پیپلزپارٹی سے مل کر حکومت چلائیں گے‘لیگی رہنما نے معاملات طے پانے کی تصدیق کردی

(ویب ڈیسک)سینئر ن لیگی رہنما سینیٹر عرفان صدیقی نے پیپلز پارٹی سے معاملات طے پاجانے کی تصدیق کردی،کہتے ہیں کہ میرے خیال سے بڑی حد تک معاملات طے پاچکے ہیں اور (ن) لیگ، پیپلزپارٹی مل کر حکومت چلائیں گے۔

نجی ٹی وی کے پروگرام  میں گفتگو کرتے ہوئے سینیٹر عرفان صدیقی کا کہنا تھا کہ میرا اندازہ ہے بلاول بھٹو نے مجموعی طور پر تعاون کی بات کی ہے،بلاول نے اپنے ذاتی اور سیاسی مفادات کو بالائے طاق رکھنے کی بات کی ہے تو بہت اچھی بات ہے۔مدد یہ نہیں کہ ہم ان کا وزیراعظم بنائیں یا وہ ہمارا وزیراعظم بنائیں، مدد یہ ہے کہ ہم ساتھ مل کر چلیں۔

ساڈا حق اتھے رکھ ، سب کو میرا ساتھ دینا ہو گا، علی امین گنڈا پور

(24نیوز) پی ٹی آئی کے نامزد وزیرِ اعلیٰ خیبر پختونخوا علی امین گنڈا پور  کا کہنا ہے کہ لوگوں کے حق کے حوالے سے ساڈا حق اتھے رکھ کیلئے مشہور ہوں۔ مجھے ایک روپیہ بھی نا ملے اور میں خاموش رہوں یہ نہیں ہوسکتا۔ ہم سب نے مل کر کھڑا ہونا ہے۔ 

خیبرپختونخوا میں پی ٹی آئی کے نو منتخب ممبران اسمبلی کا پہلا اجلاس آج طلب کیا گیا۔ پارٹی ذرائع کے مطابق اجلاس کی صدارت پی ٹی آئی کے نامزد وزیر اعلیٰ علی امین گنڈاپور نے کی۔ پارلیمانی اجلاس میں حالیہ انتخابات میں منتخب ہونے والے رکن صوبائی اسمبلی شریک ہوئے۔

پشاور میں صحافیوں سے ملاقات کے موقع پر گفتگو کرتے ہوئے علی امین گنڈا پور کا کہنا تھا کہ پی ایم پورٹل طرز پر سی ایم پورٹل بنا رہے ہیں، صوبے کے حقوق کے لیے بھرپور کوشش کریں گے، سب کو میرا ساتھ دینا ہو گا۔ ہم خیرات نہیں مانگ رہے لیکن لوگوں کے حق کے حوالے سے ساڈا حق اتھے رکھ کیلئے مشہور ہوں۔ مجھے ایک روپیہ بھی نا ملے اور میں خاموش رہوں یہ نہیں ہوسکتا۔ ہم سب نے مل کر کھڑا ہونا ہے۔

 اُن کا کہنا تھا کہ ایوان میں موجود تمام سیاسی جماعتوں کو ساتھ لے کر چلوں گا،عوام نے اُنہیں بھی حلقے اور صوبے کے حق کی بات کیلئے بھیجا ہے۔ پی ٹی آئی پارلیمنٹرین کے علاوہ قانونی ٹیم دو تین جماعتوں کے ساتھ بات چیت ہورہی ہے۔ بلے کا نشان جانے سے ایک دھچکا لگا، ہماری پہلی کوشش اپنی پارٹی کا پلیٹ فارم لینا ہے۔

انہوں نے کہا کہ  اسمبلی میں کافی نئے ارکان آئے ہیں۔ کابینہ کی تشکیل کا عمل شروع ہوچکا ہے جلد ہی سفارشات عمران خان کو بھجوائیں گے،زندگی میں کبھی تھانے نہیں گیا جتنے بھی کیس بنے وہ سب سیاسی ہیں، نو مئی پر آج بھی وہی موقف ہے کہ ہم نے نہیں کیا، تحقیقات ہوں گی تو پتہ چلے گا کہ نو مئی ہوا ہے کہ کروایا گیا ہے۔ 

مرکز اور پنجاب میں پی ٹی آئی حکومت بنائیگی،عمرایوب

 (24 نیوز) اسلام آباد  میں پاکستان تحریک انصاف ( پی ٹی آئی )کے چیئر مین بیرسٹرگوہر کی عمرایوب کے ہمراہ پریس کانفرنس ، پی ٹی آئی کا الیکشن میں دھاندلی پرجوڈیشل کمیشن بنانے کا مطالبہ ،  مرکز اور پنجاب میں پی ٹی آئی حکومت بنانے کا دعوی ۔
 میڈیا سے بات کرتے ہوئےتحریک انصاف کے  رہنما عمر ایوب کا  کہنا تھاکہ  ہمارے پاس لوگ نہیں ہوں گے پولنگ ایجنٹس بھی نہیں ہوں گے، ہمیں عوام نے 3 کروڑ سے زائد ووٹ دیے جس پر تہہ دل سے ان کے شکر گزار ہیں,ن کا کہنا تھا الیکشن میں 180 نشستیں ہم جیتے ہیں جو ہمیں ملنی چاہئیں، پنجاب اور کراچی میں ہماری نشستیں چھینی گئیں، کراچی میں ایم کیو ایم نے ہماری 18 نشستیں چوری کیں جبکہ پشاور میں بھی ہمیں 7 سے 8 نشستوں پر ہروایا گیا، جو کچھ عوام کے ساتھ ہو رہا ہے اس دھاندلی کو مدر آف آل رگنگ ڈکلیئر کرتے ہیں۔

ڈیڈلاک ختم، پیپلز پارٹی وفاقی کابینہ میں شامل ہونے کیلئے تیار ہوگئی

 (ویب ڈیسک )مسلم لیگ ن اور  پیپلزپارٹی کے درمیان حکومت سازی کے معاملے پر مثبت پیشرفت سامنے آئی ہے اور  پیپلز پارٹی نے وفاقی کابینہ میں شامل ہونے کے لیے رضامندی ظاہر کر دی ہے۔

نجی ٹی وی کے ذرائع کے مطابق مسلم لیگ ن اور  پیپلزپارٹی نے ملکر ملک کو معاشی اور سیاسی بحران سے نکالنےکا فیصلہ کیا ہے۔ذرائع کا کہنا ہے کہ پیپلزپارٹی نے وفاقی کابینہ میں شمولیت کے لیے رضامندی ظاہرکر دی ہے، پیپلز پارٹی اور ن لیگ میں حکومت سازی کے معاملات  آخری مراحل میں پہنچ گئے ہیں ،ذرائع کا بتانا ہے کہ صدر مملکت اور اسپیکر قومی اسمبلی کے عہدے پیپلزپارٹی کو ملیں گے جبکہ چیئرمین سینیٹ اور چاروں گورنرز کا فیصلہ بعد میں کیا جائے گا۔

ذرائع کے مطابق بلوچستان میں پیپلزپارٹی اور ن لیگ مل کر حکومت بنائیں گی جس میں وزیراعلیٰ پیپلزپارٹی کا ہوگا،  پیپلزپارٹی پنجاب میں بھی کابینہ کا حصہ بنے گی، پیپلز پارٹی کو پنجاب میں 2 یا 3 وزارتیں ملنے کا امکان ہے۔

پاکستان تحریک انصاف کا سنی اتحاد کونسل سے اتحاد کا فیصلہ

(عثمان خادم کمبوہ) پی ٹی آئی سے تعلق رکھنے والے آزاد امیدوار سنی اتحاد کونسل میں شامل ہونگے،پی ٹی آئی پنجاب میں سنی اتحاد کونسل کے پلیٹ فارم سے حکومت بنائے گی۔

ذرائع کے مطابق  پاکستان تحریک انصاف (پی ٹی آئی)نے سنی اتحاد کونسل سے اتحاد کا فیصلہ کیا ہے ،پی ٹی آئی سے تعلق رکھنے والے آزاد امیدوار سنی اتحاد کونسل میں شامل ہونگے،پی ٹی آئی پنجاب میں سنی اتحاد کونسل کے پلٹ فارم سے حکومت بنائے گی۔

الیکشن کمیشن نے مزید 36 امیدواروں کی کامیابی کا نوٹیفکیشن جاری کردیا

(عثمان خان )الیکشن کمیشن نے مزید 36 امیدواروں کی کامیابی کا نوٹیفکیشن جاری کردیا۔

 خیبرپختونخوا سے قومی اسمبلی کے حلقہ این اے1 سے این اے 7تک آزادامیدوارکامیاب ہوئے،حلقہ این اے 8پر آزاد امیدوار ریحان زیب کے قتل کے بعد الیکشن ملتوی کیے تھے ۔

 نوٹیفیکیشن کے مطابق حلقہ این اے 9،این اے10,این اے 12اوراین اے 13سے آزادامیدوران کامیاب ہوئے جبکہ حلقہ این اے 14سے پاکستان مسلم لیگ ن کے سردارمحمدیوسف کامیاب قرار پائے، حلقہ۔این اے 17سے این اے 26اوراین اے 29 سے این اے 36تک اور  حلقہ این اے 39 سے این اے 41تک بھی آزادامیدواران کی کامیابی کا نوٹفیکیشن جاری کیا گیا ۔ 

حلقہ این اے 37سے مجلس وحدت مسلمین کے حمیدحسین اور حلقہ این اے 45سے پاکستان پیپلزپارٹی پارلیمنٹیرین کے فتح اللہ خان کامیاب قرار پائے ۔ 

بلوچستان میں پیپلزپارٹی حکومت بنائے گی:سرفرازبگٹی

(طیب سیف)سابق وزیر داخلہ سرفراز بگٹی  نے کہا ہے کہ کچھ حلقوں میں ہمارے ساتھ زیادتی ہوئی ہے ،چئیرمین بلاول بھٹو نے تمام الیکشن کو تحفظات کے باوجود کھلے دل سے تسلیم کیا ہے ۔بلوچستان کے لوگوں نے ہمیں تاریخی مینڈیٹ دیا ہے ۔

حکومت سازی پرمسلم لیگ ن ، پیپلز پارٹی میں ڈیڈ لاک برقرار

(راؤ دلشاد)مسلم لیگ ن اور پیپلز پارٹی میں حکومت سازی کے معاملات پر ڈیڈ لاک برقرار ،پیپلز پارٹی کے حکومت سازی کیلئے مطالبات میں مزید اضافہ ہوگیا۔

ذرائع کا کہنا ہے کہ اہم ترین آئینی عہدوں کےمطالبے کے بعد پی پی پی کے نئے مطالبات کا انکشاف ہوا ہے۔پیپلز پارٹی نے ن لیگ سے پنجاب میں انتظامی سیٹوں پر بھی حصہ مانگ لیا،پیپلز پارٹی نے پنجاب میں مختلف اتھارٹیز، کارپوریشنز کے عہدے مانگ لئے  ہیں۔

ذرائع کا کہنا ہے کہ پنجاب میں کمپنیز کے چیئرمین اور وائس چیئرمین کے عہدے بھی مانگ لئے گئے،مسلم لیگ ن اور پیپلز پارٹی کی کوآرڈینیشن کمیٹیوں کی آئندہ نشست کل پھر ہو گی،قبل ازیں پیپلز پارٹی کے وفاق ،پنجاب میں آئینی عہدوں کےمطالبات پر ڈیڈ لاک برقرار  ہے۔

مسلم لیگ ن نے بلوچستان میں حکومت بنانے کا فیصلہ کرلیا

(ویب ڈیسک)مسلم لیگ ن نے وزیراعلیٰ بلوچستان کے لیے اپنا امیدوار لانے کا فیصلہ کرلیا۔

نجی ٹی وی کی رپورٹ کے مطابق مسلم لیگ ن بلوچستان کے پارلیمانی گروپ کا اجلاس ہوا جس میں آزاد اراکین اور دیگر جماعتوں سے بات چیت کے لیےکمیٹی کی تشکیل دی گئی۔

اس کے علاوہ اجلاس میں مسلم لیگ ن نے وزیراعلیٰ بلوچستان کے لیے اپنا امیدوار لانے کا فیصلہ بھی کیا۔

عدم استحکام کسی کے مفاد میں نہیں، سب مل کر پاکستان کیلئے کام کریں:شہباز شریف

(24 نیوز)پاکستان مسلم لیگ ن کے صدر شہباز شریف کا کہنا تھا کہ عدم استحکام کسی کے مفاد میں نہیں، معاشی خطرات کا تقاضا ہے کہ سب مل کر پاکستان کیلئے کام کریں۔

پنجاب اور خیبرپختونخوا سے نو منتخب آزاد ارکان سے ملاقات کے موقع پر بات چیت کرتے ہوئے شہباز شریف نے کہا کہ پہلے بھی ملک کو ڈیفالٹ سے بچایا، اب بھی یہی ترجیح ہے، جن کا ایجنڈا انتشار ہے وہ اب بھی انتشار پھیلا رہے ہیں۔نوازشریف اپنی ذات اور سیاست کا نہیں، ہمیشہ پاکستان اور عوام کا مفاد سوچتے ہیں، ہم ملک کو کسی نئی مصیبت اور بحران سے بچانے کی کوشش کر رہے ہیں۔

پی ٹی آئی وفد کا آفتاب شیر پاؤ سے رابطہ ،ملاقات طے

(عثمان خان)عام انتخابات کے بعدمرکز اور صوبوں میں حکومتوں کی تشکیل کیلئے بڑی سیاسی جماعتوں کی جوڑ توڑ جاری ،رابطے اور ملاقاتیں بھی کی جارہی ہیں۔اسی سلسلہ میں پی ٹی آئی وفد نےقومی وطن پارٹی کے چیئرمین آفتاب شیر پاؤ سے رابطہ کرلیا ۔

پی ٹی آئی وفد کی آفتاب شیر پاؤ سے ملاقات کا وقت طے پا گیا ہے۔پی ٹی آئی وفد اور آفتاب احمد شیر پاؤ کے درمیان ملاقات آج اسلام آباد میں ہوگی ،پی ٹی آئی وفد آج شام 5 بجے آفتاب احمد شیر پاؤ سے ملاقات کرے گا۔

انجینئر امیر مقام کی کامیابی کے نوٹیفکیشن کیخلاف درخواست خارج 

(اویس کیانی)اسلام آباد ہائیکورٹ نے مسلم لیگ ن کے منتخب ایم این اے کیخلاف دائر درخواست پر فیصلہ سنادیا۔

اسلام آباد ہائیکورٹ نے فیصلہ سناتے ہوئے این اے 11 شانگلہ سے انجینئر امیر مقام کی کامیابی کے نوٹیفکیشن کیخلاف درخواست خارج  کردی ۔عدالت نے تحریک انصاف کے حمایت یافتہ امیدوار سید فرین کی درخواست مسترد کر دی ۔

ایسا نہیں ہو سکتا کہ بڑے سیاستدان ہار جائیں اور کونسلر نہ بننے والے جیت جائیں ،مریم اورنگزیب

(راؤدلشاد)پاکستان مسلم لیگ (ن) کی سینئر رہنما  مریم اورنگزیب کا کہنا ہے کہ ایسا نہیں ہو سکتا کہ بڑے سیاستدان ہار جائیں اور کونسلر نہ بننے والے جیت جائیں ،پاکستان تحریک انصاف نے جعلی فارم 45 تیار کروائے ، یہ وہ فارم 45 نہیں ہیں جو الیکشن کمیشن نے ہمیں دیئے ۔

تفصیلات کے مطابق مریم اورنگزیب نے عطا تارڑ کے ہمراہ پریس کانفرنس کرتے ہوئے کہا کہ 8 فروری کو پاکستان میں الیکشن ہوئے پاکستان مسلم لیگ ن کے لیے گزشتہ کئی سالوں سے ظلم و بربریت تھی،کمپین بھی چلائی گئی کہ الیکشن نہیں ہورہے،2013 کے بعد یہ اصلی الیکشن ہونے جا رہا تھااور مسلم لیگ ن کے 21 اکتوبر کے بعد بھرپور کمپین چلائی اور پارلیمان بورڈ کے اجلاس بھی ہوئے،الیکشن کے دن کی بات کی جائے تو صبح سے شام تک کسی جماعت نے کوئی سوال نہیں اٹھایا،جب شام کو رزلٹ آنا شروع ہوئے تو پہلے ہی فارم 45 ٹی وی پر چل رہے تھے اس وقت فارم مرتب کیے جا رہے تھے۔
سابق وزیر اطلاعات کا کہنا تھا کہ ہم بھی وائٹ پیپر تیار کر رہے،4فیصد نتائج کو لے کو شور مچایا جا رہا تھا،ہم نے الیکشن کمیشن کو رابطہ کیا کہ ہمارا ریزلٹ روکا جا رہا ہے،ان کے وکلاء جو عدالت میں گئے فارم 45 لے کر نہیں صرف ٹی وی کے سکرین شارٹ لے کر گئے،ان کے پاس کوئی فارم 45 نہیں موجود تھے،اگر آپ کو فارم 45 پر اعتراض ہے تو اس کا جواز یہ سکرین شارٹ نہیں وہ فارم 45 ہیں جو اصلی ہیں،ان کے پاس فارم 45 موجود نہیں اگر موجود ہیں تو الیکشن کمیشن کو دیں پتہ چل جائے کا کہ یہ اصلی ہیں یا جعلی ہیں۔

مریم اورنگزیب نے اپنی بات کو جاری رکھتے ہوئے مزید کہا کہ ایسا نہیں ہو سکتا کہ جو برسوں سے جیتنے والے سیاست دان ہار جائیں کو نسلر نہ بننے والے جیت جائیں،یہ بیان میں کہتے ہیں کہ میں خیبر پختونخوا کو ڈھاکہ بنا دوں گا،ایک الیکشن کے اوپر آپ اعتراض ہے آپ الیکشن کمیشن میں لے کر جائیں،اس کے بعد ہائی کورٹ جائیں سپریم کورٹ جائیں ہم بھی چلے گئے تھے،میں نے میڈیا پر بولا کہ یہ وہ فارم 45 وہ نہیں جو الیکشن کمیشن نے ہمیں دیے ہیں،ان کا خیال تھا کہ 1055 سیٹیں ہیں اور وہ 2000 جیت جائیں،اب کہتے ہیں امریکہ الیکشن کے معاملات پر بولے وہ تو کہتے تھے کہ امریکہ نے آپ کے خلاف سازش کہ ہے،ہر ایک سروے میں چاہے پاکستان کا ہو یا بین الاقوامی ادارے ہوں سب سے آگے فرنٹ رنر مسلم لیگ ن ہے    ۔

نومنتخب رکن قومی اسمبلی عطاء اللہ تارڑ کا کہنا تھا کہ پی ٹی آئی نے اربوں روپے خرچ کرکے جعلی فارم 45 تیار کیے،پی ٹی آئی نے ڈیجیٹل ٹیرارزم کیا،ایک ہی پولنگ اسٹیشن کے دو فارم 45 کیسے تیار کیے جاسکتے ہیں،اب امریکہ سے مدد طلب کی جارہی ہے،فارم 45 جمہوریت کو ڈی ریل کرنے کی سازش کی گئی ہے،افسوس ناک ہے کہ میڈیا پر جعلی فارم 45 ائیر کروائے گئے،ہر پولنگ اسٹیشن پر رپورٹرز کا ہونا ممکن نہیں ہے،پولنگ ایجنٹ کا فراہم کیا ہوا فارم 45 ہی اصلی ہے،میں نےتصدیق شدہ فارم 45 میڈیا سےشیئرکیا،انتخابی عمل کو متنازع بنانے کےلیے پی ٹی آئی نے جعلی فارم 45 میڈیا کو فراہم کیے۔

پی ٹی آئی کے نومنتخب رکن قومی اسمبلی بریگیڈیئر (ر) اسلم گھمن کو اغوا کر لیا گیا

(24نیوز)پاکستان تحریک انصاف کے نومنتخب رکن قومی اسمبلی بریگیڈیئر ریٹائرڈ اسلم گھمن کو نامعلوم افراد نے اغوا کرلیا۔

وزیراعظم کیلئے پی ٹی آئی کے نامزد امیدوار عمر ایوب نے اسلم گھمن کے اغوا کی شدید الفاظ میں مذمت کرتے ہوئے بتایا کہ بریگیڈیئر ریٹائرڈ اسلم گھمن کو سیالکوٹ سے اغوا کیا گیا،عمر ایوب نے الزام عائد کیا کہ اسلم گھمن کو پی ٹی آئی چھوڑ کر ن لیگ میں شامل ہونے پر مجبور کیا جا رہا ہے۔

 پی ٹی آئی رہنما عمر ایوب نے سوشل میڈیا پر اپنے پیغام میں دعویٰ کیا  کہ نو منتخب پی ٹی آئی ایم این اے بریگیڈیئر (ر) اسلم گھمن کو  اغواء کر لیا گیا ہے،اسلم گھمن کو ن لیگ میں شامل ہونے پر مجبور کیا جا رہا ہے، پی ٹی آئی رہنما نے انتخابات میں دھاندلی اور اسلم گھمن کی جبری گمشدگی کی شدید مذمت بھی کی۔

عام انتخابات: خاتون اُمیدوار نے بڑا اعزاز اپنے نام کرلیا

(میاں مظہر) عام انتخابات میں پنجاب کے سب سے بڑے حلقے حافظ آباد میں پاکستان بھر میں دوسرے نمبر پر ووٹ لینے والی خاتون امیدوار آنیقہ مہدی حسن بھٹی نے   2 لاکھ11 ہزار 044ووٹ لے کر اعزاز اپنے نام کر لیا۔ 

عام انتخابات 2024میں جہاں بڑے بڑے برج الٹ گئے وہیں کچھ اُمیدواروں کو اتنے ووٹ پڑے کہ سابقہ ریکارڈ بھی ٹوٹ گئے پنجاب کے سب سے بڑے انتخابی حلقے این اے 67 حافظ آباد میں آنیقہ مہدی حسن بھٹی نے 2 لاکھ11 ہزار 044ووٹ لے کر اپنی مخالف خاتون اُمیدوار سائرہ افضل تارڑ کو ہرا دیا۔ 

مخالف اُمیدوار سائرہ افضل تارڑ   1  لاکھ 83 ہزار  947 ووٹ  حاصل کرسکیں آنیقہ مہدی حسن بھٹی سابق ایم این اے اور مشہور سیاستدان مہدی حسن بھٹی کی بیٹی اور سابق ایم این اے شوکت علی بھٹی کی بہن ہیں۔ 

شوکت علی بھٹی کے 9مئی مقدمات کی وجہ سے الیکشن کی دوڑ سے آوٹ پر ان کی بہن کو میدان سیاست میں اُتارا گیا۔ آنیقہ مہدی حسن بھٹی کا سیاست سے کوئی تعلق نہیں تھا۔ وہ ایک گھریلو خاتون تھیں آنیقہ مہدی بھٹی سے شکست کھانے والی اُمیدوار سائرہ افضل تارڑ نے جیتنے والی اُمیدوار کو مبارکباد دی اور اپنی ہار تسلیم کرلی۔

مولانا فضل الرحمان کے الزامات،سابق آرمی چیف،سابق ڈی جی آئی کا ردعمل بھی آگیا

(ویب ڈیسک)عام انتخابات میں دھاندلی کے الزامات کے بعد جے یو آئی ایف کے سربراہ مولانا فضل الرحمان نے نیا پنڈورا باکس کھول دیا ہے۔انہوں نے عمران خان سے ہاتھ ملانے کے بعد سابق آرمی چیف جنرل (ر)قمر جاوید باجوہ اور سابق ڈی جی آئی ایس آئی جنرل(ر)فیض حمید پر الزامات لگائے ہیں ۔

سابق آرمی چیف جنرل ریٹائرڈ قمر جاوید باجوہ اور  سابق ڈی جی آئی ایس آئی لیفٹیننٹ جنرل  ریٹائرڈ فیض حمید نے دو ٹوک الفاظ میں مولانا فضل الرحمان کے بیان کی تردید کی ہے۔سابق آرمی چیف اور سابق ڈی جی آئی ایس آئی کے قریبی ذرائع نے مولانا کے بیان کی تردید کرتے ہوئے کہا ہے کہ جے یو آئی امیر کو چاہیے کہ وہ پہلے اپنے حقائق درست کر لیں کیونکہ جنرل فیض حمید عدم اعتماد کی تحریک پیش کیے جانے سے کئی ماہ قبل آئی ایس آئی چھوڑ چکے تھے۔

قومی اخبار کی رپورٹ کے مطابق ذرائع کا کہنا ہے کہ مولانا صاحب یہ بھول گئے ہیں کہ جس وقت عمران خان کیخلاف عدم اعتماد کی تحریک لائی گئی تھی اس وقت جنرل فیض کور کمانڈر پشاور تھے۔ جنرل فیض نومبر 2021ء میں اسلام آباد سے جا چکے تھے۔

جنرل باجوہ کے قریبی ذریعے کا کہنا تھا کہ سابق آرمی چیف کی مولانا سے دو مرتبہ ملاقات ہوئی تھی۔ایک ملاقات اس وقت ہوئی تھی جب مولانا اس وقت کے آرمی چیف کے گھر اس وقت ملنے گئے جب مولانا عمران خان کیخلاف لانگ مارچ کر  رہے تھے، کہا جاتا ہے کہ یہ ملاقات ناخوشگوار رہی تھی۔

ہمارے امیدواروں کو نتائج تبدیل کرکے ہرایا گیا،جماعت اسلامی،وائٹ پیپر جاری کرنے کا اعلان

(24 نیوز)جماعت اسلامی نے انتخابات کو دھاندلی زدہ قرار دے دیا،لیاقت بلوچ نے انتخابی دھاندلی کے خلاف وائٹ پیپر جاری کرنے کا اعلان کردیا۔

نائب امیر جماعت اسلامی لیاقت بلوچ نے میڈیا سے گفتگو کرتے ہوئے کہا ہے کہ جماعت اسلامی اسکے خلاف الیکشن ٹریبونل میں بھی جائے گی،30 سے 40 حلقوں میں نتائج تبدیل کئے گئے، سندھ اور کے پی میں ہمارے امیدواروں کے نتائج تبدیل ہوئے۔

شہزادہ گستاسپ خان کی جیت برقرار ،نوازشریف کی اپیل خارج

(24 نیوز)این اے15مانسہرہ میں شہزادہ گستاسپ خان کی جیت برقرار ،میاں نوازاشریف کی اپیل خارج ،الیکشن کمیشن نے نوازشریف کی درخواست مسترد کردی۔

الیکشن کمیشن نے قومی اسمبلی کے حلقہ این اے 15 مانسہرہ میں الیکشن نتائج سے متعلق نواز شریف کی انتخابی عذرداری کی درخواست مسترد کر دی۔چیف الیکشن کمشنر سکندر سلطان راجہ کی سربراہی میں 2 رکنی بینچ نے این اے 15 مانسہرہ میں نواز شریف کی عذرداری درخواست کی سماعت کی۔

نواز شریف کے وکیل الیکشن کمیشن میں پیش نہ ہوئے تاہم ریٹرننگ افسر این اے 15 مانسہرہ نے اپنی رپورٹ الیکشن کمیشن میں جمع کروا دی۔ریٹرننگ افسر نے اپنے جواب میں بتایا کہ حلقے کا نتیجہ فارم 45 کے مطابق مرتب کیا گیا ہے۔الیکشن کمیشن نے ریٹرننگ افسر کے جواب کے بعد کامیاب امیدوار کا نوٹیفکیشن روکنے کی استدعا مسترد کر دی۔

پی ٹی آئی نے عمر ایوب کو وزیراعظم کیلئے اپنا امیدوار نامزد کردیا

(24 نیوز)پی ٹی آئی نے عمر ایوب کو وزیراعظم کیلئے اپنا امیدوار نامزد کردیا ۔

میڈیا سے گفتگو کرتے ہوئے سابق سپیکر قومی اسمبلی اسد قیصر نے کہا ہے کہ تمام سیاسی جماعتوں سے بات کرنے کا ٹاسک دے دیا گیا ہے۔عمر ایوب پی ٹی آئی کے وزارت عظمیٰ کیلئے امیدوار ہوں گے۔بانی پی ٹی آئی آج شام تک احتجاج کی تاریخ دیں گے۔الیکشن میں دھاندلی کے خلاف احتجاج کرنے والی جماعتوں سے رابطہ کریں گے، جے یو آئی، اے این پی، جماعت اسلامی اور قوم پرست جماعتیں سب سے بات کریں گے۔

’امریکاسمیت پوری دنیا نےانتخابات کو مانیٹر کیا‘

اسد قیصر نے کہا ہے کہ عاقب اللہ سپیکر خیبر پختونخوا اسمبلی کے امیدوار ہوں گے۔ادھر بیرسٹر سیف نے کہا ہے کہ عمران خان نے پیغام دیا ہے کہ امریکا نے ہمیشہ آمروں کی حمایت کی ہے۔امریکاسمیت پوری دنیا نےانتخابات کو مانیٹر کیا۔

پی ٹی آئی کے اشتہاری رہنماؤں کے گرد گھیرا مزید تنگ،جائیدادیں قرق کرنے کا حکم

(24 نیوز)پی ٹی آئی کے مفرور رہنماؤں کیخلاف گھیرا مزید تنگ ہونے لگا ۔لاہور کی انسداد دہشت گردی عدالت نے پی ٹی آئی سے تعلق رکھنے والے اشتہاری ملزمان کی منقولہ و غیر منقولہ جائیدادیں قرق کرنے کا حکم دے دیا۔

پی ٹی آئی سے تعلق رکھنے والے سابق صوبائی وزیر میاں اسلم اقبال کے دو رہائشی پلاٹس اور ایک بینک اکاؤنٹ، سابق وفاقی وزیر حماد اظہر کی پانچ زرعی زمینیں، فرخ حبیب کے چار بینک اکاؤنٹس، ایک رہائشی جائیداد اور ایک بیمہ پالیسی، مراد سعید کے دو بینک اکاؤنٹس اور ایک گاڑی قرق ہو گی۔

پی ٹی آئی کے نامزد وزیراعلیٰ علی امین گنڈاپورکو گرفتار کرنے کا حکم،وارنٹ جاری

(ویب ڈیسک) آزاد کشمیر الیکشن کمیشن نے رہنما پی ٹی آئی علی امین گنڈاپورکے وارنٹ گرفتاری جاری کر دیے۔

پی ٹی آئی کے خیبر پختونخوا کیلئے نامزد وزیراعلیٰ علی امین گنڈاپور کے خلاف آزادکشمیر کے انتخابات میں ضابطہ اخلاق کی خلاف ورزی کا کیس ہے۔ڈپٹی کمشنر ڈیرہ اسماعیل خان کو علی امین گنڈاپور کی گرفتاری کا مراسلہ جاری کر دیا گیا ہے جس میں علی امین گنڈاپور کو 28 فروری کو الیکشن کمیشن آزادکشمیرکےروبرو پیش کرنے کی ہدایت کی گئی ہے۔

ملک کے چند پولنگ اسٹیشنز پر دوبارہ ووٹنگ جاری

(24 نیوز)بھکر میانوالی میں 26 پولنگ اسٹیشنوں سمیت سندھ کے ضلع گھوٹکی و دیگر مختلف حلقوں کے پولنگ اسٹیشنز پر آج دوبارہ پولنگ ہو رہی ہے۔

تفصیلات کے مطابق ملک کے جن حلقوں میں آج دوبارہ پولنگ وہاں عام انتخابات کے روز ہنگامہ آرائی کے باعث پولنگ معطل کر دی گئی تھی اور ان پولنگ اسٹیشنز کے نتائج پولنگ کے 24 گھنٹے میں جاری کر دیئے جائیں گے۔

ذرائع کے مطابق قومی اسمبلی کی 265 حلقوں کے فارم نمبر 48 جاری ہو چکے ہیں اس لیے بھکر سمیت دیگر معطل شدہ پولنگ دوبارہ ہونے کے بعد کسی بھی وقت جیتنے والے قومی اسمبلی کے اراکین کے گزٹ نوٹیفکیشن کا مسودہ تیار ہو جائے گا۔

دوسری جانب چیف الیکشن کمشنر سکندر سلطان راجہ اور الیکشن کمیشن کے دیگر ارکان کی طرف سے ایک، ایک روز میں 40 سے زائد انتخابی عذر داریوں کی تیز رفتار سماعت اور فریقین کے وکلاء کے دلائل سننے کے بعد آرڈر تحریر کیے جا رہے ہیں۔

نو منتخب پارلیمان کا اجلاس کون بلائے گا؟

( 24نیوز )عام انتخابات کے بعد حکومت سازی کے لیے جوڑ توڑ جاری ہے اور اب نئی پارلیمان کا اجلاس بلانے کی بھی تیاریاں کی جارہی ہیں، صدر مملکت قومی اسمبلی کا اجلاس بلانے کی سمری کی منظوری دیں گے، قومی اسمبلی کا اجلاس اسپیکر قومی اسمبلی راجہ پرویز اشرف کی زیر صدارت ہوگا ۔ 

ذرائع کے مطابق قومی اسمبلی اجلاس بلانے کی تاریخ کی سفارش وزیرپارلیمانی امور مرتضٰی سولنگی کریں گے کیونکہ قانون کے مطابق انتخابات کے بعد نگران وزیر پارلیمانی امور قومی اسمبلی کا اجلاس بلانے کی سفارش نگران وزیراعظم کو کرتے ہیں۔

ذرائع نے بتایا کہ یہ سفارش سمری کی شکل میں نگران وزیراعظم کو جائے گی، نگران وزیراعظم سمری کی منظوری دے کر صدر کو مقررہ تاریخ پر قومی اسمبلی کا اجلاس بلانے کی ایڈوائس کریں گے، اس کے بعد صدر مملکت قومی اسملبی کا اجلاس بلانے کی سمری کی منظوری دیں گے ۔

سینیٹر عرفان الحق صدیقی  نےنواز شریف کے وزیر اعظم نہ بننے کی وجہ بتا دی

(24نیوز)سینیٹر عرفان الحق صدیقی  نے کہا کہ نواز شریف کے وزیر اعظم نہ بننے کے کچھ اسباب ہیں،کچھ ذاتی وجوہات ہیں،کچھ فیصلے لینے پڑتے ہیں۔

سینیٹر عرفان الحق صدیقی کا کہنا تھا کہ بہت خوشدلی کے ساتھ معاملات نہیں ہو رہے،ایک پارٹی یا کچھ لوگ ایسے آ گئے ہیں جو کسی سے ہاتھ نہیں ملانا چاہتے بات نہیں کرنا چاہتے،کوئی پارٹی اگر حکومت بنانے کی پوزیشن میں نہیں تو ایوان ٹوٹ جائے گا،اسمبلی پھر ٹوٹ جائے گی،اگر اسمبلی ٹوٹ جائے گی تو کیا پھر90دنوں میں انتخابات ہونگے؟،یہ ساری چیزیں سوچ کے فیصلے کرنے پڑتے ہیں۔

تحریک انصاف اور جماعت اسلامی میں ڈیڈ لاک برقرار, معاملات طے نہ ہوسکے

(24 نیوز )  پاکستان تحریک انصاف( پی ٹی آئی)  کاجماعت اسلامی سے اتحاد کے معاملے پرڈیڈ لاک اب  بھی  برقرار ہے،جماعت اسلامی نے پاکستان تحریک انصاف (پی ٹی آئی) کے خیبر پختونخوا میں حکومت سازی میں تعاون کرنے سے انکار کر دیا، جماعت اسلامی اورپاکستان تحریک انصاف صرف خیبرپختونخوا میں جبکہ  جماعت اسلامی مرکز اور کے پی کے دونوں  میں اتحاد کی خواہشمند ہے۔

تفصیلات کے مطابق پی ٹی آئی کی جانب سے کے پی کے میں اتحاد تک کی پیشکش پر معاملات آگے نہ بڑھ سکے ، پی ٹی آئی اور جماعت اسلامی کے کمیٹی ارکان کی ملاقات میں بھی اتحاد پر پیشرفت نہ ہوسکی ، مرکزی نائب امیر جماعت اسلامی لیاقت بلوچ کا کہنا تھا کہ جماعت اسلامی نے فیصلہ کیا ہے کہ پی ٹی آئی کے ساتھ تعاون نہیں کر سکتے، لیاقت بلوچ کا کہنا تھاکہ  پی ٹی آئی سےبات چیت دونوں وفاقی اور صوبائی حکومتوں سے متعلق تھی لیکن پی ٹی آئی نے وفاقی سطح پر کسی اور جماعت کے ساتھ اتحاد کیا ہے اس لئے صرف خیبرپختونخوا میں پی ٹی آئی سے اتحاد کا کوئی جواز نہیں بنتا۔
اس حوالے سے  پی ٹی آئی کے رہنما بیرسٹر محمد علی سیف کا کہنا  ہے کہ صوبائی اسمبلی میں جماعت اسلامی کی نمائندگی نہیں رہی جس کی وجہ سے اب ان کے ساتھ حکومت بنانے کا کوئی جواز نہیں، جماعت اسلامی کےساتھ صرف کے پی میں حکومت سازی پر بات چیت چل رہی تھی، بیرسٹر سیف کا مزید کہنا تھا کہ پاکستان تحریک انصاف کی جانب سے حکومت سازی کے لیے قانونی طریقہ کار کو دیکھاجا رہا ہے۔

واضح رہے کہ اس سے قبل جماعت اسلامی کے رہنما لیاقت بلوچ نے پی ٹی آئی کی جانب سے حکومت سازی کیلئے رابطوں کی تصدیق کی تھی اور کہا تھا کہ عوامی مینڈیٹ کےاحترام میں اگرضرورت پڑی توجماعت اسلامی پی ٹی آئی کا ساتھ دے گی۔

گیس قیمتوں میں اضافہ،آئی ایم ایف کو دی گئی ڈیڈلائن کل ختم ہوجائے گی

(وقاص عظیم شیخ)آئی ایم ایف کو دی گئی یقین دہانی کی ڈیڈ لائن کل ختم ہوجائے گی، گیس کی قیمتوں کی منظوری کیلئے ای سی سی کا اجلاس آج دوبارہ طلب کر لیا گیا۔نگران وزیر خزانہ ڈاکٹر شمشاد اختر کی زیر صدارت ای سی سی کا اجلاس 3 بجے ہوگا۔

ذرائع کے مطابق گیس کی قیمتوں کی منظوری کیلئے ای سی سی کا اجلاس آج دوبارہ طلب  کرلیا گیا ہے،نگران وزیر خزانہ ڈاکٹر شمشاد اختر کی زیر ای سی سی کا اجلاس 3 بجے ہوگا،اجلاس میں گیس کی قیمتوں کی سمری منظوری کیلئے پیش کی جائے گی،گذشتہ روزای سی سی گیس قیمتوں کی سمری پرفیصلہ نہیں کرسکی تھی۔

پنجاب اسمبلی کا پہلا اجلاس کب ہوگا؟متوقع تاریخ سامنے آگئی

(راؤدلشاد)پنجاب اسمبلی کا اجلاس فروری کےآخری ہفتےمیں متوقع،28فروری تک پنجاب اسمبلی اسپیکر، ڈپٹی اسپیکراورقائد ایوان کا چناؤ کیاجائیگا۔

پنجاب اسمبلی کا اجلاس امیدواروں کی کامیابی کےگزٹ نوٹیفکیشن سے مشروط کردیا گیا ،الیکشن ایکٹ2017کےسیکشن98کےتحت تاحال حتمی نوٹیفکیشن جاری نہیں کیاگیا
الیکشن ایکٹ2017کےحتمی نوٹیفکیشن کےبعدتمام ارکان اسمبلی کاگزٹ نوٹیفکیشن جاری ہوگا،ارکان اسمبلی کاحتمی نوٹیفکیشن22فروری سےقبل جاری کرنالازم ہے۔

22فروری کےبعد3روزمیں آزادارکان اسمبلی کوکسی پارٹی میں شمولیت اختیار کرنا ہوگی،آزاد ارکان کاسیاسی جماعت کوجوائن کرنےسےخواتین ،اقلیتوں کی مخصوص نشستوں کانوٹیفکیشن جاری ہوگا،25فروری تک گزٹ نوٹیفکیشن جاری کرنے کامرحلہ مکمل ہوگا،گزٹ نوٹیفکیشن کے اجراپرگورنر پنجاب بلیغ الرحمان پنجاب اسمبلی کااجلاس طلب کریں گے۔

پیپلز پارٹی کلین سوئپ کرے گی، آصف علی زرداری

(24 نیوز)سابق صدر آصف زرداری نے عام انتخابات میں پیپلز پارٹی کے کلین سوئپ کرنے کی امید کا اظہار کیا ہے۔

 نوابشاہ میں میڈیا سے گفتگو کرتے ہوئے آصف زرداری نے کہا کہ پیپلز پارٹی کا مستقبل روشن ہے اور امید ہے کہ پیپلز پارٹی کلین سوئپ کرے گی۔

انہوں نے کہا کہ پیپلز پارٹی نے عوام دوست منشور دیا ہے، پیپلز پارٹی کے سواکسی جماعت نے عوام دوست منشور نہیں دیا۔

پولنگ پر امن،کسی کو قانون ہاتھ میں لینے کی اجازت نہ دی جائے گی:وزیرداخلہ

(24 نیوز)نگران وزیر داخلہ ڈاکٹر گوہر اعجاز نے کہا ہے کہ کسی کو قانون ہاتھ میں لینے کی اجازت نہ دی جائے گی، امید ہے ملک بھر میں انتخابات کا عمل پر امن طریقے سے مکمل ہو گا۔

وزیر داخلہ ڈاکٹر گوہر اعجاز نےوزارت داخلہ کے کنٹرول روم، سیف سٹی اسلام آباد اور پولنگ اسٹیشن کا دورہ کیا ،سیکریٹری داخلہ، چیف کمشنر اسلام آباد اور آئی جی اسلام آباد وزیر داخلہ کے ہمراہ تھے،کنٹرول روم آمد پر کورآڈینیٹر نیشنل ایکشن پلان نے وزیر داخلہ کو ملک میں عام انتخابات کے دوران سیکیوریٹی صورتحال کے حوالے سے بریفنگ دی۔

ڈاکٹر گوہر اعجاز نے کہا ہے کہ ملک بھر میں پولنگ کا عمل خوش اسلوبی سے جاری ہے،فی الحال کوئی بڑا ناخوشگوار واقع پیش  نہیں آیا،ٹانک میں کویک ریسپانس فورس پر حملہ میں ایک جوان کی شہادت انتہائی افسوس ناک ہے،پولنگ کے عمل کی کڑی نگرانی جاری ہے،کسی کو قانون ہاتھ میں لینے کی اجازت نہ دی جائے گی۔امید ہے ملک بھر میں انتخابات کا عمل پر امن طریقے سے مکمل ہو گا۔

کراچی میں 5 جعلی پریزائڈنگ آفیسر پکڑے گئے،اورنگی ٹاؤن میں تاحال عملہ غائب

(انوشہ جعفری)کراچی کےاورنگی ٹاؤن پی ایس 120 این اے 246(NA246) میں بدمزگی، یو اے فاؤنڈیشن مین کیمپس اسکول میں پولنگ تاحال شروع نا ہوسکی ۔دوسری جانب پانچ جعلی پریذائڈنگ آفیسر زپکڑے گئے۔
اورنگی ٹاؤن میں پولنگ کا عملہ تاحال  نہیں پہنچ سکا ،صرف ایک پریزائڈنگ آفیسر پولنگ اسٹیشن میں موجود ہے،عملہ نا ہونے کی وجہ سے پولنگ اسٹیشنز کو بند کردیا گیا،ایس ایچ او مومن آباد موقع پر پہنچ گئے۔ پولنگ اسٹیشن کے باہر ووٹرز کی بڑی تعداد جمع ہوگئی۔

ووٹرز کی جانب سے شدید نعرے بازی غم و غصہ پایا جانے لگا،ایس ایچ او کا کہنا ہے کہ صبح سے الیکشن کمیشن کو شکایت کی ہوئی ہے کوئی عملہ ابھی تک نہیں پہنچا،جب تک پولنگ کا عملہ نہیں پہنچ جاتا تب تک ووٹنگ شروع نہیں ہوسکے گی۔ 
ووٹرز کا کہنا ہے کہ ہمارے اس پولنگ اسٹیشن میں ایک ہزار کے قریب ووٹرز ہیں ہمارا ووٹ ضائع کیا جارہا ہے ۔

خدا کے واسطے مخلوط حکومت کا نام نا لو:نواز شریف

(24 نیوز)سابق وزیر اعظم نواز شریف نے این اے128 میں ووٹ کاسٹ کر دیا۔کہتے ہیں کہ خدا کے واسطے مخلوط حکومت کا نام نا لو۔

اس موقع پر عون چودھری بھی نواز شریف کے ہمراہ تھے۔اس موقع پر نواز شریف کا کہنا تھا کہ لوگ گھروں سے باہر نکلیں اور ووٹ کاسٹ کریں۔

الیکشن کے نام پر مذاق ہو رہا ہے ؛ حافظ نعیم الرحمان

 (ویب ڈیسک) امیر جماعت اسلامی کراچی حافظ نعیم الرحمٰن نے کہا ہے کہ موبائل فون سروسز بند کردی گئی ہے ، یہ بد ترین صورتحال ہے۔

 میڈیا رپورٹ کے مطابق ان کا کہنا تھا کہ نجی کمپنیوں، چوکیداروں اور ڈرائیوروں کو پریزائنڈنگ افسران بنادیا گیا ہے۔

حافظ نعیم الرحمٰن نے بتایا کہ مختلف جگہ سے خبریں موصول ہو رہی ہیں کہ عملہ رکشے میں سامان لے کر پہنچ رہا ہے، اکثر مقامات میں سامان موجود ہے لیکن عملہ موجود نہیں ہے ۔

ان کا کہنا تھا کہ الیکشن کمیشن بتائے کہ الیکشن کے نام پر کیا مذاق کیا جارہا ہے۔

الیکشن رولز کی خلاف ورزی ،پی ٹی آئی ووٹر نے ووٹ کاسٹ کر کے تصویر سوشل میڈیا پر اپلوڈ کردی

(ویب ڈیسک )ملک بھر میں عام انتخابات کے انعقاد کے روز ملتان کے حلقہ این اے 150 میں پولنگ کے دوران الیکشن رولز کی خلاف ورزی سامنے آگئی، ووٹر نے آزاد امیدوار زین قریشی کو ووٹ ڈال کر تصویر سوشل میڈیا پر اپلوڈ کردی۔

میڈیا رپورٹ کے مطابق الیکشن کمیشن نے پولنگ اسٹیشنز میں موبائل فون لے جانے پر پابندی عائد کی ہے، اس کے باوجود ووٹر موبائل فون پولنگ اسٹیشن میں لے جانے میں کامیاب ہوا۔

واضح رہے کہ ضلع ملتان میں 31 لاکھ سے زائد ووٹرز اپنا حق رائے دہی استعمال کر رہے ہیں، این اے 150 ملتان (3) میں آزاد امیدوار زین قریشی، مسلم لیگ (ن) کے جاوید اختر اور پیپلز پارٹی کے رانا محمود الحسن مدِمقابل ہیں۔

چکوال میں شہریوں نےانتخابی عمل کا بائیکاٹ کردیا

(محسن جعفری)چکوال میں شہریوں نےانتخابی عمل کا بائیکاٹ کردیا ۔
چکوال کی یونین کونسل جنڈ خانزادہ کےقصبہ ڈھپئی میں اہلیان علاقہ نےانتخابی عمل کا بائیکاٹ کردیا ۔اہل علاقہ نے کہا ہے کہ بائیکاٹ 3افراد کے قتل کے سوگ کی وجہ سے کیاگیا ہے۔دو روز قبل ایک نوجوان نے 2خواتین سمیت 3افراد کوقتل کردیا تھا۔

بہاولپور: پولنگ سٹیشن نمبر 114 میں پولنگ تاحال بند

(24نیوز) بہاولپور میں پولنگ سٹیشن نمبر 114 میں  پولنگ تاحال شروع نہ ہوسکی۔

تفصیلات کے مطابق بہاولپور میں پولنگ سٹیشنز پر  اسسٹنٹ کمشنر سٹی عدیل خان نے دورہ کیا جہاں پولنگ سٹیشن نمبر114 پر  ووٹرز کی جانب سے اے سی عدیل خان کو پولنگ تاحال شروع نہ کرنے پر شکایت کی گئی۔